14
1 “Kenniw d iḥenjiren n SIDI, AREBBI nwem. War xebbcem ca x arrimet nwem, war tqeccarem ca jar tiṭṭawin nwem di ssibbet n ijj n umettin. ■ 2 Minzi aqa cek d ijj n řgens iqeddes ɣar SIDI, AREBBI nnek, uca SIDI ifarz cek ḥima ad as tiřid d řgens iɣřan zi marra řegnus i iǧan x temmurt. ■
X macca d wagřa
3 War ttett zi marra min iǧan d jjɛifect.
4 Aqa d ina d imuddaren i iɛeddeř ad ten teccem: afunas, ijjen zeg iḥuřiyyen, ijjen zeg iɣayḍen, □ ■ 5 udad, iɣayḍ n wezɣar, izerzer, iɣayḍ ak-d waccawen imeqqranen, amellal, afunas n řexřa d iɣayḍ n idurar. □ 6 Iɛeddeř ad teccem marra řmař i ɣar iǧa třeqqa n tecḍect immsebḍan, tacḍect immsebḍan x tnayen, u sennej i man aya ttarran ifeẓ jar řmař.
7 Maca zeg inni ittarran ifeẓ d yenni i ɣar teǧa tecḍect immsebḍan qaɛ x tnayen, war iɛeddeř ad teccem ina: ařɣem, d uyarziz d ukawka n teṣḍart minzi tteffẓen, maca war ɣarsen bu tecḍect immsebḍan, u xenni ad ɣarwem iřin xemjen. 8 Ammu uřa d iřef, waxxa ɣares tacḍect immsebḍan, war ittarri ifeẓ, s uyenni ad ɣarwem yiři ixmej. War ttᵉttem ca zeg weysum nnes, war ttḥadam ca řxecbat nsen.
9 Iɛeddeř ad teccem ina zi marra min iǧan deg waman: marra wi ɣar iǧa wafriwen d teqcurt iɛeddeř ad ten teccem.
10 Maca marra min war ɣar ǧin wafriwen niɣ taqcurt, war iɛeddeř ad ten teccem, ad ɣarwen iřin xemjen.
11 Marra ijḍaḍ izdigen iɛeddeř ad ten teccem,
12 maca war iɛeddeř ad zzaysen teccem ina: agider, isɣi, agider n řebḥar,
13 bu-řxeẓrat d amesɣuy amuqḍiɛ n tiṭṭawin d bu-umeṭṭaw s tazřa ak-d marra markat nnes,
14 marra markat n ubaɣeř,
15 yeǧis n buheyyaf, aɛennaf, ajḍiḍ n řebḥar, řbaz ak-d markat nnes,
16 aḥemmař n řkas, bu-uṣuḍi n řmewt, bu-yuntaḥ,
17 bu-uɛuqqi, bu-uḥawař, bu-tcararrut,
18 abellarj, bu-uṣuḍi iɛeffnen ak-d markat nnes, dundun d řweḍwaḍ.
19 Marra min ɣar iǧa wafriwen nni ittbuɛen ad ɣarwem yiři ixmej. War iɛeddeř ad ttwaccen.
20 Marra ijḍaḍ izdigen iɛeddeř ad ten teccem.
21 War iɛeddeř ad teccem uřa zeg ict n řxecbet. Ad tt tewced i ubarrani nni iǧan daxeř i tewwura nnek, ḥima ad zzayes yecc niɣ ad tt izzenz i ubarrani, minzi cek d ijj n řgens d amqeddas i SIDI, AREBBI nnek.
War tessnennid iɣayḍ d ameẓyan deg uɣi n yemmas. ■
22 Ad tɛeccared nican marra řɣiǧet n zzariɛet nni ittejju iyyar nnek zeg useggʷas ɣar useggʷas nneɣni. 23 Ad tecced řeɛcur n irden nnek, n binu nnek n jdid, n zzect nnek n ṭṭri, uřa n imenza n řebhayem nnek u n wuǧi nnek zzat i wudem n SIDI, AREBBI nnek, deg wemcan i ɣa ixḍar Netta maḥend ad din izemmem Isem nnes, ḥima ad třemded ad teggʷeded SIDI, AREBBI nnek kuř ass. ■ 24 Mařa abrid izzuggart xak aṭṭas, ař ɣa tafed war tzemmared ad ten tawyed din, minzi amcan nni ixḍar SIDI, AREBBI nnek, ḥima ad din izemm Isem nnes, iǧan iggʷej xak aṭṭas, uca mařa xenni SIDI, AREBBI nnek ibarek i cek, 25 qřeb i-ten xenni d tmenyat n nnuqart uca uyur s tkemmust n tmenyat deg ufus nnek ɣar wemcan nni i ɣa ixḍar SIDI, AREBBI nnek, □ 26 ad tṣarfed tmenyat nni x marra min di immeẓri wuř nnek, x ifunasen d tfunasin, x wuǧi, x binu, x ccrab niɣ x min ma ixs wuř nnek uca ad tecced din zzat i wudem n SIDI, AREBBI, ad tfarḥed, cek d řaǧ n taddart nnek. ■
27 War semmeḥ ca di Alawi nni izeddɣen ɣar daxeř i tewwura nnek, minzi war ɣares bu din tasɣart niɣ řwart akidek. ■ 28 Ɣar uneggar n třata n iseggʷusa ad tessuffɣed marra řeɛcur n řɣiǧet deg useggʷas nni uca ad ten txezned jar daxeř n tewwura nnek. 29 Xenni Alawi ad dd-yas, minzi war ɣares teǧi tesɣart niɣ řwart akidek, uřa d abarrani d uyujiř d tajjač nni iǧan ɣar daxeř i tewwura nnek uca ad ccen, ad jjiwnen, ḥima xenni SIDI, AREBBI nnek, ad ac ibarek di marra řxedmet i ɣa tegged s ufus nnek.”