1 Taqedduḥt wiss tnayen tekkar as-dd i Cimɛun, i teqbič n Cimɛun, ɛlaḥsab řaǧat nsen. Tasɣart nsen teǧa di řwest n tesɣart n ayt n Yahuda. 2 Di tesɣart nsen dewřent ɣarsen tneddam-a: Bi’r-Sebɛa d Cabɛa d Mulada 3 d Ḥaṣar-Cuɛal d Baɛla d Ɛaṣam 4 d Iltulad d Batul d Ḥurma 5 d Ṣiqlaɣ d Bayt-Markabut d Ḥaṣar-Susa 6 d Bayt-Labawut d Caruḥayn. Marra jmiɛ tuɣa atent di třeṭṭac n tneddam ak-d ředcur nsent. 7 Xenni Ɛayn d Rimmun d Ɛatar d Ɛacan. Marra jmiɛ tuɣa atent di arebɛa n tneddam ak-d ředcur nsent 8 uřa d marra ředcur i dd-ittennḍen i tneddam-a ɣares ař Baɛlat-Bi’r, tenni d Rama n ljanub. Ta d tasɣart n teqbič n ayt n Cimɛun, ɛlaḥsab řaǧat nsen.

9 Tasɣart n ayt n Cimɛun tuɣa tᵉttwaksi zi min ɛebbaren s ufiřu n řeɛbar i ayt n Yahuda, minzi tasɣart n ayt n Yahuda tuɣa-tt i ina d tameqqrant aṭṭas. X uyenni warten ayt n Cimɛun ict n tesɣart di tesɣart nsen.

10 Taqedduḥt wiss třata teḍhar-dd i ayt n Zabulun, ɛlaḥsab řaǧat nsen. Aymir n tesɣart nsen iɛeddu ɣares ař Sarid.

11 Ittgeɛɛed weymir nsen ɣar řɣarb u ɣar Marɛala uca ittakkwaḍ ař Dabbaca u ař tiɣzart nni issizzřen qibař i Yuknaɛam.

12 Zi Sarid ittmeyyeř ɣar ccarq, ɣar manis d tneqqar tfuct, ɣares ař weymir n Kislut-Tabur uca itteffeɣ ɣar Dubra u ittgeɛɛed ɣar Yafiɛ.

13 Ssenni iɛeddu ɣar ccarq, ɣar manis dd-tneqqar tfuct, ɣar Jat-Ḥafar u ɣar Ɛit-Qaṣin u itteffeɣ ɣar Rimmun, iɣennes xenni ɣar Nayɛa.

14 Ittefriɣ weymir zi ccamal ɣar Ḥannatun u ṭṭrufa nnes ttakkwaḍen ař teɣzurt n Jiftaḥ-Il

15 Xenni Qaṭṭa d Nahlal d Cimrun d Yadala d Bayt-Laḥm. Marra jmiɛ tuɣa atent di tenɛac n tneddam ak-d ředcur nsent.

16 Ta d tasɣart n ayt n Zabulun, ɛlaḥsab řaǧat nsen, tineddam-a ak-d ředcur nsent.

17 Taqedduḥt wiss arebɛa tekkar as-dd i Issakar, i ayt n Issakar, ɛlaḥsab řaǧat nsen.

18 Iɛeddu weymir nsen ɣar Yazraɛil d Kislut d Cunam

19 d Ḥafarayim d Ciyun d Anaḥara 20 d Rabbit d Qicyun d Abaṣ 21 d Rama d Ɛayn-Jannim d Ɛayn-Ḥadda d Bayt-Qaṣṣays. 22 Ittakkwaḍ weymir ař Tabur d Caḥṣima d Bayt-Cams u ṭṭrufa n weymir ttakkwaḍen ař L'Urdun. Marra jmiɛ tuɣa atent di seṭṭac n tneddam ak-d ředcur nsent. 23 Ta d tasɣart n ayt n Issakar, ɛlaḥsab řaǧat nsen, tineddam ak-d ředcur nsent.

