1 Marra tamesmunt n ayt n Israil tmun di Cilu uca dinni i wtin Aqiḍun n Umsagar, awarni umi sswaḍɛen tammurt i yixef nsen. 2 Tuɣa qqiment jar ayt n Israil sebɛa n tqebbař, tinni tuɣa war d asent immewcen ɛad d tasɣart nsent.

3 Inna Yacuwa i ayt n Israil: “Ař meřmi ttrajam ɛad ař ɣa tadfem ad tᵉṭṭfem tammurt i d awem iwca SIDI, AREBBI n ibabaten nwem, d řwart? 4 Ksim i yixef nwem třata n yeryazen zi kuř taqbič, ḥima necc ad ten ssekkeɣ uca nitni kkaren ad kken x temmurt uca ad tt zemmen zi jjihet mammec ittxeṣṣa ad tiři tesɣart nsen, xenni ad ɣari dd-ɛeqben. 5 Ad tt bḍan x sebɛa n tseqqar. Yahuda ad iqqim x temmurt nnes di ljanub u taddart n Yusuf ad teqqim x temmurt nnes di ccamal. 6 Kenniw ad tzemmem tammurt x sebɛa n tseqqar uca izemmanen nni ad ayi ten dd-tawyem danita, xenni necc ad awem nḍareɣ taqedduḥt zzat i wudem n SIDI, AREBBI nneɣ. 7 Minzi Ilawiyyen war ɣarsen tasɣart di řwest nwem, minzi tukehhant n SIDI d tasɣart nsen. Jad d Rubin d wezyen n teqbič n Manassa ṭṭfen tasɣart nsen x ujemmaḍ n L'Urdun, ɣar ccarq, tasɣart nni i d asen iwca Musa, amsexxar n SIDI.

8 Kkaren iryazen uca ṭṭfen abrid. Yumur Yacuwa i yenni iṭṭfen abrid maḥend ad zemmen tammurt s tira, inna: “Uyurem, tekkem x temmurt uca zemmemem tt. Xenni ɛeqbettiw-dd ɣari u necc xenni ad awem da nḍareɣ taqedduḥt di Cilu zzat i wudem n SIDI.” 9 Iryazen ṭṭfen abrid, cuqqen tammurt uca zemmen tt deg ijj n wedlis ittwannḍen, settfen tt ɛlaḥsab tineddam, ɛlaḥsab sebɛa n tseqqar, uca ɛeqben ɣar Yacuwa di řmargeḥ n řɛeskar di Cilu.

10 Xenni inḍar Yacuwa taqedduḥt zzat i wudem n SIDI. Din i d asen ibḍa Yacuwa tammurt jar ayt n Israil ɛlaḥsab tarbiɛin nsen.

11 Taqedduḥt n teqbič n Binyamin teḍhar-dd ɛlaḥsab řaǧat nsen, u tasɣart n tqedduḥt nsen tusa-dd jar ayt n Yahuda d ayt n Yusuf.

12 Itteffeɣ weymir nsen ɣar uɣezdis n ccamal zi L'Urdun uca ittgeɛɛad ɣar weɛrur n ccamal n Ariḥa, iɛeddu xenni ɣar řɣarb ittekk x idurar uca ṭṭrufa nnes ttakkwaḍen ař řexřa n Bayt-Awan. ^■  

13 Ssenni iẓekkwa weymir ɣar Luz x weɛrur n ljanub n Luz, wa d Bayt-Il, uca xenni ihekkwa-dd ɣar Ɛaṭarut x wedrar i iǧan ɣar ljanub n Bayt-Ḥurun n wadday.

14 Aymir iɛeddu uca ittmeyyař ɣar ljanub jjihet n řɣarb zeg wedrar i iǧan arendad n Bayt-Ḥurun ɣar ljanub uca ṭṭrufa nnes ttakkwaḍen ař Qaryat-Baɛla, ta d Qaryat-Yaɛarim, ict n tendint n ayt n Yahuda. Wa d aɣezdis n řɣarb.

15 Aɣezdis n ljanub ibedda zi ṭṭarf aneggar n Qaryat-Yaɛarim. Ibedda weymir zi řɣarb u itteffeɣ ɣar tařa n waman n Naftuḥ.

16 Xenni ihekkwa-dd weymir ɣar ṭṭarf n wedrar i zi tᵉttwařid taɣzurt n mmis n Hinnum nni iǧan ɣar ṭṭarf n ccamal n teɣzurt n Irafawiyyen uca xenni ihekkwa-dd x teɣzurt n Hinnum ɣar uɣezdis n ljanub n wedrar n Iyabusiyyen uca ihekkwa-dd ɣar tařa n Rujil ^■  

17 uca ittekk x ccamal, ittekk x Ɛayn-Camc uca ittakkwaḍ ař Jalilut, nni iǧan arendad n tsunta n Adummim uca ihekkwa-dd ɣar weẓru n Buhan, mmis n Rubin, ^■  

18 u iẓekkwa ɣar řgeɛɛdet nni iǧan ɣar ccamal arendad n Řewḍa uca xenni ihekkwa di Řewḍa.

19 Xenni iɛeddu weymir ɣar ccamal ɣar řgeɛɛdet n Bayt-Ḥujla u ṭṭrufa nnes aqa aten ɣar iřes n ccamal n Řebḥar Ameǧaḥ, ɣar uneggar n L'Urdun di ljanub. Wa d aymir n ljanub.

20 L'Urdun tuɣa d aymir nnes x uɣezdis n ccarq. Ta d tasɣart n ayt n Binyamin ɛlaḥsab iymiren nnes i d as iquwwaren, ɛlaḥasab řaǧat nsen.

21 Tineddam n teqbič n ayt n Binyamin, ɛlaḥsab řaǧat nsen d tina: Ariḥa d Bayt-Ḥujla d Ɛimaq-Qiṣiṣ 22 d Bayt-Ɛaraba d Ṣamarayim d Bayt-Il 23 d Ɛawim d Alfara d Ɛufra, 24 d Kafar-Ɛammuni d Ɛufni d Jabaɛ. Marra jmiɛ tuɣa atent di tenɛac n tneddam ak-d ředcur nsent.

25 Jibɛun d Rama d Bi’rut 26 d Miṣfa d Kafira d Muṣa 27 d Raqam d Yarafwil d Tarala 28 d Ṣalaɛ d Alaf d Ayabusi, wenni d Urcalim, d Jibɛa d tendint n Arbaɛ. Marra jmiɛ tuɣa atent di arbeɛṭac n tneddam ak-d ředcur nsent. Ta d tasɣart n ayt n Binyamin ɛlaḥsab řaǧat nsen.