1 “Ɣar uneggar n sebɛa n iseggʷusa ad yiři ijj n wesmaḥ n imerwusa. ^■   2 Ta d tamesřact n ufekki zeg imerwusa: kuř bab n umarwas wenni yareḍřen zeg ufus nnes i umqarreb nnes, ad as isemḥ i umarwas. War ittettar ca amarwas zeg umqarreb nnes uřa zeg umas, minzi ittwabarreḥ s ufekki n imerwusa i SIDI. 3 Iɛeddeř ad třaɣid abarrani x umarwas, maca min iǧan nnek ɣar umac, d man aya ad dayes ismeḥ ufus nnek. 4 Aqa war ittxeṣṣi ca ad ɣarek yiři uřa d ijj n umezřuḍ, minzi SIDI ad cek ibarek aṭṭas di temmurt nni d ac i ɣa iwc, SIDI, AREBBI nnek, d tasɣart i ɣa twarted, 5 mařa xenni tesřid s teynit ɣar tmijja n SIDI, AREBBI nnek, ḥima ad teḥḍid uca ad tegged marra tiweṣṣa-ya, tinni x d ac weṣṣiɣ ass-a. 6 Minzi SIDI, AREBBI nnek, ad ac ibarek amecnaw mammec tuɣa i d ac inna, uca aṭṭas n řegnus ad xak arḍřen s weḍman, maca cek war tareṭṭřed walu s weḍman x uřa d yijjen zzaysen. Cek ad tḥekmed x waṭṭas n řegnus, maca nitni war xak ḥekkmen ca.

7 Xmi din ɣarek i ɣa yiři ijj n umezřuḍ, ijj zeg aytmac, ɣar daxeř i yict zi tewwura n temmurt nnek nni i d ac ɣa yewc SIDI, AREBBI nnek, xenni war sseqsaḥ ca uř nnek u war ttzeyyar ca afus nnek x umac nni izeřḍen, 8 maca ad as tarzmed afus nnek s wecrim u ad as tareḍřed s weḍman, ɛlaḥsab min iḥwaj deg uzeyyar nnes. 9 Ḥḍa, war ittiři deg wuř nnek uřa d ijj n uxarriṣ baṭeř, teqqared deg yixef nnek: ‘Aqa yudes-dd useggʷas wiss sebɛa, aseggʷas n ufekki n imerwusen!’, uca xenni ad texzared s tiṭṭawin ixeyyqen x umac nni i di iǧa zeřḍ uca war d as tᵉtticed walu u netta ad zzayek icetca ɣar SIDI uca ad xak yiři ddenb.

10 Ittxeṣṣa ad as tewced deɣya uca war ittiři uxeyyeq deg wuř nnek xmi i d as ɣa tewced, minzi x uya ad ac ibarek SIDI, AREBBI nnek, di marra řxedmet nnek u di marra mani i ɣa yaweḍ ufus nnek. ^■  

11 Minzi ameẓřuḍ war ittwameḥḥi zi temmurt. S uya necc umureɣ cek, qqareɣ: ‘Arzem afus nnek ař ṭṭarf i umac, i wenni ittwaḥṣaren u i umezřuḍ nni iǧan di temmurt nnek.’ ^■  

12 Mařa umac, ijj n Uɛibrani niɣ ict n Tɛibranect, ittwazzenz ɣark, xenni ad ac ixdem setta n iseggʷusa, maca deg useggʷas wiss sebɛa ad as tsarrḥed ad as tarxud zzayek s třelli. ^■  

13 Xmi d as i ɣa tsarrḥed, xenni war t ttejji ad iraḥ s ifassen xwan.

14 Axmi d as ɣa tegged tiseddect ammu i d as ɣa tegged ict n tewhibt zeg wuǧi u zeg unedrar u zi tsirt n uḍiř. S min d ac ibarek SIDI, AREBBI nnek, ad as tewced i netta.

15 Uca ad tidared belli tuɣa cek d ismeɣ di temmurt n Miṣra uca SIDI, AREBBI nnek, aqa ad xak ifdi. S uya, Necc umureɣ cek x tmesřact-a ass-a. ^□  

16 Mařa netta inna ac: ‘War xak ttaggʷijeɣ!’, minzi ittexs i cek d řaǧ n taddart nnek, minzi aqa netta mliḥ ɣarek,

17 xenni ad teksid ijj n usegni uca ad tessnuqqeb amezzuɣ nnes uřa d tewwart uca ammu i ɣa yiři d ismeɣ nnek i řebda u ammu i ɣa tegged ɛawed s tayya nnek. ^■  

18 War dd-ittbin iqseḥ di tiṭṭawin nnek, xmi t ɣa tessekked di třelli, minzi tuɣa isexxar i cek setta n iseggʷusa amecnaw acewwař s řexřaṣ tnayen n tseqqar. Ammu i cek i ɣa ibarek SIDI, AREBBI nnek, di marra min ɣa tegged.

19 Ad tessqeddsed i SIDI, AREBBI nnek, marra imenza iwetman inni dd-ittwaxeřqen jar ifunasen d tfunasin nnek d wuǧi nnek. War iɛeddeř ad tessxedmed amenzu n ifunasen nnek uca amenzu n wuǧi nnek war t tteǧas. ^■   20 Aseggʷas awarni i useggʷas ad ten tecced, cek d řaǧ n taddart nnek, zzat i wudem n SIDI, AREBBI nnek, deg wemcan i ɣa ixḍar SIDI. 21 Maca mařa tuɣa dayes řɛib, tuɣa-t d aqiḍar niɣ d adarɣař niɣ min ma řɣib aɛeffan i ɣares iǧan, war d as ɣarreṣ ca i SIDI, AREBBI nnek.^■   22 Daxeř i tewwura nnek ad zzayes tecced, am umexmuj am umezdag, am mammec i ɣa tecced zeg iɣayḍ n wezɣar u zeg udad. 23 Mɣir idammen nnes, war ten ttᵉtt ca, ad ten tseyybed x temmurt amecnaw aman.” ^■