24 Taqedduḥt wiss xemsa tekkar as-dd i teqbič n ayt n Acir, ɛlaḥsab řaǧat nsen. 25 Aymir nsen aqa-t d Ḥalqa d Ḥali d Baṭan d Akcaf 26 d Allammalak d Amɛad d Mic-Al uca ittakkwaḍ ař wedrar n Karmil di řɣarb u ař Cixur-Libna 27 u ittmeyyeř ɣar manis dd-tneqqar tfuct ɣar Bayt-Dajun uca ittakkwaḍ ař Zabulun d teɣzurt n Yiftaḥ-Il ɣar ccamal, xenni ař Bayt-Ɛamiq d Naɛiyil uca itteffeɣ x uzeřmaḍ n Kabul 28 uca iɛeddu ɣar Ɛabrun d Raḥub d Ḥammun d Qana ɣares ař Ṣidun ameqqran. 29 Ittmeyyař weymir ɣar Rama iggur ɣares ař tandint n Ṣur i ifaryen s iɣebrawen u xenni ittmeyyar weymir ɣar Ḥuṣa u ṭṭrufa nnes ttakkwaḍen ař řebḥar, zi Ḥibl ař Akzib 30 d Ɛumma d Afiq d Raḥub. Marra jmiɛ tuɣa atent di tnayen u-ɛicrin n tneddam ak-d ředcur nsent. 31 Ta d tasɣart n teqbič n ayt n Acir, ɛlaḥsab řaǧat nsen, tineddam-a ak-d ředcur nsent.

32 Taqedduḥt wiss setta tekkar as-dd i ayt n Naftali, i ayt n Naftali, ɛlaḥsab řaǧat nsen. 33 Iɛeddu weymir nsen zi Ḥalaf, zi tcejjart n yigg di Ṣaɛanayim, d Adami-Naqib d Yabniyil ɣares ař Laqqum uca ṭṭrufa nnes ttakkwaḍen ař L'Urdun. 34 Ittmeyyeř weymir ɣar řɣarb ɣar Aznut-Tabur u ssenni iɛeddu ɣar Ḥuquq u ittakkwaḍ ař Zabulun di ljanub u di řɣarb issuffuɣ ař Acir u di ccarq ař Yahuda ɣar L'Urdun. 35 Tineddam ifaryen s iɣebrawen aqa aten Ṣiddim d Ṣayr d Ḥammat d Raqqat d Kinnarat 36 d Adama d Rama d Ḥaṣur 37 d Qadac d Idřaɛi d Ɛayn-Ḥaṣur 38 d Yirun d Mijdal-Il d Ḥurim d Bayt-Ɛanat d Bayt-Cams. Marra jmiɛ tuɣa atent di tseɛṭac n tneddam ak-d ředcur nsent. 39 Ta d tasɣart n ayt n Naftali, ɛlaḥsab řaǧat nsen, tineddam ak-d ředcur nsent.

40 Taqedduḥt wiss sebɛa tekkar as-dd i teqbič n ayt n Dan, ɛlaḥsab řaǧat nsen. 41 Aymir n tesɣart nsen aqa-t d Ṣurɛa d Icta’ul d Ɛir-Camc 42 d Caɛalbim d Ayalun d Yitla, 43 d Iylun d Timna d Ɛaqrun 44 d Iltaqay d Jibbatun d Baɛlat 45 d Yahud d Bani-Baraq d Jat-Rimmun 46 d Miyah-Yarqun d Raqqun ak-d temmurt qibač i Yafa.

47 Maca tammurt n ayt n Dan teḥsar i nitni. Xenni geɛɛden ayt n Dan ɣar Lacam, arzmen amenɣi ak-d Lacam, řeɣben tt, wtin tt s řeqḍeɛ n ssif uca ṭṭfen tt d tasɣart nsen uca qqimen zeddɣen din. Nitni ggin as i Lacam isem Dan ɛlaḥsab isem n babatsen Dan. 48 Ta d tasɣart n teqbič n ayt n Dan, ɛlaḥsab řaǧat nsen, tineddam-a ak-d ředcur nsent.

49 Umi kemmřen ayt n Israil abeṭṭu n temmurt di tseqqar n řwart ɛlaḥsab iymiren nnes, wcin ayt n Israil uřa i Yacuwa, mmis n Nun, ict n tesɣart di řwest nsen. 50 Wcin as, s řumur n SIDI, tandint i tuɣa ittar, Timna-Saraḥ x idurar n Ifrayim. Netta ibna tandint nni, uca iruḥ izdeɣ dinni. 51 Tina d tiseqqar nni ittwabḍan d řwart s tqedduḥt i ayt n Israil di Cilu zzat i wudem n SIDI ɣar wadaf n Uqiḍun n Umsagar s ufus n ukehhan Aliɛazar d Yacuwa, mmis n Nun, d imɣaren n tudrin n ibabaten n tqebbař. Ammu kemmřen abeṭṭu n temmurt.