1 “D tina d tiweṣṣa d lfarayiḍ nni i ɣa teḥḍam maḥend ad tent teggem di temmurt, nni d ac iwca SIDI, AREBBI n ibabaten nnek, ḥima ad tt teksid d řwart, marra ussan nni i ɣa teddarem kenniw x wudem n temmurt.

2 Ad tareddǧem qaɛ marra imucan mani řegnus tuɣa sexxaren i irebbiten nsen, marra imucan nni i ɣa teṭṭfem d řwart: x idurar yuɛřan, x tewririn u sadu kuř tacejjart tazizawt. ^□  ■   3 Ad tenḍarem iɛalṭaren nsen, ad tarẓem imayḍuten nsen iqeddsen u tirebbin nsen n cwarti ad tent tesscemḍem s tmessi uca ad thedmem řexyařat ineqcen n irebbiten nsen uca ad temḥam isem nsen zeg wemcan nni. ^■   4 War tteggem i SIDI, AREBBI nwem am tteggen nitni, 5 maca ad tarzum x wemcan nni i ɣa ixḍar SIDI, AREBBI nwem, zi jar marra tiqebbař nwem, ḥima ad din igg Isem nnes, wah ɣar Tzeddiɣt nnes i ɣa tarzum u din i ɣa tawḍed ^■   6 uca dinni i ɣa tawyem tiɣarṣa nwem n wecmaḍ d tɣarṣa nwem d řeɛcur nwem d tewhibt nni issgeɛɛed ufus nwem d tewhibin nwem s řxaḍar d imenza n ifunasen d tfunasin nwem d imenza n wuǧi nwem, 7 uca dinni i ɣa teccem zzat i wudem n SIDI, AREBBI nwem, ad tfarḥem, kenniw d řaǧ n tudrin nwem, zi marra min igga ufus nwem u zi min di kenniw ibarek SIDI, AREBBI nnek. 8 War tteggem amecnaw marra min nettegg neccin da ass-a: kuř aryaz itteggen min d as ittwařa nican i ixef nnes. 9 Minzi aqa ɛad řexxu war tudifem ca ɣar arraḥet u ɣar řwart nni d awem iwca SIDI, AREBBI nnek.

10 Xmi i ɣa teẓwam L'Urdun uca ad tzedɣem di temmurt nni d awem i ɣa iwc SIDI, AREBBI nwem, d řwart, Netta ad awem iwc arraḥet zi marra řɛedyan nwem i d awem dd-innḍen uca ad tzedɣem di řaman.

11 Din i ɣa yiři wemcan nni i ɣa ixḍar SIDI, AREBBI nwem, ḥima ad issezdeɣ din Isem nnes uca dinni i ɣa tawyem marra min x cek umureɣ: tiɣarṣa n wecmaḍ nwem, tiɣarṣa nwem, řeɛcur nwem, tiwhibin n usgeɛɛed n ufus nwem d marra tiwhibin n lwaɛd nni i ɣa tweɛdem i SIDI. ^■  

12 Ad tfarḥem zzat i wudem n SIDI, AREBBI nwem, kenniw d iḥenjiren nwem d tḥenjirin nwem d isemɣan nwem d tiyya nwem d Ulawi nni izeddɣen daxeř i tiwwura nwem, minzi war ɣares tasɣart niɣ řwart akidwem. ^■  

13 Ḥḍa war ttegg ad tessbexxared tiɣarṣa nnek n wecmaḍ di min ma amcan nni twařid,

14 maca deg wemcan, nni i ɣa ixḍar SIDI deg icten zi tqebbař nnek, dinni i ɣa tessbexxared tiɣarṣa n wecmaḍ uca dinni i ɣa tegged marra min d ac umureɣ.

15 S marra, tzemmared ad tɣarṣed daxeř i tewwura nnek marra min immeẓri wuř nnek uca ad zzayes tecced ɛlaḥsab lbaraka nni d ac i ɣa iwc SIDI, AREBBI nnek, daxeř i tewwura nnek. Amexmuj d umezdag zemmaren ad zzayes ccen, axmi ttetten zeg iɣayḍ n wezɣar u zeg udad.

