17
1 “War ɣarreṣ ca i ufunas niɣ i yijjen zeg wuǧi i di iǧa ca n řɛib niɣ ca n tuɛeffna i SIDI, AREBBI nnek, minzi man aya d jjɛifect i SIDI, AREBBI nnek. ■ 2 Umi yufa di řwest nnek, ɣar daxeř i tewwura nnek, tinni i d ac iwca SIDI, AREBBI nnek, ca n weryaz niɣ ca n temɣart nni iggin min iǧan d řɣar di tiṭṭawin n SIDI, AREBBI nnek, uca ammu i ɣa iɛeddu x Řɛahd nnes, ■ 3 uca ad yuyur, ad isexxar i irebbiten nneɣni uca ad asen yaḍar, i tfuct niɣ i yuyur niɣ i marra itran n ujenna, min war xef umureɣ necc, 4 uca yiweḍ i cek-dd řexbar uca tesřid tt, xenni ittxeṣṣa ad tt tarzud mliḥ, u xzar, mařa d tidett uca tban belli tᵉttwagg di Israyil jjɛifect tanita, 5 xenni ad tessuffɣed aryaz nni niɣ tamɣart nni i iggin řɣar-a ɣar tewwura nnek, aryaz nni niɣ tamɣart nni, uca ad ten tḥejjared s iẓra ař ɣa mmten.
6 X wawař zeg uqemmum n tnayen niɣ třata n řechud ad ittwaneɣ wenni ittwaḥkem s řmewt. X wawař zeg uqemmum n ijj n ucehhad war iḥeǧeř ad ittwaneɣ. ■ 7 Afus n řechud ad xas wḍan d amezwaru maḥend ad t nɣen uca awarni as afus n marra řgens. Ammu i ɣa tekksed řɣar zi řwest nnek. ■
8 Xmi xak i ɣa teqseḥ ca n tmesřact di lḥukm jar usizzeř n idammen d usizzeř n idammen nneɣni, jar ddeɛwet d ddeɛwet, jar ticti d tecti, niɣ di lḥukm deg imcubbac ɣar daxeř i tewwura nnek, xenni ad tekkared, ad tgeɛɛded ɣar wemcan nni i ɣa ixḍar SIDI, AREBBI nnek.■ 9 Uca ad dd-tawḍed ɣar ikehhanen, ɣar Ilawiyyen, uca xenni ɣar řqaḍi nni din iǧan deg wussan nni, uca ad tesseqsid u nitni ad cek xebbaren x řeḥkam.
10 Ad tegged amecnaw tanfuč nni i cek i ɣa xebbaren deg wemcan nni i ɣa ixḍar SIDI uca ad teḥḍid marra min d ac i ɣa sseɛdun.
11 Ad tegged ɛlaḥsab awař n Ccariɛa nni d ac i ɣa seccnen u ɛlaḥsab řeḥkam nni d ac i ɣa inin. War ttheyyiḍ x wawař i d ac ɣa inin ɣar yeffus uřa ɣar uzeřmaḍ.
12 Aryaz nni itteggen s tuffet u war ittesři ca ɣar ukehhan nni i din ibedden ḥima ad din isexxar SIDI, AREBBI nnek, niɣ war ittesři ɣar řqaḍi, aqa aryaz nni ad immet. Ittxeṣṣa ad tekksed řɣar zi Israil.
13 Marra řgens ittxeṣṣa asen ad sřen u ad ggʷeden u war ttuffen ɛad.
X ujeǧid
14 Xmi i ɣa tadfed ɣar temmurt nni d ac i ɣa iwc SIDI, AREBBI nnek uca ad tt tᵉṭṭfed d řwart uca ad dayes tzedɣed u xenni ad tinid: ‘Ad xafi ggeɣ ijj n ujeǧid amecnaw marra řegnus i d ayi-dd innḍen!’,
15 xenni ad xak tegged d ajeǧid i wenni i ɣa ixḍar SIDI, AREBBI nnek. Zi řwest n aytmac ad tegged d ajeǧid xak, war xak ttegg ca abarrani nni war iǧin ca d umac.
16 Maca war iḥeǧeř ad yarni iysan i ixef nnes u war ittarri ca řgens ɣar Miṣra maḥend ad yarni iysan, minzi SIDI inna awem: ‘Zi ssa d tsawent war dd-tɛiqqibem ɛemmarṣ x webrid-a.’
17 War ikessi ca i ixef nnes aṭṭas n temɣarin, ḥima war ittɣarri wuř nnes. War yarenni ca i yixef nnes nnuqart niɣ ureɣ s waṭṭas.
18 Xmi i ɣa iqqim x řɛarc n tgeldit nnes, xenni ad yari i yixef nnes deg ijj n wedlis ittwannḍen ict n uɛawed n tira n Ccariɛa aya zeg wedlis nni iǧan zzat i wudem n ikehhanen, Ilawiyyen.
19 Ad ɣares yiři wedlis-a, ad dayes iɣar marra ussan n tudart nnes, ḥima ad iřmed ad iggʷed SIDI, AREBBI nnes, ad iḥḍa marra awařen n Ccariɛa aya d tweṣṣa aya uca ad zzaysent igg. 20 ḥima war issiřiy uř nnes x yaytmas niɣ ad iḥeyyed x webrid n tewṣeyyet, war iǧi ɣar yeffus uřa ɣar uzeřmaḍ, maḥend ad zzugarten wussan nnes di tgeldit nnes, netta d warraw nnes, di řwest n Israil.”