1 “Xmi SIDI, AREBBI nnek, i ɣa iteḥḥa řegnus i zzaysen i d ac ɣa iwc, SIDI, AREBBI nnek, tammurt uca xenni ad teksid řwart nsen uca ad tzedɣed di tneddam nsen u di tudrin nsen, 2 xenni ittxeṣṣa cek ad tḥuzed i yixef nnek třata n tneddam di řwest n temmurt i d ac ɣa iwc SIDI, AREBBI nnek, maḥend ad tt teksid d řwart. ^■   3 Ad tɛedřed ijj n webrid uca tammurt, tenni i d ac ɣa iwc SIDI, AREBBI nnek, d řwart, ad tt tebḍid x třata n tseqqar. Man aya ḥima kuř aqettař izemmar ad din yarweř.

4 D wa d amtawi i zi iɛeddeř i uqettař maḥend ad din yarweř, ḥima ad iqqim iddar: mařa inɣa amqarreb nnes břa ma ad as igg řeḥsab u tuɣa war t icarreh ca iḍennaḍ d fariḍennaḍ. ^□  ■  

5 Wenni iruḥen ak-d umqarreb nnes ɣar wezɣar ḥima ad iqess akeccuḍ uca iswiẓẓeḍ afus nnes s ccaqur ḥima ad iḥarwec akeccuḍ uca xenni iffeɣ as wuzzař n ccaqur uca iřqef amqarreb nnes uca wanita immut, aqa wanita izemmar ad yarweř ɣar icten zi n tneddam-a maḥend ad iqqim iddar, ^□   6 ḥima war ittiři uneqqam n idammen ad iḍfar aqettař, xmi i ɣa iɣeřɣeř wuř nnes uca ad xas iḥart mařa abrid d azirar uca ad t ineɣ am war xas iǧi řeḥkam s řmewt, minzi tuɣa war t icarh, war iǧi zeg iḍennaḍ uřa zi fariḍennaḍ. 7 S uya necc umureɣ cek, qqareɣ: ‘Ḥuz třata n tneddam i yixef nnek.’

8 Uca mařa SIDI, AREBBI nnek ad iwesseɛ tammurt nnek, am mammec ijjuǧ i ibabaten nnek, u ad ac iwc marra tammurt nni iwaɛed ad tt iwc i ibabaten nnek, ^■   9 - mařa ad teḥḍid marra tawṣeyyet-a maḥend ad tt tegged am mammec d ac umureɣ ass-a ḥima ad texsed SIDI, AREBBI nnek, uca ad tuyured deg ibriden nnes marra ussan - , xenni ad tarnid ɛad třata n tneddam ɣar třata-ya, ^■  

10 ḥima war ttwasizzřen idammen imezdagen di řwest n temmurt nnek tenni d ac i ɣa iwc SIDI, AREBBI, d řwart uca ad xak iřin idammen.

11 Maca mařa ca n weryaz icarh amqarreb nnes uca iqabeř i-t uca ikkar ɣares u xenni igga as ict n tecti uca immut, xenni yarweř ɣar icten zi tneddam nni, ^■  

12 xenni ad ssekken imɣaren n tendint nnes, ad t ksin t zeg wemcan nni, ad t ggen deg ifassen n uneqqam n idammen uca ad immet.

13 War d ac izziǧiz, maca ad temḥid zi Israil idammen n wenni war iggin ddenb ḥima ad tiřid mliḥ.

14 War smuṭṭiy aymir n umqarreb nnek nni neyycen řejdud di tesɣart nnek nni i ɣa twarted di temmurt i d ac ɣa iwc SIDI, AREBBI nnek, ḥima ad tt tᵉṭṭfed. ^■  

15 Ijj n ucehhad waha war izemmar ad ikkar d acehhad x ca n weryaz di ssibbet n ca n řmuɛṣiyyet niɣ di ca n n ddenb nni izemmar ad ittwagg. X wawař zeg uqemmum n tnayen niɣ x wawař zeg uqemmum n ṭrata n řechud ad tᵉttwaḍmen tmesřact. ^■  

16 Xmi i ɣa ikkar ijj n ucehhad aqṭaṭɛiy x ca n weryaz ḥima ad zzayes icetca x ca n ddenb,

17 xenni ad bedden tnayen n yeryazen inni ittemmcubbucen zzat i wudem n SIDI, zzat i wudem n ikehhanen d řquḍat nni i din i ɣa yiřin deg wussan nni.

18 Uca řquḍat ad arzun mlih di tmesřact, u aqa, mařa acehhad d ijj n ucehhad bu-ixarriqen, ad iched s řbaṭeř x umas,

19 xenni ad zzayes teggem am mammec tuɣa ittxarreṣ ad igg netta s umas. Ammu i ɣa tekksed řɣar zi řwest nnek, ^■   20 ḥima inni iqqimen ad sřen, ad ggʷeden, war dikkʷiren ad ggen řḥajjet taɛeffant di řwest nnek. 21 War d ac izziǧiz: řeɛmar s řeɛmar, tiṭṭ s tiṭṭ, tiɣmest s teɣmest, afus s ufus, aḍar s uḍar.” ^■