16 Mɣir idammen war ten tᵉttetted. Ad ten tneɣřed x temmurt, amecnaw aman. ^■  

17 War iɛeddeř ad tecced daxeř i tewwura nnek zi řeɛcur n irden d binu nnek n jdid d zzect nnek n ṭṭri uřa zeg imenza n ifunasen d tfunasin d wuǧi nnek niɣ zi tewhibin n lwaɛd nnek inni zi twaɛded niɣ zi tewhibin s řxaḍar niɣ zi tewhibt nni issgeɛɛed ufus nnek.

18 Minzi ad ten tecced zzat i wudem n SIDI, AREBBI nnek, deg wemcan nni i ɣa ixḍar SIDI, AREBBI nnek, cek, mmic, yeǧic, ismeɣ nnek, tayya nnek d Ulawi nni izeddɣen daxeř i tewwura nnek uca ad tfarḥed zzat i wudem n SIDI, AREBBI nnek, di marra min ɣar i ɣa isswiẓẓed ufus nnek.

19 Ḥḍa, war semmeḥ ɣar uzeǧif nnes Alawi di marra ussan nnek x temmurt nnek.

20 Xmi SIDI, AREBBI nnek, ad issiyru aymir n temmurt nnek, am mammec cek iwaɛd uca ad tinid: ‘Xseɣ ad cceɣ aysum’, minzi immeẓri řeɛmar nnek ad yecc aysum, xenni ad tecced aysum anect n marra min imeẓri řeɛmar nnek. ^□  ■   21 Mařa tuɣa cek tiggʷejed x wemcan nni i ɣa ixḍar SIDI, AREBBI nnek, ḥima ad din issemten Isem nnes, xenni tzemmared ad tɣarṣed zeg ifunasen d tfunasin nnek u zeg wuǧi nnek nni d ac iwca SIDI, am mammec cek umureɣ, uca ad zzayes tecced daxeř i tewwura nnek anect n marra min dayes immeẓri řeɛmar nnek. 22 Am mammec ittwacc iɣayḍ n wezɣar d udad, amenni zzayes i ɣa tecced. Amexmuj d umezdag zemmaren ad zzayes ccen.

23 Mɣir war ttᵉtt ɛemmarṣ zeg idammen, minzi idammen d řeɛmar. War ttᵉtt řeɛmar ak-d weysum. 24 War ten tᵉttᵉttᵉd, maca ad ten tneɣřed x temmurt amecnaw aman. 25 War ggur ad ten tecced, ḥima ad tiřid cek mliḥ d iḥenjiren nnek awarni ac, xmi i ɣa tegged min iseggden zzat i tiṭṭawin n SIDI. 26 Ad tawyed mɣir timesřayin nni ɣarek qeddsent d tɣarṣa n lwaɛd nnek uca ad kidsent dd-tased ɣar wemcan i ɣa ixḍar SIDI 27 uca ad tesswejded tiɣarṣa n wecmaḍ, aysum nnes d idammen nnes, x uɛalṭar n SIDI, AREBBI nnek, uca idammen n tɣarṣa ad ttwazeǧɛen x uɛalṭar n SIDI, AREBBI nnek, maca iɛeddeř ad tecced aysum. 28 Ḥḍa u seř i marra awařen-a nni d ac umureɣ, ḥima ad tiřid mliḥ, cek d iḥenjiren nnek awarni ac i řebda, umi ɣa tegged min icnan d min iseggden di tiṭṭawin n SIDI, AREBBI nnek.

29 Xmi i ɣa iteḥḥa SIDI, AREBBI nnek, řegnus mani i ɣa traḥed ḥima ad ten teksid d řwart uca xenni cek ad ten teksid d řwart uca ad tzedɣed di temmurt nsen, 30 ḥḍa maḥend war tḍeffared awarni asen di texceft d ict, awarni ma ad ttwateḥḥan zzat i wudem nnek, uca ad tarzud x irebbiten nsen, ad tinid: ‘Am mammec sexxaren nitni i irebbiten nsen, ammu i ɣa ggeɣ uřa d necc.’ 31 War ttegg amenni i SIDI, AREBBI nnek, minzi marra min iǧan d jjɛifect i SIDI d min icarreh Netta, aqa ggin t nitni i irebbiten nsen. Ɛad sscemḍen iḥenjiren nsen d yessitsen di tmessi i irebbiten nsen.”