17
1 Taqedduḥt i teqbič n Manassa, minzi netta tuɣa d amenzu n Yusuf, tekkar as-dd i Makir, amenzu n Manassa, babas n temmurt n Jilɛad, Jilɛad d Bacan, maɣar netta tuɣa d ijj n uɛeskari imeḥḍen. ■ 2 X uya tekkar asen-dd tqedduḥt i ayt nneɣni n Manassa, ɛlaḥsab řaǧat nsen, i ayt n Abiɛazar d ayt n Ḥalaq d ayt n Asriyil d ayt n Cakam d ayt n Ḥafar d ayt n Camidaɛ. Ina d ayt n Manassa, mmis n Yusuf, ɛlaḥsab řaǧat nsen.
3 U Zeluḥfad, mmis n Ḥafar, mmis n Jilɛad, mmis n Makir, mmis n Manassa, war ɣares tuɣi ca iḥenjiren, maca tuɣa ɣares yessis. Ina d ismawen n yessis: Maḥla d Nuɛa, Ḥujla, Milka d Tirṣa. ■ 4 Nitenti qarrbent-i-dd zzat i wudem n ukehhan Aliɛazar u zzat i wudem n Yacuwa, mmis n Nun, u zzat i wudem n izeǧifen, nnant: “SIDI yumur Musa, ad aneɣ iwc tasɣart jar aytmatneɣ.” Uca iwca asent, ɛlaḥsab řumur n SIDI, ict n tasɣart jar wawmaten n babatsent. ■
5 Ammu i iwḍan ifiřan n řeɛbar ɛecra n twařawin i Manassa, břa tammurt n Jilɛad d Bacan i iǧan aɣirin n L'Urdun, 6 maɣar yessis n Manassa ṭṭfent tasɣart di řwest n warrawen nnes u tammurt n Jilɛad tuɣa i warrawen n Manassa i iqqimen.
7 Aymir n Manassa itteffeɣ zi Acir iɛeddu ɣar Mikmatat i iǧan ajemmaḍ i Cakim u aymir itteffeɣ ɣar ufusi ɣar imezdaɣ n Ɛayn-Taffuḥ. 8 Manassa waxxa ɣares tammurt n Taffuḥ, maca Taffuḥ simant nnes nni iǧan x weymir ak-d Manassa, tuɣa i ayt n Ifrayim. 9 Xenni ihekkwa weymir ɣar teɣzart n Qana ɣar ljanub n teɣzart. Tineddam n Ifrayim aqa din jar tneddam n Manassa. Tammurt n Manassa teǧa ɣar tma n ccamal n iɣzar uca ṭṭrufa nnes ttakkwaḍen ař řebḥar.
10 Ljanub aqa n Ifrayim, ccamal aqa n Manassa u řebḥar d aymir nnes. Di ccamal ttenḥadan x Acir u di ccarq x Issakar.
11 Di Issakar u di Acir dewřen ina ɣar Manassa: Bayt-Can ak-d tneddam i ɣares dd-iqqnen u Yablaɛam ak-d tneddam nnes d imezdaɣ n Dur ak-d tneddam nnes d imezdaɣ n Ɛayn-Dur ak-d tneddam nnes d imezdaɣ n Taɛnak ak-d tneddam nnes d imezdaɣ n Majiddu ak-d tneddam nnes, třata n treqqiɛin uyřent.
12 Ayt n Manassa war zemmaren ad ṭṭfen tineddam-a am tesɣart n řwart, minzi Ikenɛaniyyen ggin ad qqimen zeddɣen di temmurt. ■
13 Umi ayt n Israil tuɣa dewřen jehden, ggin nitni ljizya x Ikenɛaniyyen, maca war xasen uẓẓřen qaɛ.
14 Ssiwřen ayt n Yusuf ak-d Yacuwa, nnan: “Mayemmi i d ayi tewcid d tasɣart mɣir ict n tqedduḥt d yijj n ufiřu n řeɛbar , waxxa necc d ijj n řgens d ameqqran, awarni i umi d ayi igga SIDI lbaraka ammu?”
15 Yacuwa inna asen: “Mařa cek xenni d ijj n řgens ameqqsan, geɛɛed xenni ɣar wezɣar uca zdem dinni ttasiɛ i yixef nnek di temmurt n Ifiriziyyen d Irafawiyyen, mařa ḥṣaren xak idurar n Ifrayim.” □
16 Xenni nnan ayt n Yusuf: “Idurar nni war d aneɣ ttqiddin. Marra Ikenɛaniyyen nni izeddɣen di temmurt n řewḍa n teɣzurt ɣarsen ikarruten n umenɣi n wuzzař, am inni izeddɣen di Bayt-Can ak-d tneddam i ɣares dd-iqqnen u am inni di řewḍa n teɣzurt n Yazraɛil.”
17 Issiweř Yacuwa ak-d taddart n Yusuf, ak-d Ifrayim d Manassa, inna: “Kenniw d ijj n řgens d ameqqran u ɣarwem jjehd ameqqran. Kenniw war iǧi tᵉṭṭfem mɣir ict n tqedduḥt,
18 maɣar uřa d idurar ad iřin nwem uca umi teǧa d azɣar, ittxeṣṣa ad tzedmem uca ṭṭrufa nnes ad iřin i kenniw, maɣar ad taẓẓřem x Ikenɛaniyyen zi tesɣart nsen, waxxa ɣarsen ikarruten n umenɣi n wuzzař u waxxa nitni jehden.”