1 “War tᵉttiři tesɣart niɣ řwart i ikehhanen, Ilawiyyen, i marra taqbič n Lawi, ak-d Israil. Ad ccen tiɣarṣa n wecmaḍ n SIDI d řwart nnes. ^■   2 War ɣares ittiři d řwart di řwest n aytmas. SIDI d řwart nnes, amecnaw mammec i d as inna. ^■   3 Man aya ad yiři d tasɣart n řḥeqq n ikehhanen qibač i řgens, qibač i yenni iṣeddqen ict n tɣarṣt, afunas niɣ ijjen zeg wuǧi: ad wcen i ukehhan tameṣṣaḍt n zzat, tnayen n iɣesmiren d tekrict.

4 Asuffuɣ amezwaru n ṣṣabet n irden nnek u zi binu n jdid nnek u zi zzect nnek n ṭṭri u tamezwarut n waǧas zi taḍuft n wuǧi nnek, ad as tewced. 5 Minzi ixḍar i-t SIDI, AREBBI nnek zi jar marra tiqebbař nnek, ḥima ad ikkar, ad isexxar di ṭṭweɛ n Yisem n SIDI, netta d arraw nnes, marra ussan. 6 Xmi dd ɣa yas Ulawi zeg ijjen zi tewwura nnek zi marra Israil, mani izeddeɣ am ubarrani, uca yusa-dd s marra řxaḍar nnes ɣar wemcan i ɣa ixḍar SIDI 7 uca ad isexxar dinni deg Yisem n SIDI, AREBBI nnes, amecnaw marra aytmas, Ilawiyyen, inni din ibedden zzat i wudem n SIDI, 8 xenni ad ccen nitni tasɣart anect n wayawya, barra i ttaman n min immenzen zeg min iǧan nnes ɛlaḥṣab taddart n ibabaten.

9 Xmi i ɣa tadfed ɣar temmurt nni d ac i ɣa yewc SIDI, AREBBI nnek, war sseřmad ca i yixef nnek ad tegged amecnaw jjɛayef n řegnus-a.

10 War ittwifi ḥed jar awem wenni i ɣa isseɛdun mmis niɣ yeǧis x tmessi niɣ wenni iǧan d aɛezzem, niɣ abezgaw, niɣ amegzu, niɣ aseḥḥar, ^■  

11 niɣ wenni itteggen tira, niɣ wenni issawařan ak-d imettan niɣ wenni ittgezzan uřa d wenni ittemcawaren ak-d imettan.

12 Minzi marra wenni itteggen timesřayin-a, aqa-t d jjɛifect ɣar SIDI u zi ssibbet n jjɛayef-a ad zzayes ikkes SIDI, AREBBI nnek, řwart nsen zzat i wudem nnek.

13 Ad tiřid d addud zzat i SIDI, AREBBI nnek.

14 Minzi řegnus nni i ɣa twarted s uɣiř, ad sřen i ibezgawen d iɛezzamen, maca cek, war d ac isemmeḥ SIDI, AREBBI nnek, ad tegged aya.

15 Ad ac igg SIDI, AREBBI nnek, ijj n unabi zi řwest nnek, zeg aytmac, amecnaw necc, i netta umi ɣa tesřem, ^■  

16 minzi d man aya am mammec marra min tᵉttared zi SIDI, AREBBI nnek, di Ḥurib deg wass n wegraw n řgens, umi tennid: ‘War dd-dikkwiřeɣ necc ad sřeɣ i tmijja n SIDI, AREBBI inu, uca war ẓarreɣ necc ɛad timessi aya imɣaren, ḥima war ttmettiɣ.’ ^■  

17 Xenni inna ayi SIDI: ‘Aqa ggin mliḥ umi ssiwřen ammu!’

18 Ad asen dd-ssekkeɣ ijj n unabi zi řwest n aytmatsen, amecnaw cek, uca necc ad ggeɣ awařen inu deg uqemmum nnes uca netta ad awem issiweř x marra min xef d as weṣṣiɣ. ^■  

19 Uca ad imsar, ad ttareɣ řeḥsab zeg weryaz nni war isřin i wawařen inu nni i ɣa issiweř s Yisem inu.

20 Maca anabi nni i ɣa yuffen ḥima ad issiweř ijj n wawař s Yisem inu, wenni necc war umureɣ ca ad zzayes issiweř, d wenni i ɣa issiwřen s yisem n irebbiten nneɣni, aqa anabi nni ad immet. ^■   21 Mařa teqqared deg wuř nnek: Mammec i ɣa negg ad nessen aqa SIDI war issiweř awař nni?, 22 xenni awař nni war d as ittwanna zi ɣar SIDI, xmi anabi nni tuɣa issawař s Yisem n SIDI uca xenni awař nni war imsar u war dd-iffiɣ. Xenni anabi nni issawař s uɛeffar. War zzayes tteggʷed ca.’ ”