5
1 Iřaɣa Musa i marra Israil uca inna asen: “Sřem, a Israil, i tweṣṣa d lfarayiḍ inni ssiwřeɣ necc ass-a deg imezzuɣen nwem, ḥima ad tent třemdem u ad tent teḥḍam maḥend ad zzaysent teggem. 2 SIDI, AREBBI nneɣ, igga ijj n Řɛahd akidneɣ di Ḥurib. ■ 3 War iǧi ak-d ibabaten nneɣ i igga AREBBI Řɛahd-a, maca akidneɣ, neccin inni da ibedden ddaren marra ass-a. 4 Udem ak-d wudem issiweř SIDI akidwem x wedrar, zi řwest n tmessi 5 - tuɣa ayi di řweqt nni beddeɣ jar SIDI d kenniw ḥima ad kenniw ssaregbeɣ x wawař n SIDI, minzi tuɣa kenniw teggʷdem zi tmessi u war tgeɛɛadem ca ɣar wedrar - uca Netta inna: ■ 6 ‘Necc d SIDI, AREBBI nnek, wenni cek-dd issuffɣen zi temmurt n Miṣra, zi taddart n tesmuɣi. ■ 7 War ɣarek ttiřin ca n irebbiten nneɣni zzat i wudem inu. 8 War ttegg i yixef nnek ijj n řexyař ineqcen niɣ min ma ṣṣiffet n min din iǧan sennej deg ujenna niɣ swadday x temmurt niɣ deg waman sadu temmurt. 9 War ggur ad asen taḍared u ad ten tsexxared, minzi Necc, SIDI, AREBBI nnek, d ijj n Arebbi ittasmen, wenni dd-yarezfen řmuɛṣiyyet n ibabaten deg iḥenjiren ař jjiř wiss třata u wiss arebɛa n yinni d ayi icarrhen, ■
10 d wenni issecnen tamexsiwt icewwaren i řuřuf n yinni d ayi ittexsen u ḥeṭṭan tiweṣṣa inu.
11 War neṭṭeq s Yisem n SIDI, AREBBI nnek, di řbaṭeř, minzi SIDI war ittbarri wenni i ɣa ineṭqen s Yisem nnes di řbaṭeř. ■
12 Ḥḍa ass n ssebt ḥima ad t tessqeddsed am mammec d ac yumur SIDI, AREBBI nnek. ■
13 Setta n wussan ad txedmed, ad tegged marra řxedmet nnek,
14 maca ass wiss sebɛa d wass n ssebt n SIDI, AREBBI nnek. War dayes tᵉttegged uřa d ict n řxedmet, cek d mmic d yeǧic d yismeɣ nnek d tayya nnek d ufunas nnek d weɣyuř nnek d řebhayem nnek uřa d abarrani nni akik iǧan daxeř i tewwura nnek, ḥima ismeɣ nnek d tayya nnek ad areyyḥen am cek.
15 Ad tɛeqřem belli tuɣa cek d ismeɣ di temmurt n Miṣra u SIDI, AREBBI nnek, aqa issuffeɣ i cek-dd ssenni s yijj n ufus ijehden d ijj n uɣiř isswiẓẓden. S uyenni yumur cek SIDI, AREBBI nnek, ad teḥḍid ass n ssebt.
16 Weqqar babac d yemmac, am mammec i d ak yumur SIDI, AREBBI nnek maḥend ussan n tudart nnek zemmaren ad zzuggarten uca ad iffeɣ umeddur nnek mliḥ di temmurt i d ac ɣa iwc SIDI, AREBBI nnek. ■
17 War neqq. ■
18 War zenna. ■
19 War ttacar.
20 War cehhed s ẓur ḍidd i umqarreb nnek. 21 War ttegg meẓri di temɣart n umqarreb nnek u war ḍemmeɛ di taddart n umqarreb nnek, niɣ deg iyyar nnes, niɣ deg yismeɣ nnes, niɣ di tayya nnes, niɣ deg ufunas nnes, niɣ deg weɣyuř nnes, niɣ di ca zi marra min iǧan ɣar umqarreb nnek.’ ■
22 Issiweř SIDI awařen-a ak-d marra agraw nwem n řgens s ict n tmijja ijehden x wedrar, zi řwest n tmessi, zeg iseynuten u zeg useynu ibbumbes u war immarni ca ktar. Yuri ten x tnayen n teřwiḥin n weẓru uca iwca i-tent i necc. 23 Uca imsar, umi tesřim kenniw i tmijja zi řwest n taǧest uca adrar icemmeḍ s tmessi, aqa tqarrbem-dd ɣari, marra izeǧifen n tqebbař nwem d imɣaren nwem, 24 tennam ayi: ‘Xzar, SIDI, AREBBI nneɣ, isscen aneɣ-dd aɛuǧi nnes d řemɣaret nnes uca nesřa i tmijja nnes zi řwest n tmessi. Ass-a neẓra belli SIDI issiweř ak-d bnadem uca wa iqqim iddar. 25 Řexxu xenni, mayemmi i ɣa nemmet? Minzi timessi aya imɣaren ad aneɣ tecc. Mařa neqqim nettesřa i tmijja n SIDI, AREBBI nneɣ, ad nemmet. 26 Minzi man wen i yeǧan jar marra min ɣares arrimet, wenni isřan i tmijja n AREBBI iddaren tessiweř-dd zi řwest n tmessi am neccin, d wenni iddaren ɛad? ■ 27 Ad dd-tqarrbed cek u ad tesřed ɣar marra min ɣa yini SIDI, AREBBI nneɣ, uca xenni ad tessiwřed cek akidneɣ x marra min d ac ɣa issiweř SIDI, AREBBI nneɣ, u neccin ad as nseř uca ad zzayes negg.’ ■
28 Isřa SIDI i tmijja n wawařen nwem umi kidi tessiwřem uca inna ayi SIDI: ‘Sřiɣ i tmijja n wawařen n řgens-a, awařen nni kik ssiwřen. Aqa ggin mliḥ umi kik ssiwřen marra aya. 29 Iři ad asen immewc ijj n wuř ammu maḥend ad ayi ggʷeden uca ad ḥḍan tiweṣṣa inu marra ussan qaɛ ḥima nitni d warraw nsen ad iřin mliḥ i řebda! 30 Ruḥ, tinid asen: Dewřem-dd ɣar iqiḍan nwem! 31 Uca cek, bedd da kidi, ḥima ad akidek ssiwřeɣ tiweṣṣa d lfarayiḍ nni d asen ɣa tessřemded ḥima ad zzaysent ggen di temmurt nni i d asen ɣa wceɣ d řwart.’ 32 Ḥḍam ḥima ad teggem am mammec i d awem yumur SIDI, AREBBI nwem, war ttḥeyydem x man aya, war iǧi ɣar yeffus uřa ɣar uzeřmaḍ. 33 Ad tuyurem marra abrid nni d awem yumur SIDI, AREBBI nwem, ḥima ad teddarem uca ad tiřim mliḥ u ḥima ad zzuggarten ussan nwem di temmurt nni i ɣa teksim d řwart.’ ”