1 “Seř, Israil, ass-a ad teẓwid L'Urdun maḥend ad tadfed tammurt, ḥima ad tekksed řwart n řegnus imɣaren u zeg inni xak ijehden, inni ɣarsen tineddam timeqqranin nni ttwafaryent ař ajenna, 2 ijj n řgens n iwdan izzugarten, ayt n Iɛanaqiyyen inni tessned ɛad u x yenni tesřid qqaren: ‘Wi i ɣa ibedd zzat i wudem n ayt n Iɛanaqiyyen?’ ^■   3 Sen xenni, aqa SIDI, AREBBI nnek nni izwaren zzat i wudem nnek. Netta d ict n tmessi ittetten, Netta ad ten iteḥḥa u ad ten isswaḍeɛ zzat i wudem nnek uca cek ad zzaysen tekksed řwart nsen u ad ten taredǧed deɣya am mammec ɣarek dd-issiweř SIDI. ^■  

4 Řami SIDI, AREBBI nnek, xasen yuẓẓeř zzatek, xenni war qqar deg wuř nnek, ad tinid: ‘SIDI issidef ayi-dd di ssibbet n tsegda inu maḥend ad ksiɣ tammurt-a d řwart’. Minzi di ssibbet n tuɛeffna n řegnus-a ad zzaysen ikkes SIDI řwart nsen zzat i wudem nnek, 5 war iǧi di ssibbet n tsegda nnek, war iǧi di ssibbet n řeṣfayet n wuř nnek, ad din traḥed ḥima ad teksid tammurt nsen d řwart, maca di ssibbet n tuɛeffna n řegnus-a ad zzaysen ikkes SIDI, AREBBI nnek, řwart nsen zzat i wudem nnek u ḥima ad iḥḍa awař nni zi ijjuǧ SIDI, AREBBI nnek, i ibabaten nnek, i Ibrahim d Isḥaq d Yaɛqub. ^■  

6 S uya i ɣa tessned, belli war iǧi di ssibbet n tsegda nnek i d ac iwca SIDI, AREBBI nnek, tammurt-a icnan maḥend ad tt teksid d řwart, minzi cek d ijj n řgens iɣennan. 7 Idar, u war ttᵉttu, belli teggid ad idduqqez weɣḍab n SIDI, AREBBI nnek, di řexřa. Zeg wass nni di teffɣed zi temmurt n Miṣra ařami dd-tudfed ɣar wemcan-a, tuɣa tɣewwɣem kenniw x SIDI. ^■   8 Minzi di Hurib teggim ad idduqqez weɣḍab n SIDI, ařami xawem isɛar SIDI ařami ixs ad kenniw iteḥḥa. ^■   9 Řami uřyeɣ ɣar wedrar ḥima ad ṭṭfeɣ tiřwiḥin n weẓru, tiřwiḥin n Řɛahd nni igga SIDI akidwem, qqimeɣ arebɛin n wussan d ǧiyaři deg wedrar. Aɣrum war t cciɣ, aman war ten swiɣ. ^■  

10 Iwc ayi SIDI tnayen n teřwiḥin n weẓru urint s uḍaḍ n AREBBI u daysent marra awařen nni tuɣa kiwem issiweř SIDI deg wedrar zi řwest n tmessi deg wass n wegraw n řgens. ^■  

11 Imsar ɣar uneggar n arebɛin n wussan d arebɛin n ǧiyaři, řami d ayi iwca SIDI tnayen n teřwiḥin n weẓru, tnayen n teřwiḥin n Řɛahd,

12 inna ayi SIDI: ‘Kkar, hwa deɣya ssa, minzi řgens nnek nni tnedhed zi Miṣra, aqa iḍeyyeɛ i-t. Weddaren deɣya abrid nni x ten weṣṣiɣ. Ggin i yixef nsen ijj n řexyař ifesyen.’

