1 “Xenni řexxu, a Israil, seř ɣar tweṣṣa d lfarayiḍ nni d awem sseřmadeɣ maⱨend ad tent teggem ḥima ad teddarem uca ad tadfem tammurt nni d awem i ɣa iwc SIDI, AREBBI n ibabaten nwem, uca ad tt twartem. ^■   2 War arennyem ɣar wawař i d awem ɣa umureɣ u war zzayes ttekksem, ḥima ad tiřim tᵉṭṭfem di tweṣṣa n SIDI, AREBBI nwem, tinni zi d awem ttumureɣ. ^■   3 Tiṭṭawin nwem ẓrint min igga SIDI ak-d Baɛl-Faɣur, minzi marra aryaz nni iḍeffaren Baɛl-Faɣur, aqa iteḥḥa i-t SIDI, AREBBI nwem, zi řwest nwem. ^■   4 Maca kenniw, inni iřessqen ɣar SIDI, AREBBI nwem, aqa kenniw marra teddarem ɛad ass-a. 5 Xzarem, necc ssřemdeɣ awem tiweṣṣa d lfarayiḍ am mammec d ayi yumur SIDI, AREBBI inu, ḥima ad zzaysent teggem di temmurt i ɣar i ɣa tadfem maḥend ad tt twartem. 6 Ṭṭfem daysent u ggem tent, minzi ta ad tiři tiɣit nwem d řeɛqeř nwem zzat i tiṭṭawin n řegnus nni i ɣa isřen marra tiweṣṣa aya. Xenni ad inin nitni: ‘Řgens-a ameqqran wanita d tidett d ijj n řgens d amiɣis u s řeɛqeř!’ ^□   7 Minzi man řgens imɣaren i da iǧan, aqa ɣares arebbi yudsen am SIDI, AREBBI nneɣ, řebda xmi xas nettřaɣa? ^■   8 U man řgens da iǧan imɣar, aqa ɣares tiweṣṣa d lfarayiḍ iseggmen amecnaw marra Ccariɛa aya nni d awem ɣa wceɣ ass-a?

9 Maca ḥḍa x yixef nnek uca ṭṭef nican acbar x řeɛmur nnek ḥima war tᵉttud min ẓrint tiṭṭawin nnek u ḥima timesřayin-a war dd-tteffɣent ca zeg wuřawen nnek. Ittxeṣṣa ad tent tessargbed i iḥenjiren nnek u i iḥenjiren n iḥenjiren nnek. ^■  

10 Ass min di tuɣa tbedded ɣar wedrar n Ḥurib zzat i wudem n SIDI, AREBBI nnek, řami d ayi inna SIDI: ‘Smun ɣari řgens-a, xenni Necc ad ten arreɣ ad sřen awařen inu maḥend ad ten ssřemden ḥima ad zzayi ggʷeden marra ussan nni iddaren di temmurt uca ḥima ad ten ssřemden i iḥenjiren nsen.’

11 Xenni tqarrbem-dd kenniw uca tbeddem ɣar iḍaren n wedrar uca adrar yarɣa ařami timessi nnes tiweḍ ɣar řwest n ujenna, uca xenni aqa din taǧest d iseynuten d yijj n useynu ibbumbes. ^□  ■  

12 Xenni issiweř SIDI akidwem zi řwest n tmessi. Kenniw tesřim i řḥess n wawařen, maca war teẓrim ca addud nnes, mɣir ict n tmijja umi tesřim waha.

13 Netta issargeb kenniw x Řɛahd nnes nni yumur ad t teggem, ɛecra n wawařen. Yura ten di tnayen n teřwiḥin n weẓru.

14 I necc ɛawed yumur SIDI di řweqt nni maḥend ad kenniw ssřemdeɣ tiweṣṣa d lfarayiḍ maḥend ad zzaysent teggem di temmurt i ɣar i ɣa teẓwam ḥima ad tt twartem.

15 Ḥḍam nican x řeɛmur nwem, minzi kenniw war teẓrim uřa d ijj n waddud deg wass umi akidwem issiweř SIDI x wedrar n Ḥurib zi řwest n tmessi!

