1 “Ad teḥḍam marra řumurat i zi d awem umureɣ ass-a, maḥend ad tent teggem, ḥima ad teddarem u ad temmarenyem uca ad tadfem tammurt, tenni ijjuǧ SIDI i ibabaten nwem, uca ad tt teksim d řwart. 2 Ad tidared marra abrid x mani cek igewwed SIDI, AREBBI nnek, arebɛin n iseggʷusa di řexřa ḥima ad cek isswaḍeɛ u ad cek iqeǧeb maḥend ad issen min din deg wuř nnek, ma ad teḥḍid řumurat nnes niɣ lla. 3 Netta isswaḍeɛ i cek u issřaẓ i cek u iwca ac ‘manna’ d macca, tenni war tessined ca cek uřa d ibabaten nnek war tt ssinen ca, ḥima ad ac isscen belli bnadem war itteddar s weɣrum waha, maca aqa bnadem itteddar s marra min dd-iffɣen zeg uqemmum n SIDI. ^■   4 Arruḍ nnek ɛemmarṣ war xak iwsar uřa d aḍar nnek war yuff ca di marra arebɛin n iseggʷusa aya. ^■  

5 Sen deg wuř nnek, belli SIDI, AREBBI nnek, aqa yarebba i cek, am mammec yarebba aryaz mmis 6 uca ḥḍa řumurat n SIDI, AREBBI nnek, ařami teǧid deg ibriden nnes u ařami zzayes tteggʷeded. 7 Minzi SIDI, AREBBI nnek, ad cek issidef deg ict n temmurt icnan,

ict n temmurt n tɣezratin d řɛunṣarat d waman yuǧɣen

nni dd-iffɣen zi teysart d wedrar,

8 ict n temmurt n irden d imendi d tzayarin d wartan n tazart d iremmamen,

ict n temmurt teccur s zzect n tzitunt u n tamment,

9 ict n temmurt mani i ɣa tecced aɣrum umi war din řexṣeṣ u war cek ittxeṣṣi ca dayes,

ict n temmurt, iẓra nnes ccuren s wuzzař

u zeg idurar nnes ad tneqced nnḥas.

10 Mařa teccid u tejjiwned, xenni ad tbarked SIDI, AREBBI nnek, x temmurt icnan nni d ac iwca. ^■  

11 Ḥḍa ixef nnek ḥima war tᵉttud SIDI, AREBBI nnek, ařami war teḥḍid řumurat nnes, lfarayiḍ nnes d tweṣṣa nnes nni d ac umureɣ ass-a,

12 ḥima war ittiři, mařa teccid u tejjiwned uca aqa tebnid tudrin icnan nni di teggid ad daysent tzedɣed,

13 uca ifunasen d tfunasin nnek d wuǧi nnek ttwamarnin u nnuqart d wureɣ nni ɣarek aqa ttwamarnin, u marra min ɣarek aqa ittwamarni,

14 ad tessgeɛɛded uř nnek, ad tᵉttud SIDI, AREBBI nnek, wenni cek dd-issuffɣen zi temmurt n Miṣra, zi taddart n tesmuɣi,

15 - d wenni cek dd-inedhen di řexřa imɣaren u issaggʷaden mani tuɣa ifiɣran yarɣin d tɣarḍmiwin uřa d tammurt ittfadan břa aman,

d wenni dd-issuffɣen aman zeg weẓru n sseǧaḥ, ^■  

16 d wenni d ac iwcin ‘manna’ i macca di řexřa, ‘manna’ nni war ssinen ibabaten nwem, ḥima ad cek isswaḍeɛ u ḥima ad cek iqeǧeb u ḥima ad ac igg tcuni ɣar uneggar -, ^■  

17 uca xenni ad tinid deg wuř nnek: ‘S tzemmar inu d jjehd n ufus inu ṭṭfeɣ marra řeksibet-a i yixef inu.’

18 Idar SIDI, AREBBI nnek aqa Netta d wenni iwca ac jjehd ḥima ad tkesbed ict n řeksibet temɣar maḥend ad imten ammu Řɛahd nnes nni tuɣa ijjuǧ i ibabaten nnek, am teǧa ass-a.

19 Mařa tiwḍed ad tᵉttud SIDI, AREBBI nnek, uca ad tuyured awarni i irebbiten nneɣni, ad asen tsexxared u ad asen taḍared, necc ass-a barrḥeɣ ac-dd, aqa ad tᵉttwahellkem s ttidet. 20 Ad tᵉttwahellkem am řegnus nni x yaẓẓeř SIDI zzat i wudem nwem, minzi war tesřim i tmijja n SIDI, AREBBI nwem.”