1 “Xmi SIDI, AREBBI nnek, ad cek issidef di temmurt mani i ɣa traḥed maḥend ad tt teksid d řwart, uca Netta ad yaẓẓeř zi zzatek aṭṭas n řegnus, Iḥittiyyen d Ijirjaciyyen d Imuriyyen d Ikenɛaniyyen d Ifiriziyyen d Iḥiwiyyen d Iyabusiyyen, sebɛa n řegnus mɣaren u jehden xak aṭṭas, ^■   2 uca SIDI, AREBBI nnek, ad ten isellem zzat i wudem nnek u cek ad ten tɣeřbed, xenni ittxeṣṣa ad ten tḥarrmed qaɛ i uteḥḥi. War kisen ttegg řɛahd u war d asen sscen řeḥnunect nnek. ^■   3 War teddikkwiřem d iḍeggʷařen ɛawed akidsen. War ttic yeǧic i mmis u war dd-ttawi yeǧis i mmic, ^■   4 minzi aya ad yarr mmic ad dd-idweř zi ḍeffar inu uca ad isexxar i irebbiten nneɣni uca ammu ad xawem yareɣ weɣḍab n SIDI uca ad kenniw iteḥḥa deɣya. 5 Ammu maca i ittxeṣṣa ad kisen teggem: ad thedmem iɛalṭaren nsen, ad tarẓam imayḍuten nsen iqeddsen u ad thedmen tirebbin nsen n cwarti uca ad tesscemḍem řexyařat nsen ineqcen n ukeccuḍ s tmessi. ^■   6 Minzi cek d ijj n řgens iqeddes i SIDI, AREBBI nnek. SIDI, AREBBI nnek, wenni cek ifarzen ḥima ad as tiřid d ijj n řgens iɣřan x marra řegnus nni yeǧan x wudem n temmurt. ^■  

7 SIDI war d awem iggi tasɣunt n tayri u war kenniw ixḍar umi tuɣa kenniw d aṭṭas zi marra řegnus, minzi tuɣa kenniw teswam qell jar marra řegnus, 8 maca tayri n SIDI i kenniw d uḥeṭṭu nnes x tjaǧit nni ijjuǧ i ibabaten nwem, aqa d ina i zi kenniw dd-issuffeɣ SIDI s ufus ijehden u d ina i zi cek issenjem zi taddart n tesmuɣi, zeg ufus n Firɛun, ajeǧid n Miṣra. ^■   9 Ssen xenni, belli SIDI, AREBBI nnek, d AREBBI, aqa Netta d Arebbi amtiqqi wenni iḥeṭṭan Řɛahd d tmexsiwt icewwaren zi jjihet n yinni t ittexsen uca ḥeṭṭan řumurat nnes, ař jjiř wiss ařef, ^■  

10 maca marra wi t icarrhen deg uɣembub nnes, aqa Netta ad ten ixeǧeṣ. War ggur ad icekk maḥend ad ixeǧeṣ wenni t icarrhen deg uɣembub nnes. ^■  

11 Ḥḍa xenni řumurat d tweṣṣa d lfarayiḍ nni d ac umureɣ necc ass-a maḥend ad zzaysent tegged.

12 Ad imsar, umi tesřim i lfarayiḍ-a uca ad tent teḥḍam am tent i ɣa teggem, aqa SIDI, AREBBI nnek, ad ac ibedd x Řɛahd d tamexsiwt icewwaren nni x tuɣa ijjuǧ i ibabaten nnek. ^■  

13 Netta ad cek ixs, ad cek ibarek u ad cek yarr deg waṭṭas. Ad ibarek řɣiǧet n uɛeddis nnek d řɣiǧet n temmurt nnek, irden nnek, binu nnek n jdid, zzect nnek n ṭṭri, tarrawt n tfunasin nnek d tyumi n wuǧi nnek, di temmurt nni tuɣa ijjuǧ ad tt iwc i ibabaten nwem.

14 Aqa cek tᵉttwabarked jar řegnus! War dayek ittɣimi ɛad ḥed i war dd-ittejjin uřa d tenni war ittiriwen, uca ammu uřa di řebhayem nnek. ^■  

15 Ad zzayek ikkes SIDI marra řehřac u war cek iřeqqef uřa s ca n řehřacat iɛeffanen i ɣarek ittwassnen zi Miṣra u ad tent issiweḍ x marra inni i cek icarrhen.

16 Ad tecced marra řegnus nni d ac i ɣa iwc SIDI, AREBBI nnek. Tiṭṭ nnek war xasen tᵉttḥinni ca u irebbiten nsen war ten tsexxared, minzi aya ad yiři d taxceft i cek.

17 Mařa tennid deg wuř nnek: ‘Řegnus-a mɣaren xafi, mammec i ɣa zemmareɣ ad zzaysen kkseɣ ɛemmarṣ řwart nsen?’,

18 xenni war zzaysen tteggʷed. Xarreṣ mliḥ di min igga SIDI, AREBBI nnek, ak-d Firɛun u ak-d marra Imiṣriyyen,

19 xarreṣ di tqeǧabin imɣaren nni teẓrid s tiṭṭawin nnek u di řeɛřamat d lmuɛjizat d ufus ijehden d uɣiř isswiẓẓḍen ak-d wi cek dd-issuffeɣ SIDI, AREBBI nnek. Ammu i ɣa yegg SIDI, AREBBI nnek, s marra řegnus i zi tteggʷeded. ^■   20 SIDI, AREBBI nnek, ad issekk irezzan iḍarɣařen jar asen, ař ɣa ttwahellken ɛawed inni iqqimen, inni ittwasnuffaren zzatek. ^■   21 War tteggʷed zzat i wudem nsen, minzi SIDI, AREBBI nnek, aqa-t di řwest nnek, aqa-t d Arebbi imɣaren u issaggʷaden. 22 SIDI, AREBBI nnek, ad issuffeɣ řegnus-a zzatek cwayt cwayt. War izemmar ad xasen teqḍid deɣya, mařa lla ad mmarenyen řewḥuc deg iyyar aṭṭas xak. 23 SIDI, AREBBI nnek, ad ten isellem zzat i wudem nnek u ad ten issxarweḍ s yijj n uxarweḍ imɣar ař ɣa ttwateḥḥan. 24 Ad isellem ijeǧiden nsen deg ufus nnek uca ad temḥid isem nsen zi sadu ajenna. Uřa d ijj weryaz war izemmar ad ibedd zzat i wudem nnek ař ten ɣa tᵉtteḥḥid. 25 Řexyařat ineqcen ad tent tesscemḍed s tmessi. Nnuqart d wureɣ i xasent iǧan war dayes ɛecceq u war t kessi i yixef nnek, ḥima war zzayes tᵉttxarwiḍed, minzi aya d ict n jjɛifect i SIDI, AREBBI nnek. 26 War ttiwi ict n jjɛifect am ta ɣar taddart nnek, mařa lla ad tdewřed s yixef nnek d ict n řqecɛet n řeḥram. Ad zzayes tɛiffed aṭṭas u ad ac tiři d tamennɛit, minzi aqa-tt d ict n řqecɛet n řeḥram.”