1 “Marra awař nni x kenniw weṣṣiɣ, ad t teḥḍam ad zzayes teggem. War ɣares arenni u war zzayes ttekkes. ^■  

2 Mařa ikkar ijj n unabi niɣ ijj n umerji n tirja di řwest nnek uca igga ca n řeɛřamet niɣ ict n lmuɛjiza, 3 uca řeɛřamet nni niɣ lmuɛjiza nni x d ac issiweř temsar uca xenni inna: ‘Ejj ad nuyur awarni i irebbiten nneɣni, inni war tessined, ḥima ad ten neɛbed!’, 4 xenni war ttesři i wawařen n unabi nni niɣ n umerji n tirja nni, minzi SIDI, AREBBI nwem, ittqeǧab kenniw, ḥima ad issen ma tᵉttexsem SIDI, AREBBI nwem s marra uř nwem u s marra řeɛmar nwem. 5 Ad tuyurem awarni i SIDI, AREBBI nwem, ad zzayes teggʷdem, ad tᵉṭṭfem di tweṣṣa nnes, ad tesřem i tmijja nnes, ad as tsexxarem u ad dayes třeṣqem. ^■   6 Ittxeṣṣa ad ittwaneɣ unabi niɣ umerji n tirja, minzi issiweř x řaggʷajet x webrid n SIDI, AREBBI nwem, - wenni kenniw issuffɣen zi temmurt n Miṣra, d wenni cek ifdin zi taddart n tesmuɣi - , maḥend ad cek issuffeɣ zeg webrid nni x yumur SIDI, AREBBI nnek, ad dayes tuyured. Ittxeṣṣa ad tekksed řɣar zi řwest nnek. ^□  ■  

7 Mařa umac, mmis n yemmac, niɣ mmic niɣ yeǧic niɣ tamɣart n wuř nnek niɣ ameddukkeř nnek wenni i iǧan am řeɛmar nnek, ad cek iɣar s tnuffra ad yini: ‘Ejj aneɣ ad neḍfar ad nsexxar i irebbiten nneɣni!’ inni war tessined ca cek uřa d ibabaten nnek, ^■   8 zeg irebbiten n řegnus i d ac-dd innḍen, inni yudsen niɣ inni xak iggʷejen zi ṭṭarf n temmurt ař ṭṭarf nneɣni, 9 xenni war xas ttegg ca, war ɣares ttesři ca. War t areḥḥem ca, war d ac izziǧiz ca niɣ ad t teffared,

10 maca ittxeṣṣa ad t tenɣed nican. Afus nnek ad xas yiři d amezwaru maḥend ad t tenɣed u xenni ad xas yiři ufus n řgens marra. ^■  

11 Ad t tḥejjarem s yeẓra ař ɣa immet, minzi tuɣa yarezzu ad cek issiggʷej x SIDI, AREBBI nnek, wenni i cek dd-issuffɣen zi temmurt n Miṣra, zi taddart n tesmuɣi.

12 Marra Israil ad sřen uca ad ggʷeden, war dd-dikkʷiřen ad ggen řɣar-a di řwest nnek. ^■  

13 Mařa tesřid deg icten zi tneddam nni d awem i ɣa iwc SIDI ḥima ad daysent tzedɣed, aqa qqaren:

14 ‘Aqa ffɣen-dd zi řwest nwem yeryazen, ayt i war isekkwin, uca ssɣekkwan imezdaɣ n tendint nsen, qqaren: Ejj ad nraḥ ad neɛbed irebbiten nneɣni, inni war tessinem,

15 xenni ad tarzud u ad tesseqsid mliḥ, u xzar, mařa tufid tamesřact nni tbedd x tidett, aqa jjɛifect nni tᵉttwagg di řwest nnek,

16 řexdenni ad tegged ict n tecti i imezdaɣ n tendint s řeqḍeɛ n ssif. Ad tt tḥarrmed i uteḥḥi s marra min dayes, uřa d řebhayem nnes, s řeqḍeɛ n ssif.

17 Ad tessmuned marra takeccaḍt nnes ɣar řwest n wazzay nnes, ad tessecmeḍ tandint s tmessi d min dayes marra n tkeccaḍt i SIDI, AREBBI nnek, uca ad tedweř tendint d ict n řxarbet i řebda, ɛemmarṣ ad tᵉttwabna ɛawed.

18 War ttejji ca min ittwaḥarrmen i uteḥḥi ad iřṣeq jar ifassen nnek, ḥima SIDI ad xak issiggʷej řḥaduq n weɣḍab nnes uca ad ac iwc arreḥmet, ad cek yarḥem ad cek yarni, am mammec ijjuǧ i ibabaten nnek,

19 xmi i ɣa tesřed ɣar tmijja n SIDI, AREBBI nnek, ḥima ad teḥḍid marra tiweṣṣa nnes tinni i x d ac weṣṣiɣ ass-a, u ḥima ad tegged min iseggden di tiṭṭawin n SIDI, AREBBI nnek.”