1 Tina d tseqqar i ṭṭfen ayt n Israil di temmurt n Kenɛan, tinni i d asen ibḍa d řwart ukehhan Aliɛazar d Yacuwa, mmis n Nun, d izeǧifen n tudrin n ibabaten n tqebbař n ayt n Israil. ^■   2 S tqedduḥt ṭṭfen marra tasɣart nsen, am mammec t yumur SIDI s ufus n Musa zi jjihet n tesɛa n tqebbař d wezyen n teqbič. ^■   3 Maɣar Musa tuɣa iwca i tnayen n tqebbař d wezyen n teqbič ict n tesɣart aɣirin i L'Urdun, maca i Ilawiyyen war d asen iwci ca tasɣart di řwest nsen. 4 Aqa ayt n Yusuf ggin tnayen n tqebbař, Manassa d Ifrayim, u i Ilawiyyen war d as wcin ca tasɣart di temmurt maca mɣir tineddam i tzeddiɣt d min iǧan zzatsent n ddmani n tarewsa i řebhayem u i min ɣarsen iǧan. ^□   5 Am mammec tuɣa yumur SIDI i Musa, ammu i ggin ayt n Israil řami bḍan tammurt.

6 Xenni qarrben-dd ayt n Yahuda ɣar Yacuwa di Jiljal. Kalib, mmis n Yafunni, Aqinizi, inna as: “Cek tessned min xafi d xak inna SIDI i Musa, aryaz n AREBBI, di Qadac-Barniɛ. ^■   7 Necc ggiɣ arebɛin n iseggʷusa, umi i dd ayi issekk Musa, amsexxar n SIDI, zi Qadac-Barniɛ maḥend ad bergageɣ tammurt u necc ɛeqbeɣ ɣares, xebbareɣ as am mammec t tuɣa iǧan deg wuř inu. 8 Waxxa amenni aytma, inni i tuɣa akidi igeɛɛden, ssfessyen uř n řgens, maca necc tuɣa řebda ḍeffareɣ SIDI, AREBBI inu. ^■   9 Deg wass nni ijjuǧ Musa, inna: “Wayyaw , mařa tammurt i di tessarsed aḍar nnek, war tᵉttiři i cek d iḥenjiren nnek d tasɣart i řebda, minzi tuɣa cek řebda tḍeffared SIDI, AREBBI inu!”

10 Řexxu, xzar, SIDI ijja ayi ddareɣ, am mammec issiweř. Řexxu aqa xemsa u-rebɛin n iseggʷusa zeg wami issiweř SIDI ɣar Musa awař-a, umi Israil yuyur di řexřa. Uca řexxu, aqa da, am mammec tᵉttwařid, ɣari xemsa u-tmanyin n iseggʷusa.

11 Necc ɛad meḥḍeɣ amecnaw mammec meḥḍeɣ deg wass nni umi i d ayi dd-issekk Musa. Am mammec tuɣa jehhdeɣ deg wussan nni, ammu i jehhdeɣ ɛawed iḍa i umenɣi maḥend ad ffɣeɣ u ad areggʷḥeɣ. ^■  

12 Řexxu xenni, ewc ayi tammurt-a n idurar i x issiweř SIDI deg wass nni, maɣar cek tesřid simant nnek deg wass nni, aqa ayt n Iɛanaqiyyen aqa aten dinni uřa d tineddam mɣarent u faryent. Ad taɣ ad kidi yiři SIDI u ad awḍeɣ ad xasen aẓẓřeɣ amecnaw mammec inna SIDI.”

13 Xenni ibarek i-t Yacuwa uca iwca Ḥabrun d řwart i Kalib, mmis n Yafunni.

14 S uyenni teǧa tendint n Ḥabrun d řwart n Kalib, mmis n Yafunni, Aqinizi, ɣares ař ass-a, minzi netta tuɣa řebda iḍeffar SIDI, AREBBI n Israil.

15 Ḥabrun tuɣa qqaren as zic ‘tandint n Arbaɛ’. Tuɣa Arbaɛ d aryaz d ameqqran deg ayt n Iɛanaqiyyen. Uca tammurt tuɣa dayes řhudnet zeg umenɣi. ^□