1 Taqedduḥt i ayt n Yusuf tekkar as-dd zi L'Urdun ɣar Ariḥa, uca aymir ittekk x tma n ccarq n waman n Ariḥa, x řexřa nni dd-ittgeɛɛaden zi Ariḥa x idurar n Bayt-Il 2 u zi Bayt-Il itteffeɣ ɣar Luz, ittekk x temmurt n ayt n Arkit ɣar Ɛaṭarut 3 uca ihekkwa-dd ɣar řɣarb ɣar temmurt n Ifalaṭiyyen ɣares ař tammurt n Bayt-Ḥurun n wadday u ɣares ař Jazar u ṭṭrufa nnes ttakkwaḍen ař řebḥar.

4 Xenni ṭṭfen uřa d ayt n Yusuf, Manassa d Ifrayim, řwart nsen.

5 Aymir n ayt n Ifrayim, ɛlaḥsab řaǧat nsen, d wa. Aymir n tesɣart nsen ibedda ɣar ccarq n Ɛaṭarut-Adar uca iggur ɣares ař Bayt-Ḥurun n nnej 6 uca iggur ɣar řɣarb ɣar uɣezdis n ccamal n Mikmata uca ittefriɣ weymir ɣar ccarq ɣar Ta’anat-Cilu u xenni ittekk xas x uɣezdis nnes n ccarq ɣar Yanuḥa 7 u zi Yanuḥa ihekkwa ɣar Ɛaṭarut d Naɛarat uca ɛřayen ineḥḥed Ariḥa u xenni itteffeɣ ɣar L'Urdun. 8 Zi Taffuḥ iɛeddu weymir ɣar řɣarb ɣar tiɣzart n Qana uca ṭṭrufa nnes ttakkwaḍen ař řebḥar. Ta d tasɣart n teqbič n ayt n Ifrayim, ɛlaḥsab řaǧat nsen.

9 Tineddam i ittwaḥuzen i ayt n Ifrayim aqa atent di řwest n tesɣart n Manassa, marra tineddam ak-d ředcur nsent.

10 War uẓẓiřen ca x Ikenɛaniyyen nni tuɣa izeddɣen di Jazar zi tesɣart nsen. Ammu zeddɣen Ikenɛaniyyen ɛad di řwest n Ifrayimiyyen ař ass-a. Tettwagg xasen maca ljizya n tsexxart.