16 War ttessefsadem ixef nwem umi ɣa teggem i yixef nwem ijj n řexyař ineqcen, addud n ca n ijj n ṣṣanam, addud n ca n ijj n wewtem niɣ n ict n tewtemt,

17 ijj n waddud n ca n ijj n umuddar nni iǧan x temmurt, niɣ ijj n waddud n ca n ijj n wejḍiḍ s wefriwen i iṭṭawen deg ujenna,

18 niɣ ijj n waddud n ca n ijj n umuddar nni ittbuɛen x temmurt, niɣ ijj n waddud n ca n ijj n wesřem nni iǧan deg waman sadu temmurt,

19 u ɣarek ad tessgeɛɛded tamuɣři nnek ɣar ujenna uca xenni ad tẓared tafuct d uyur d itran, marra řɛeskar n ujenna, uca xenni ad ttwaɛarrned ad asen taḍared uca ad asen tɛebded i nitni inni ibḍa SIDI, AREBBI nnek, i marra řegnus sadu marra ajenna. 20 SIDI aqa iqbeř i kenniw uca issuffeɣ i kenniw-dd zeg ufarran n wuzzař, zi Miṣra, ḥima ad as tiřim d ijj n řgens i iwart netta, am teǧa ass-a. ^■  

21 Ɛawed isɛar xafi SIDI di ssibbet n wawařen nwem uca ijjuǧ belli war ɛedduɣ L'Urdun u war ttidfeɣ tammurt iṣebḥen nni d ac i ɣa iwc SIDI, AREBBI nnek, d řwart, ^■   22 minzi necc ad mmteɣ di temmurt-a, war ẓekkʷiɣ ca L'Urdun. Kenniw ad teẓwam uca ad tᵉṭṭfem tammurt-a icnan. 23 Ḥḍam war tᵉttum Řɛahd n SIDI, AREBBI nwem wenni iggin akidwem uca ḥḍam war tteggem i yixef nwem ijj n řexyař ineqcen n ca n ict n řḥajjet nni d ac iḥarrem SIDI, AREBBI nnek. 24 Minzi SIDI, AREBBI nnek, aqa-t d ict n tmessi ittetten, d ijj n Arebbi ittasmen. ^■  

25 Xmi i ɣa tarwem arraw d ayyawen uca ad tewsarem di temmurt uca xenni ad tdeǧmem ixef nwem, ad teggem ijj n řexyař ineqcen, ṣṣiffet n ca n řḥajjet uca ad teggem řɣar di tiṭṭawin n SIDI, AREBBI nwem umi i t ɣa tesɛarem ammu, 26 xenni necc ass-a ad řaɣiɣ x ujenna d temmurt d řechud xawem, aqa kenniw ad tᵉttwahellkem deɣya s tidett di temmurt i ɣar i ɣa teẓwam ɣar L'Urdun maḥend ad tt teksim d řwart. War dayes tᵉttɣimim kenniw ca n wussan ktar ɛad, minzi ad tᵉttwateḥḥam qaɛ. 27 SIDI ad kenniw ibezzeɛ jar řegnus uca ad zzaywem iqqim ijj n wuru n yeryazen waha jar řegnus mani kenniw i ɣa indeh SIDI. ^■   28 Din ad tsexxarem irebbiten nni ittwaggen s ifassen n bnadem s ukeccuḍ d weẓru, inni war ittwařin, war ittesřin, war ittetten u war ittcemman. ^■  

29 Xenni ad tarzum ssenni SIDI, AREBBI nnek, u cek ad t tafed, mařa tarezzud xas s marra uř nnek d marra řeɛmar nnek. ^□   30 Mařa cek di řeḥṣaret uca ad ɣarek dd-asen marra awařen-a deg uneggaru n wussan, xenni ad dd-tdewřed ɣar SIDI, AREBBI nnek, u ad tesřed i tmijja nnes, 31 minzi SIDI, AREBBI nnek, d ijj n AREBBI yareḥḥmen, war cek ittejji u war cek ittareddeǧ. War ittettu Řɛahd n ibabaten nnek nni d asen ijjuǧ.

