1 “Ḥḍa ayur n Abib, ad tesswejded Taɣarṣt n Useɛdu i SIDI, AREBBI nnek, minzi deg uyur n Abib issuffeɣ i cek-dd SIDI, AREBBI nnek, zi temmurt n Miṣra s ǧiřet. ^■   2 Ad tɣarṣed i Taɣarṣt n Useɛdu i SIDI, AREBBI nnek, uǧi d ifunasen d tfunasin deg wemcan nni i ɣa ixḍar SIDI maḥend ad din issezdeɣ Isem nnes. 3 War kis ttᵉtt ca s wentun. Sebɛa n wussan ad kis tecced aɣrum břa antun, aɣrum n tamara, minzi deɣya teffɣed zi temmurt n Miṣra, ḥima ad tɛeqřed x wass i dd-tteffɣed zi Miṣra marra ussan n tudart nnek. ^■   4 War kik ittemẓar wentun di marra jjihet nnek sebɛa n wussan uca zeg weysum nni i tɣarṣed ɣar uɛecci n wass amezwaru, war ittnusi ca ař tiwecca nnes. ^■   5 War iḥeǧeř ad tɣarṣed i Tɣarṣṭ n Useɛdu ɣar daxeř i yict n tewwura nni d ac i ɣa yewc SIDI, AREBBI nnek, 6 maca deg wemcan nni i ɣa ixḍar SIDI, AREBBI nnek, ḥima ad din issizdeɣ Isem nnes, din i ittxeṣṣa ad tɣarṣed i Tɣarṣt n Useɛdu ɣar uɛecci xmi i ɣa teɣři tfuct di tsaɛɛet nni di teffɣed zi Miṣra. 7 Uca ad tt tessengʷed ad tt tecced deg wemcan nni i ɣa ixḍar SIDI, AREBBI nnek. Ɣar ṣṣbeḥ awarni as ad tɛeqbed uca ad traḥed ɣar iqiḍan nnek.

8 Setta n wussan ad tecced aɣrum břa antun uca deg wass wiss sebɛa ad yiři ijj n umuni ifarzen i SIDI, AREBBI nnek. Xenni war iḥeǧeř ad tegged uřa d ict n řxedmet i ittxeṣṣa ad tᵉttwagg.

9 Ad tḥesbed sebɛa n simanat i yixef nnek. Zeg wami i ɣa tebdid ad tegged amjar deg imendi ibedden, ad tebdid ad tḥesbed sebɛa n simanat. ^■  

10 Ad teḥḍid Řɛid n Ssimanat i SIDI, AREBBI nnek. Ad tewced ict n ṣṣedqet s řxaḍar zeg ufus nnek am mammec cek ibarek SIDI, AREBBI nnek.

11 Ad tfarḥed zzat i wudem n SIDI, AREBBI nnek, cek, mmic, yeǧic, ismeɣ nnek, tayya nnek, Alawi nni ittɣiman daxeř i tewwura nnek, abarrani, ayujiř d tajjač nni iǧan di řwest nnek, deg wemcan nni i ɣa ixḍar SIDI, AREBBI nnek, ḥima ad din issezdeɣ Isem nnes.

12 Ad tɛeqřed belli tuɣa cek d ismeɣ di Miṣra uca ittxeṣṣa ad teḥḍid tiweṣṣa aya u ad ten tegged.

13 Ad teḥḍid Řɛid n Iɛuccuten sebɛa n wussan, xmi tkemmřed asmuni n ṣṣabet n unedrar nnek d uẓemmi n tsirt nnek n uḍiř. ^■  

14 Uca ad tfarḥed di Řɛid nnek, cek, mmic, yeǧic, ismeɣ nnek, tayya nnek, Alawi, abarrani, ayujiř d tajjač nni ittɣiman daxeř i tewwura nnek.

15 Sebɛa n wussan ad tɛeyyded i SIDI, AREBBI nnek, deg wemcan nni i ɣa ixḍar SIDI, minzi SIDI, AREBBI nnek, ad cek ibarek di marra řɣiǧet nnek u di marra řxedmet n ifassen nnek uca ad tfarḥed s tidett.

16 Třata n twařawin deg useggʷas ad dd-banen marra iwetman nnek zzat i wudem n SIDI, AREBBI nnek, deg wemcan nni i ɣa ixḍar Netta: di Řɛid n Weɣrum břa Antun, di Řɛid n Ssimanat, di Řɛid n Iɛuccuten. War dd-ittbin uřa d ijj s ifassen xwan zzat i wudem n SIDI. ^■  

17 Kuř aryaz ad iwc am mammec min d as immewcen deg ufus nnes, anect n lbaraka i d ac iwca SIDI, AREBBI nnek.

18 Ad tfarned řquḍat d iweqqafen ɣar daxeř i tewwura nni i d ac ɣa iwc SIDI, AREBBI nnek, jar marra tiqebbař nnek. Nitni ad ḥekmen jar řgens s ict n řeḥkamet iseggden.

19 War teffeɣ ca x webrid n tidett, war ttegg s wudmawen xmi i ɣa tḥekmed. War ttᵉṭṭef ca arrecwet, minzi arrecwet tessdarɣař tiṭṭawin n yinni iḥekkmen u tessfarraɣ awařen n yinni iqqaren tidett. ^■   20 Tasegda uca ɛawed tasegda ad teḍfared, ḥima ad teddared uca ad twarted tammurt nni i d ac ɣa iwc SIDI, AREBBI nnek.

21 War ttegg ca tarebbit n cwarti zi ca n tcejjart zzat i uɛalṭar n SIDI, AREBBI nnek, wenni i ɣa tegged i yixef nnek. ^□   22 War ɣarek ssgeɛɛad ameyḍa iqeddsen, minzi d man aya icarreh SIDI, AREBBI nnek.”