1 Di řweqt nni d ijjen inna ayi SIDI: ‘Nqec tnayen n teřwiḥin n weẓru amecnaw tinni timezwura uca geɛɛed-dd ɣari ɣar wedrar uca egg i cek ict n Ttabut n ukeccuḍ. ^■   2 Ad ariɣ di teřwiḥin awařen nni tuɣa di teřwiḥin timezwura nni tarzid uca ad tent tessarsed di Ttabut. 3 Necc ggiɣ ict n Ttabut n ukeccuḍ n ukasiya uca neqceɣ tnayen n teřwiḥin n weẓru amecnaw timezwura. Gaɛɛdeɣ ɣar wedrar s tnayen n teřwiḥin deg ufus inu. 4 Yura x teřwiḥin, anect n tira tamezwarut, ɛecra awařen nni tuɣa issiweř SIDI deg wass n wegraw n řgens x wedrar zi řwest n tmessi uca iwca i-tent ayi-dd SIDI. 5 Dewřeɣ-dd u hwiɣ-dd zeg wedrar uca ssarseɣ tiřwiḥin di Ttabut nni ggiɣ uca diha i ǧant ɛad, am mammec d ayi yumur SIDI.

6 Fesyen ayt n Israil iqiḍan nsen zi Abar-Bani-Yaɛqan, ffɣen ɣar Musira. Dinni immut Harun uca ittwanḍeř din. Mmis Aliɛazar idweř d akehhan deg wemcan nnes. ^■   7 Ssenni mmuṭṭiyen ɣar Judjud u zi Judjud ɣar Yuṭbata, tammurt n tɣezratin n waman. ^■   8 Di řweqt nni d ijjen iḥuzz SIDI taqbič n Lawi ḥima ad arbun Ttabut n Řɛahd n SIDI maḥend ad bedden zzat i wudem n SIDI, ad as sexxaren u ad barken deg Yisem nnes, ař ass-a. 9 S uyenni Lawi war ɣares tuɣi řa d ca řa d řwart ak-d aytmas. SIDI d řwart nnes, am mammec d as inna SIDI, AREBBI nnek. ^■  

10 Uca necc qqimeɣ x wedrar, amecnaw ussan imezwura, arebɛin n ussan d arebɛin n ǧiyaři uca isřa ayi SIDI ɛawed twařa aya, aqa SIDI tuɣa war ixs ad kenniw issexṣar. ^■  

11 Inna ayi SIDI: ‘Kkar, uyur deg webrid zzat i wudem n řgens, ḥima ad adfen tammurt, nni jjuǧeɣ ad asen tt-i-dd-wceɣ, ad tt ksin d řwart.’

12 Řexxu xenni, a Israil, min zzayek ittar SIDI, AREBBI nnek, mɣir ad teggʷeded SIDI, AREBBI nnek, ad tuyured deg ibriden nnes u ad t texsed uca ad tsexxared i SIDI, AREBBI nnek s marra uř nnek u s marra řeɛmar nnek, ^■  

13 uca ad teḥḍid řumurat n SIDI d tweṣṣa nni necc xak carḍeɣ ass-a i tizi nnek.

14 Xzar, ajenna d ujenna n ijenwan d marra min dayes i SIDI, AREBBI nnek i iǧan. ^■  

15 SIDI iqqen ixef nnes waha i ibabaten nnek ḥima ad ten ixs u Netta ixḍar zzariɛet nsen awarni asen, aqa d kenniw, zi marra řegnus, am teǧa ass-a.

16 Xetnem xenni i řeɛdařyet n wuř nwem, war sqessiḥem ca ɛad ktar uřawen nwem, ^■  

17 minzi SIDI, AREBBI nwem, d AREBBI x marra irebbiten d Sidi x marra isiditen, ijj n Arebbi imɣar d ujebbar d umeggʷed, nni war itteggen řfarz deg iwdan niɣ ikessi ccarḍ, ^■  

18 wenni itteggen tasegda i uyujiř d tajjač, wenni ittexsen abarrani u iwca as aɣrum d arruḍ.

19 Ittxeṣṣa ad texsem abarrani, minzi tuɣa kenniw d ibarraniyyen di temmurt n Miṣra. 20 Ad teggʷeded SIDI, AREBBI nnek, ad as tsexxared uca ad as třeṣqed u s Yisem nnes ad tejjaǧed. ^■   21 Aqa Netta d asebbaḥ nnek, uca Netta d AREBBI nnek, wenni ɣarek iggin řxedmet-a d tameqqrant uřa d marra timesřayin-a issaggʷaden tinni ẓrint tiṭṭawin nnek. 22 Ibabaten nwem hwan-dd s sebɛin n řeɛmur ɣar Miṣra uca řexxu igga i-c SIDI, AREBBI nnek, aṭṭas amecnaw itran n ujenna i iktaren.” ^■