1 “Tina d tiweṣṣa d lfarayiḍ nni yumur SIDI, AREBBI nwem, maḥend ad awem tent ssřemdeɣ, ḥima ad zzaysent teggem di temmurt i ɣar i ɣa teẓwam maḥend ad tt teksim d řwart, 2 ḥima ad teggʷded SIDI, AREBBI nnek, uca ad teḥḍid marra tiweṣṣa nnes d řumurat nnes nni d ac umureɣ, cek d mmic d mmis n mmic, marra ussan n tudart nnek, ḥima ussan n tudart nnek ad zzuggarten. 3 Seř, a Israil, ḥḍa ad zzaysent tegged, ḥima ad tiřid mliḥ u ḥima kenniw ad temmarnim s waṭṭas di temmurt nni ifeyyḍen s uɣi d tamment, am mammec tuɣa inna SIDI, AREBBI n ibabaten nnek.

4 Seř, a Israil, SIDI, AREBBI nneɣ, SIDI d ijj. ^■   5 Ad texsed SIDI, AREBBI nnek, s marra wuř nnek u s marra řeɛmar nnek u s marra jjehd nnek.^■  

6 Awařen-a nni d ac umureɣ ass-a, ad iřin deg wuř nnek. 7 Ad ten tessiggzed i iḥenjiren nnek uca ad xasent tessiwřed xmi i ɣa teqqimed di taddart nnek u xmi i ɣa tuyured deg webrid u xmi i ɣa tᵉṭṭṣed u xmi i ɣa tekkared.^■   8 Ad ten tbeysed am ict n řeɛřamet deg ufus nnek, ad iřint amecnaw ijj n ufiřu n useggem jar tiṭṭawin nnek. 9 Uca ad ten tarid x řeḍruf ɣar uɣezdis n tewwart n taddart nnek u di tewwura nnek.

10 Uca ad imsar, belli SIDI, AREBBI nnek, ad ac-dd-yawi di temmurt i x ijjuǧ i ibabaten nwem, i Ibrahim d Isḥaq d Yaɛqub, maḥend ad ac tt-i-dd-iwc, s tneddam imɣaren icnan nni war tebnid cek

11 u s tudrin iccuren s marra řxar i zi war tent teccured cek, u s teɣzin nni cek war teɣzid, u s tzayarin d tzemmurin nni war teẓẓud cek. Uca xmi i ɣa tecced u ad tejjiwned, ^■  

12 ḥḍa xenni maḥend war ttᵉttud SIDI wenni cek dd-issuffɣen zi temmurt n Miṣra, zi taddart n tesmuɣi.

13 Ad teggʷded SIDI, AREBBI nnek, ad t tɛebded u s Yisem nnes ad tejjaǧed.^■  

14 War ggurem awarni i irebbiten nneɣni zi irebbiten n řegnus i d awem dd-innḍen

15 - minzi SIDI, AREBBI nwem d ijj n Arebbi ittasmen di řwest nnek - ḥima war xak yareqq weɣḍab n SIDI, AREBBI nnek, uca ad cek iteḥḥa zeg wudem n temmurt.

16 War ttqeǧabem ca SIDI, AREBBI nwem, am mammec t tqeǧbem di Massa. ^■  

17 Ad teḥḍid nican řumurat n SIDI, AREBBI nwem uřa d cchadat nnes d tweṣṣa nnes nni d ac yumur.

18 Egg min iǧan iseggden d min icnan di tiṭṭawin n SIDI, ḥima ad tiřid mliḥ u ḥima ad tadfed ɣar temmurt icnan i zi ijjuǧ SIDI i ibabaten nnek.

19 ḥima ad taẓẓřed x marra řɛedyan zzat i wudem nnek, am mammec issiweř SIDI.

20 Xmi cek i ɣa isseqsa mmic, ad yini: ‘Min teɛna cchadat d tweṣṣa d lfarayiḍ nni d awem yumur SIDI, AREBBI nneɣ?’, 21 xenni ad tinid i mmic: ‘Neccin tuɣa aneɣ d isemɣan n Firɛun di Miṣra, maca SIDI issuffeɣ aneɣ-dd zi Miṣra s ufus ijehden. 22 SIDI igga, qibač i tiṭṭawin nneɣ, řeɛřamat d lmuɛjizat imɣaren d issiggʷden di Miṣra, ɣar Firɛun u ɣar marra taddart nnes. 23 Uca issuffeɣ aneɣ-dd ssenni ḥima ad aneɣ issidef maḥend ad aneɣ yewc tammurt nni x ijjuǧ i ibabaten nneɣ. 24 SIDI yumur aneɣ ad negg ɛlaḥsab marra tiweṣṣa-ya, ad neggʷed zi SIDI, AREBBI nneɣ, kuř ass, di ṭṭweɛ n tizi nneɣ ḥima ad neddar am teǧa ass-a. 25 Man aya ad yiři d tasegda nneɣ xmi i ɣa neḥḍa maḥend ad negg marra řumurat-a zzat i wudem n SIDI, am mammec i d aneɣ yumur Netta.’ ”