1 Issiweř SIDI ak-d Musa, inna:

2 “Umur ayt n Israil uca ini asen: ‘Ittxeṣṣa kenniw ad teḥḍam x tɣarṣṭ inu, macca inu i tewhibin n tmessi, ict n řefwaḥet ittfuḥen i Necc, maḥend ad ayi t-i-dd tessqarrbem di řweqt nnes ittwaggen.’ 3 Ad asen tinid: ‘Aqa ta d tawhibt n tmessi i ittxeṣṣan ad dd-tessqarrbem: tnayen n izmaren icnan n ijj n useggʷas, am ict n tɣarṣt n wecmaḍ řebda. ^■   4 Ijj n izmar ad t-i-dd-tesswejded di ṣṣbeḥ uca izmar nneɣni ad t-i-dd-tesswejded jar beddu n wezyen n wass ař dd-tewḍa tmeddit 5 uca ak-d man aya am tewhibt n řɣiǧet ict n teɛcart n yijj n ifa n waren azdad ixeǧḍen s yijj n arbeɛ n ijj n uhinu n zzect ttwaddzen t-i-dd zi zzitun. ^■   6 Aqa-tt d taɣarṣṭ n wecmaḍ n řebda, tenni tuɣa ittwaggen deg wedrar n Sina am ict n řefwaḥet ittfuḥen, aqa-tt d ict n tewhibt n tmessi i SIDI. 7 Tawhibt nnes n useyyeb ad tiři d ijj n arbeɛ n ijj n uhinu i yijj n izmar. Seyyeb tawhibt n useyyeb n ccrab di Zzawect Iqeddsen zzat i SIDI. 8 Ad tesswejded izmar nneɣni jar beddu n wezyen n wass ař dd-tewḍa tmeddit. Ad tt tesswejded am mammec tesswejded tawhibt n řɣiǧet di ṣṣbeḥ u am mammec tesswejded tawhibt n useyyeb nnes, am ict n tewhibt n tmessi, ict n řefwaḥet ittfuḥen i SIDI.

9 Deg wass n ssebt ad tesswejded tnayen n izmaren icnan n ijj n useggʷas d tnayen n teɛcurin n yijj n ifa n waren azdad am tewhibt n řɣiǧet ixeǧḍen s zzect ak-d tewhibt nnes n useyyeb.

10 Aqa-tt d taɣarṣṭ n wecmaḍ n ssebt i mkuř ssebt, ad tt tarnid i tɣarṣt n wecmaḍ n řebda d tewhibt nnes n useyyeb.

11 Deg umezwar n kuř ijj n iyuren nwem ittxeṣṣa ad dd-tessqarrbem ict n tɣarṣt n wecmaḍ i SIDI: tnayen n iyenduzen, ijj n icarri, sebɛa n izmaren icnan n ijj n useggʷas

12 uca ak-d man aya třata n teɛcurin n ijj n ifa n waren azdad am tewhibt n řɣiǧet ixeǧḍen s zzect i yijj n uyenduz u tnayen n teɛcurin n yijj n ifa n waren azdad am tewhibt n řɣiǧet ixeǧḍen s zzect i yijj n icarri

13 uca arni ict n teɛcart n yijj n ifa n waren azdad am tewhibt n řɣiǧet ixeǧḍen s ijj n řqedd n zzect i yijj n izmar. Aqa-tt d taɣarṣt n wecmaḍ s ict n řefwaḥet ittfuḥen, aqa-tt d ict n tewhibt n tmessi i SIDI.

14 Tiwhibin nsen n useyyeb ad iřint d azyen n uhinu n binu ak-d uyenduz d ict n ttuřut n ijj n uhinu ak-d icarri d yijj n arbeɛ n ijj n uhinu ak-d izmar. Ta d taɣarṣt n wecmaḍ n kuř ayur, i kuř ayur zeg iyuren n useggʷas.

15 Ittxeṣṣa ad tesswejded ijj n iɣayḍ d ameẓyan d taɣarṣt n ddenb i SIDI, ad tt tarnid i tɣarṣt n wecmaḍ n řebda ak-d tewhibt nnes n useyyeb.

16 Deg uyur amezwaru, deg wass wiss arbeɛṭac n uyur, ad tiři Tɣarṣt n Useɛdu n SIDI. ^■  

17 Deg wass wiss xemmesṭac n simant n uyur ad yiři Řɛid. Sebɛa n wussan ad ccen aɣrum břa antun.

18 Deg wass amezwaru n Řɛid ad yiři yijj n umuni iqeddsen. War tteggem uřa d ict řxedmet i ittxeṣṣan ad tᵉttwagg. ^■  

19 Ad dd-tessqarrbem ict n tewhibt n tmessi am tɣarṣt n wecmaḍ i SIDI: tnayen n iyenduzen, ijj n icarri d sebɛa n izmaren n ijj n useggʷas. Ittxeṣṣa ad iřin cnan qaɛ. 20 Ad tiři tewhibt n řɣiǧet n waren azdad ixeǧḍen s zzect. Ad zzayes tesswejdem třata n teɛcurin n yijj n ifa i yijj n uyenduz d tnayen n teɛcurin n yijj n ifa i yijj n icarri. 21 Ad tesswejded ict n teɛcart n yijj n ifa i yijj n izmar, uca ammu i marra sebɛa n izmaren nni. 22 Sewjed ɛawed ijj n umyan d taɣarṣt n ddenb maḥend ad xawem ittwagg weṣřaḥ. 23 Ad tesswejdem man aya sennej i usewjed n tɣarṣt n wecmaḍ di ṣṣbeḥ nni iǧan d ict n tɣarṣt n wecmaḍ i řebda. 24 Am mammec uya ad tesswejdem sebɛa n wussan, di kuř ass zzaysen, macca n tewhibin n tmessi am ict n řefwaḥet ittfuḥen i SIDI. Ad ittwassewjed sennej i usewjed n tɣarṣt n wecmaḍ n řebda ak-d tewhibt nnes n useyyeb. 25 Deg wass wiss sebɛa ad teggem ijj n umuni iqeddsen. War tteggem uřa d ict řxedmet i ittxeṣṣan ad tᵉttwagg.

26 Deg wass n tmenzut n ṣṣabet di Řɛid n Ssimanat, xmi i-dd ɣa tessqarrbem ict n tewhibt n řɣiǧet n jdid ɣar SIDI, ad teggem ijj n umuni iqeddsen. War tteggem uřa d ict n řxedmet i ittxeṣṣan ad tᵉttwagg. 27 Ad dd-tessqarrbem ict n tɣarṣt n wecmaḍ am ict n řefwaḥet ittfuḥen i SIDI: tnayen n iyenduzen, ijj n icarri d sebɛa n izmaren n ijj n useggʷas 28 ak-d tewhibt nnes n řɣiǧet n waren azdad ixeǧḍen s zzect: třata n teɛcurin n yijj n ifa i yijj n uyenduz, tnayen n teɛcurin n yijj n ifa i yijj n icarri 29 uřa d ict n teɛcart n yijj n ifa i yijj n izmar, uca ammu i marra sebɛa n izmaren nni. 30 Swejdem ɛawed ijj n iɣayḍ d ameẓyan am tɣarṣt n ddenb maḥend ad xawem ittwagg weṣřaḥ. 31 Ad ten tesswejdem sennej i usewjed n tɣarṣt n wecmaḍ n řebda d tewhibt nnes n řɣiǧet. Ad iřin cnan qaɛ i kenniw ak-d tewhibin nnes n useyyeb.’ ”