32 Seqsa xenni x wussan iɛdun nni iǧan qbeř i cek, zeg wass min di igga AREBBI bnadem x temmurt, seqsa zi ṭṭarf n ujenna ɣar ṭṭarf nneɣni n ujenna, ma ɛemmarṣ ma temsar ca n řḥajjet temɣar anect n tanita niɣ ittwaseř ca am manaya? 33 Ma ɛemmarṣ ma isřa ca n řgens tmijja n AREBBI tessiweř zi řwesṭ n tmessi, am mammec tt ttesřid cek, uca waxxa amenni iqqim iddar? 34 Niɣ ma iqeǧeb ɛemmarṣ ijj n arebbi ad dd-yas ad iksi i yixef nnes ijj n řgens zi řwest n ijj n řgens nneɣni s tjarribin, s řeɛřamat, s lmuɛjizat, s umenɣi, s ufus ijehden, s uɣiř isswiẓẓḍen u s tmegga ssiggʷident mɣarent, amecnaw marra min igga SIDI, AREBBI nwem, zzat i tiṭṭawin nwem di Miṣra? 35 Aqa i cek umi dd-ittwassban aya, ḥima ad tessned belli SIDI d AREBBI i iǧa. War din ca nneɣni mɣir Netta.^■   36 Zeg ujenna igga ad tesřed i tmijja nnes ḥima ad cek inebbeh u x temmurt aqa isscen ac timessi nnes imɣaren u aqa tesřid awařen nnes zi řwest n tmessi. 37 Minzi Netta tuɣa ixs ibabaten nnek, u ifarz zzariɛet nnes awarni as, aqa issuffeɣ i cek-dd s Wudem nnes zi Miṣra s jjehd nnes imɣaren ^■   38 ḥima ad yaẓẓeř x řegnus imɣaren d yinni xak ijehden zzat i wudem nnek u ḥima ad cek dayes issidef u ad ac iwc tammurt nsen d řwart, am mammec i teǧa ass-a. 39 Xenni ssen ass-a uca xarreṣ x man aya deg wuř nnek belli SIDI d AREBBI i yeǧa, sennej deg ujenna u swadday di temmurt, war din ḥed nneɣni! 40 Ṭṭef di tweṣṣa nnes u di řumurat nnes tinni d ac umureɣ ass-a ḥima ad iffeɣ umeddur mliḥ i cek u i iḥenjiren nnek awarni ac uca ad teqqimed ussan ktar di temmurt i d ac i ɣa iwc SIDI, AREBBI nnek, marra ussan.”

41 Xenni ifarz Musa třata n tneddam x ujemmaḍ n L'Urdun manis dd-tneqqar tfuct, ^■   42 ḥima ad din yařwer uqettař nni inɣin, břa ma ad as igg řeḥsab, amqarreb nnes wenni umi war icarrhen ɛemmarṣ iḍennaḍ uřa d fariḍennaḍ. Wanita izemmar ad yarweř ɣar ict zi tneddam-a ařami iqqim iddar netta. 43 Baṣir di řexřa, di řwaṭa yuɛřan, i Rubiniyyen u Ramut di Jilɛad i Ijadiyyen u Julan d Bacan i Imanassiyyen. ^■  

44 Ta d Ccariɛa nni igga Musa zzat i ayt n Israil. 45 Ina d cchadat d tiweṣṣa d lfarayiḍ nni issiweř Musa ɣar ayt n Israil umi dd-ffɣen zi Miṣra. 46 Aya tuɣa x ujemmaḍ n L'Urdun, di teɣzurt arendad n Bayt-Faɣur, di temmurt n Siḥun, ajeǧid n Imuriyyen, wenni tuɣa izeddɣen di Ḥacbun, wenni x iɣřeb Musa ak-d ayt n Israil umi dd-ffɣen zi Miṣra. ^■   47 Aqa ksin tammurt nnes am řwart uřa d tammurt n Ɛuj, ajeǧid n Bacan, timmura n tnayen n ijeǧiden n Imuriyyen nni tuɣa zeddɣen x ujemmaḍ n L'Urdun manis dd-tneqqar tfuct, ^■   48 zi Ɛaruɛir nni iǧan ɣar tma n teɣzart n Arnun ař wedrar n Siyun nni iǧan d wedrar n Ḥirmun, 49 d marra řewḍa x ujemmaḍ n L'Urdun, ɣar ccarq, ař řebḥar n Řewḍa nni iǧan wadday n teysarin n wedrar n Fisja.