13 Issiweř SIDI akidi ɛawed, inna: ‘Necc ẓriɣ řgens-a, uca xzar, netta d ijj n řgens iqseḥ. ^■  

14 Ejj ayi ad ten teḥḥiɣ u ad mḥiɣ isem nsen zi swadday n ujenna, ad cek ggeɣ d ijj n řgens ijehden u imɣar x wanita.’ ^■  

15 Uca dewřeɣ-dd, hwiɣ-dd zeg wedrar. Tuɣa adrar yareqq di tmessi u tuɣa ɣari tnayen n teřwiḥin n Řɛahd di tnayen n ifassen inu.

16 Ẓriɣ, aqa da, kenniw texḍam ak-d SIDI, AREBBI nwem. Teggim i yixef nwem ijj n uyenduz ifesyen. Kenniw tiggʷejem deɣya x webrid nni x d awem yumur SIDI. ^□  

17 Xenni ṭṭfeɣ tnayen n teřwiḥin, nḍareɣ tent zi tnayen n ifassen inu, arẓiɣ tent zzat i tiṭṭawin nwem.

18 Wḍiɣ ɣar temmurt zzat i wudem n SIDI amecnaw amur amezwaru, arebɛin n wussan d arebɛin n ǧiyaři war cciɣ aɣrum u war swiɣ aman di ssibbet n ddnub i teggim umi teggim min iǧan d řɣar di tiṭṭawin n SIDI u umi t tesɛarem.

19 Minzi ggʷedeɣ zeg weɣḍab d wesɛar i zi tuɣa SIDI xawem iffugem u tuɣa ixs ad kenniw iteḥḥa. Maca SIDI isřa ayi ɛad twařa aya. 20 Tuɣa SIDI ɛawed isɛar aṭṭas x Harun ařami tuɣa ixs ad t iteḥḥa. Ẓẓuǧeɣ ɛawed di ṭṭweɛ n Harun di řweqt nni d ijjen. 21 Ddenb nwem, wenni d ayenduz nni teggim, ksiɣ t uca sscemḍeɣ t di tmessi, ceǧqeɣ t, haryeɣ t mliḥ, ařami idweř d ifsus am tɛejjajt uca nḍareɣ taɛejjact nnes di teɣzart nni dd-ihekkwan zeg wedrar. ^■  

22 Tanya di Tabɛira, di Massa u di Qabarut-Hata’awat tessffugmem SIDI. ^■   23 Uca umi kenniw issekk SIDI zi Qadac-Barniɛ, inna: ‘Ařyem u ṭṭfem tammurt d řwart, tammurt nni Necc d awem wciɣ!’, tuɣa kenniw ɛawed tɣewwɣem x řumur zeg uqemmum n SIDI, AREBBI nwem, war tuminem, war tesřim i tmijja nnes. ^■   24 Tuɣa kenniw tɣewwɣem x SIDI zeg wass nni kenniw ssneɣ.

25 Ɣenseɣ ixef inu zzat i wudem n SIDI, marra arebɛin n wussan d arebɛin n ǧiyaři nni, tuɣa ayi din ɣenseɣ zzat i wudem n SIDI, minzi SIDI inna, belli Netta ad kenniw iteḥḥa. 26 Ẓuǧeɣ i SIDI uca nniɣ: ‘A Sidi inu, SIDI, war tthellak řgens d řwart nnek nni tfekked s řemɣaret nnek, aqa Cek tnedhed ten zi Miṣra s ufus nnek ijehden.^■   27 Idar imsexxaren nnek, Ibrahim, Isḥaq d Yaɛqub, war xezzar ɣar tɣennant n řgens-a uřa ɣar tuɛeffna nnes d ddenb nnes, 28 ḥima, inni di temmurt i zi d aneɣ dd-tessuffɣed, war qqaren: Minzi SIDI war izemmar ad ten issidef di temmurt nni ten iwaɛd u minzi icarh i-ten, aqa issuffeɣ i-ten-dd maḥend ad ten ineɣ di řexřa. ^■   29 Aqa nitni d řgens nnek d řwart nnek nni dd-tessuffɣed s tzemmar nnek tameqqrant u s uɣiř nnek isswiẓẓḍen!’ ”