1 Umi tuɣa Yacuwa d awessar uca imɣar deg wussan n tudart nnes, inna as SIDI: “Cek tewsared u temɣared deg wussan uca ɛad teqqim aṭṭas n temmurt maḥend ad tt teksid d řwart. 2 Ta d tammurt iqqimen: marra iduwwaren n Ifilisṭiniyyen u marra jjwayeh n Ijacuriyyen, 3 zeg yeɣzar n Ciḥur nni issizzřen zzat i wudem n Miṣra, ař aymir n Ɛiqrun di ccamal nni ittwaḥseb-dd d tammurt n Ikenɛaniyyen, dayes xemsa n řbacat n Ifilisṭiniyyen, Aɣazi d Acdudi d Acqaluni d Ajitti d Aɛaqruni. Xenni ɛad Iɛawiyyen. 4 Zi ljanub marra tammurt n Ikenɛaniyyen d Muɣara tenni n Iṣiduniyyen, ɣares ař Afiq u ɣares ař weymir n Imuriyyen 5 uca xenni tammurt n Ijibliyyen d marra Lubnan manis i dd-tneqqar tfuct, zi Baɛl-Jad swadday i wedrar n Ḥirmun ɣares ař mani ittakkwaḍ bnadem ɣar Ḥamat, 6 marra inni izeddɣen di jjwayeh zeg idurar n Lubnan ɣares ař Misrafut-Mayim, marra Iṣiduniyyen, Necc ad xasen aẓẓřeɣ zzat i wudem n ayt n Israil. Egg maca tammurt d řwart i Israil waha, am mammec d ac umureɣ.

7 Řexxu xenni, bḍa tammurt-a d řwart jar tesɛa n tqebbař d wezyen n teqbič n Manassa.

10 d marra tineddam n Siḥun, ajeǧid n Imuriyyen wenni i tuɣa iḥekkmen di Ḥacbun, ař aymir n ayt n Ɛammun

11 uřa d Jilɛad d temmurt n Ijacuriyyen d Imaɛkiyyen d qaɛ wedrar n Ḥirmun d marra Bacan ɣares ař Salxa,

12 marra tageldit n Ɛuj, di Bacan, wenni tuɣa iḥekkmen di Actarut d Idraɛi. Netta tuɣa iqqim zi min iqqimen n Irafawiyyen nni tuɣa iwta i-ten Musa uca yuẓẓeř xasen zi tesɣart nsen.

13 Maca ayt n Israil war uẓẓřen x ayt n Ijacuriyyen d Imaɛkiyyen zi tesɣart nsen. Jacur d Maɛkat qqimen zeddɣen di řwest n ayt n Israil ař ass-a.

14 I teqbič n Lawi waha umi i war iwci tasɣart. Tiɣarṣa n tmessi n SIDI, AREBBI n Israil, d tasɣart nnes, am mammec tuɣa i d as issiweř Netta.

15 Iwca Musa i teqbič n ayt n Rubin tasɣart nsen, ɛlaḥsab řaǧat nsen.

16 I nitni umi dd-tekkar temmurt n Aruɛir, tenni i iǧan ɣar tma n teɣzart n Arnun ak-d tendint nni iǧan di řwest n teɣzurt d marra řwaṭa yuɛřan ař Midiba.

17 Ḥacbun d marra tineddam nnes nni iǧan x řwaṭa yuɛřan, Dibun, Bamut-Baɛl d Bayt-Baɛl-Maɛun

18 d Yahṣa d Qadimut d Mayfaɛa

19 d Qiryatayim d Sibma d Ṣarat-Ha-Caḥar x wedrar n řewḍa n teɣzurt, ^□   20 d Bayt-Faɣur d tisawnin n Fisja d Bayt-Yacimut, 21 marra tineddam x řwaṭa yuɛřan d marra tageldit n Siḥun, ajeǧid n Imuriyyen, inni i tuɣa iḥekkmen di Ḥacbun, wenni i xef iɣřeb Musa, am iɣřeb uřa x řḥukkam n Midyan: Awi d Raqam d Ṣur d Ḥur d Rabaɛ, inni d ayt n jjehd di Ṣihun, imezdaɣ n temmurt. 22 Sennej i marra inni ittwanɣen di garra, nɣin ayt n Israil ɛawed Balɛam, mmis n Baɛur, agezzan, s řeqḍeɛ n ssif. ^■   23 Tuɣa L'Urdun ak-d jjwayeh nnes d aymir n ayt n Rubin ak-d temmurt ɣar tma nnes. Ta d tasɣart n ayt n Rubin ɛlaḥsab řaǧat nsen, ak-d tneddam d dcurat nsen. ^■  

24 Iwca Musa i teqbič n Jad, i ayt n Jad, tasɣart nsen, ɛlaḥsab řaǧat nsen. 25 I nitni umi dd-tekkar temmurt n Yaɛazir d marra tineddam n Jilɛad d wezyen n temmurt n ayt n Ɛammun ɣares ař Aruɛir nni iǧan zzat i wudem n Rabba, 26 zi Ḥacbun ař Ramat-Miṣfa d Buṭunim u zi Maḥanayim ɣares ař aymir n Dabir. 27 U di řewḍa n teɣzurt: Bayt-Haram d Bayt-Nimra d Sukkut d Ṣafun d min iqqimen n tgeldit n Siḥun, ajeǧid n Ḥacbun, L'Urdun d jjwayeh nnes ař aneggar n řebḥar n Kinnarat x ujemmaḍ n L'Urdun ɣar ccarq. 28 Ta d tasɣart n ayt n Jad, ɛlaḥsab řaǧat nsen, tineddam d dcurat nnes.

29 Iwca Musa i wezyen n teqbič n Manassa tasɣart nsen. Tekkar as-dd i wezyen n teqbič n Manassa, ɛlaḥsab řaǧat nsen. 30 Tuɣa tammurt nsen zi Maḥanayim: marra Bacan, marra tageldit n Ɛuj, ajeǧid n Bacan, d marra dcurat n Ya’ir nni iǧan di Bacan, settin n tneddam. 31 D wezyen n Jilɛad d Actarut d Idriɛi, tineddam n tgeldit n Ɛuj di Bacan, kkaren-dd i iḥenjiren n Maxir, mmis n Manassa, aqa i wezyen n iḥenjiren n Maxir, ɛlaḥsab řaǧat nsen. 32 Tina d jjwayeh i tuɣa ibḍa Musa d řwart di řewḍat n Mu’ab, x ujemmaḍ n L'Urdun, ɣar Ariḥa, ɣar ccarq.

33 Maca i teqbič n Lawi war d as iwci Musa ca tasɣart. SIDI, AREBBI n Israil d tasɣart nsen, am mammec tuɣa akidsen issiweř. ^■