1 “Ad texsed SIDI, AREBBI nnek uca ad teḥḍid min d ac yumur Netta, tiweṣṣa nnes d lfarayiḍ nnes d řumurat nnes, marra ussan. 2 Ittxeṣṣa ad tessnem ass-a, necc war ssiwřeɣ ak-d iḥenjiren nwem, inni war tt issinen u war ẓrin ttarbiyyet n SIDI, AREBBI nwem, d řemɣaret nnes d ufus nnes ijehden d uɣiř nnes isswiẓẓḍen 3 d řeɛřamat nnes d timegga nnes nni igga di řwest n Miṣra, zzat i Firɛun, ajeǧid n Miṣra, u zzat i marra tammurt nnes:

4 min igga ak-d řɛeskar n Imiṣriyyen d iysan nsen d ikarruten nsen, mammec dd-yarra aman n Řebḥar n Telga ad feyyḍen x izeǧifen nsen umi kenniw ḍfaren. Aqa ihellek i-ten SIDI, ař ass-a,

5 d min igga akidwem di řexřa ařami tiwḍem ɣar wemcan-a,

6 d min igga ak-d Datan d Abiram, iḥenjiren n Iliyab, mmis n Rubin, mammec tarzem temmurt aqemmum nnes uca tsarḍ i-ten ak-d raǧ nsen d iqiḍan nsen d marra inni ten dd-iḍfaren deg iṣuraf nnes, di řwest n marra Israil. ^■  

7 Aqa tiṭṭawin nwem ẓrint marra timegga timeqqranin n SIDI nni tuɣa igga Netta.

8 Xenni ḥḍam marra tiweṣṣa nni d awem umureɣ ass-a, ḥima ad zzaysent tjehdem uca ad tadfem tammurt i ɣar i ɣa teẓwam, maḥend ad tt tᵉṭṭfem d řwart, uca xenni ad tt tᵉṭṭfem d řwart, 9 u ḥima ad ktaren wussan x temmurt tenni i ijjuǧ SIDI i ibabaten nwem ad asen tt-i-dd-iwc u i zzariɛet nsen, ict n temmurt ifeyyḍen s uɣi d tamment.

10 Minzi tammurt nni mani tᵉttraḥed ḥima ad tt tᵉṭṭfed d řwart, war teǧi am temmurt n Miṣra manis dd-teffɣem, mani tzarɛed zzariɛet nnek u tenni tesswed s iḍaren nnek, amecnaw ijj n weftis.

11 Tammurt i ɣar i ɣa teẓwam maḥend ad tt tᵉṭṭfem d řwart, aqa-tt d ict n temmurt n idurar d teysarin, tenni isessen aman n wenẓar zeg ujenna,

12 ict n temmurt i x iḥeṭṭa SIDI, AREBBI nnek, i x ǧant řebda tiṭṭawin n SIDI, AREBBI nnek, zi beddu n useggʷas ař aneggar n useggʷas.

13 Mařa tesřam nican i tweṣṣa inu, tinni d awem umureɣ ass-a, ḥima ad texsem SIDI, AREBBI nwem, uca ad as tsexxarem s marra uř nwem u s marra řeɛmar nwem, xenni ad imsar

14 aqa Necc ad wceɣ anẓar di temmurt nwem di řweqt nnes, anẓar n zic d uneggar, ḥima ad tessmuned irden nnek d binu nnek n jdid d zzect nnek n ṭṭri

15 uca Necc ad ac wceɣ arrbiɛ deg iyyar nnek i řebhayem nnek uca cek ad tecced u ad tejjiwned.

16 Ḥḍam war ittwasɣekkʷi wuř nwem uca ad teffɣem zeg webrid ad tsexxarem irebbiten nneɣni, ad asen taḍarem. ^■  

17 Iři xenni ad yareɣ weɣḍab n SIDI xawem uca ad iqqen ijenwan maḥend war iccit wenẓar ɛad u war tᵉttic temmurt ɛad ṣṣabet nnes u kenniw ad ttwaredǧem deɣya zi temmurt icnan nni d awem i ɣa iwc SIDI.

18 S uya ḥḍam awařen-a inu deg wuřawen nwem u di řeɛmar nwem u ad ten tbeysem am ict n řeɛřamet x ufus nwem, ad iřin d ifiřan n useggem x tiṭṭawin nwem ^■  

19 uca sřemdem ten i iḥenjiren nwem am xasen tessawařem xmi i ɣa tiřim di tudrin nwem u xmi i ɣa tiřid deg webrid u deg yiḍeṣ nnek u xmi i ɣa tiřid tfaqed, ^■   20 u arim ten x řeḍruf ɣar uɣezdis n tewwart n taddart nnek u x tewwura nnek 21 ḥima ad ktaren wussan nwem d wussan n iḥenjiren nwem x temmurt, tenni min xef ijjuǧ SIDI i ibabaten nwem ad asen ten-i-dd-iwc, am wussan n ujenna qqimen ktaren sennej i temmurt.

22 Minzi mařa teḥḍam nican marra tawṣeyyet-a nni d awem umureɣ ass-a maḥend ad tt teggem u maḥend ad texsem SIDI, AREBBI nwem, ad tuyurem deg ibriden nnes marra u ad ɣares dd-třeṣqem, 23 xenni SIDI ad issuffeɣ marra řegnus-a zzat i wudem nwem uca ammu i ɣa twartem tasɣart n řegnus imɣaren d ijehden xawem. 24 Marra amcan nni i ɣa teɛjen třeqqa n uḍar nwem ad yiři nwem. Zi řexřa u zi Lubnan u zeg yeɣzar, iɣzar n Lfuraṭ, ař řebḥar di řɣarb, ad yiři weymir n temmurt nnek. ^■   25 War izemmar uřa d ijj ad iqqim ibedd zzat i wudem nwem. SIDI, AREBBI nwem, ad igg tiggʷudi d řɛurret zzaywem x marra tammurt nni x i ɣa tɛejnem, am mammec tuɣa akidwem issiweř. ^■  

26 Xzar, necc ad ggeɣ ass-a lbaraka d nneɛřet zzat i wudem nwem:

27 lbaraka, mařa ad tesřem i tweṣṣa n SIDI, AREBBI nwem, tinni x d awem umureɣ ass-a,

28 d nneɛřet, mařa war tesřim i tweṣṣa n SIDI, AREBBI nwem, uca ad teggʷejem x webrid nni x d awem umureɣ ass-a, x minni i ɣa teḍfarem irebbiten nneɣni nni war tessinem ca.

29 Xmi SIDI, AREBBI nnek, ggur ad cek issidef di temmurt nni ɣar i ɣa traḥed ḥima ad tt tᵉṭṭfed d řwart, xenni ad tegged lbaraka x wedrar n Jirizim d nneɛřet x wedrar n Ɛibal. ^□  ■   30 Ma war ǧin x ujemmaḍ n L'Urdun, awarni i webrid, manis dd-tneqqar tfuct, di temmurt n Ikenɛaniyyen nni izeddɣen di Řewḍa, arendad n Jiljal, zzat i tcejjura n yigg n Mura? 31 Minzi kenniw ad teẓwam L'Urdun ḥima ad din tadfem u ḥima ad tᵉṭṭfem tammurt, tenni d awem i ɣa iwc SIDI, d řwart u kenniw ad tt twartem u ad dayes tzedɣem. 32 Ḥḍam xenni marra tiweṣṣa d lfarayiḍ nni d awem ssecneɣ ass-a.”