1 Iẓra Balɛam belli aqa yarḍa i tiṭṭawin n SIDI umi ibarek Israil uca xenni war ggur ad yarzu, amecnaw amur amezwaru d umur wiss tnayen, di tgezzant, maca yarra udem nnes ɣar řexřa. 2 Umi issgeɛɛed tamuɣři nnes, iẓra Israil izdeɣ din, ɛlaḥsab tiqebbař nnes, xenni yusa-dd Arruḥ n AREBBI xas. 3 Xenni ibda netta awař nnes iweznen, inna:

“Awař n Balɛam, mmis n Baɛur,

awař n weryaz ijehden, wenni umi teqqen tiṭṭ,

4 ijj n wawař n wenni isřin awařen n Arebbi,

d wenni, am ixezzar tameẓriwt n Umzemmar x kuřci,

iwḍan am d as ttwarezment tiṭṭawin.

5 A Yaɛqub, mecḥař ṣebḥen iqiḍan nnek

d tzeddiɣin nnek, a Israil!

6 Amecnaw tiɣzurin ittwaswiẓẓḍen,

amecnaw aɣemmuy icewwaren ak-d yeɣzar,

amecnaw acfiř nni iẓẓu SIDI,

amecnaw ticejjura n tengelt zzat i waman. ^□  

7 Zeg ibuqařen nnes ad ssizzřen waman

uca zzariɛet nnes ad tiři di tuffet.

Ajeǧid nnes ad ittwasgeɛɛed x Ajaj

u tageldit nnes ad tᵉttwasuɛřa.

8 Arebbi issuffeɣ i-t-i-dd zi Miṣra.

Jjehd nnes amecnaw accawen n ufunas n řexřa.

Ad yecc řegnus, iɣrimen nnes,

ad iřbez iɣussan nsen

uca ad ten issnuqqeb s fřitcat nnes. ^■  

9 Aqa iɣnes,

issizzeř ixef nnes amecnaw ayrad, amecnaw tayradt.

Wi t i dd ɣa issekkaren?

Wenni cek i ɣa ibarek, ad ittwabarek

u wenni cek ɣa inɛeř, ad yiři ittwanɛeř!’ ”^■  

10 Xenni yarɣa uxeyyeq n Balak x Balɛam. Iwta netta deg ifassen nnes uca Balak inna i Balɛam: “Aqa řaɣiɣ-dd cek maḥend ad tneɛřed řɛedyan inu, maca xzar, aqa tbarked i-ten ɛad nican třata n imuren!

11 Xenni řexxu, arweř ɣar wemcan nnek! Necc nniɣ ac t, ad cek cennɛeɣ aṭṭas, maca xzar, SIDI imneɛ xak ccenɛet nni!”

12 Xenni inna Balɛam i Balak: “Ma war ssiwřeɣ ak-d ireqqasen nni d ayi-dd tssekked uca nniɣ:

13 ‘Waxxa Balak ad ayi iwc taddart nnes teccur s nnuqart d wureɣ, xenni necc ɛad war zmireɣ ad ɛeddiɣ x řumur n SIDI maḥend ad ggeɣ ca n řḥajjet n řxar niɣ n řɣar i dd-itteffɣen zeg wuř inu. Min i ɣa yini SIDi, ad t iniɣ.’ ^■  

14 Řexxu xenni, xzar, necc ad dd-dewřeɣ ɣar řgens inu. As-dd, necc ad cek ssaregbeɣ x řefhamet uca ad ac iniɣ min d ac ɣa yegg řgens-a deg uneggar n wussan.”

15 Xenni ibda netta awař iweznen nnes, inna:

“Awař n Balɛam, mmis n Baɛur,

awař n weryaz ijehden, wenni umi teqqen tiṭṭ!

16 Tawařt n wenni isřin awařen n Arebbi,

d wenni issnen zi tussna n wenni d Amɛuǧi x kuřci,

d wenni, am ixezzar tameẓriwt n Umzemmar x kuřci,

iwḍan am d as ttwarezment tiṭṭawin.

17 Ad t ẓarɣ, war iǧi řexxu,

ad t twařiɣ, maca war iǧi zi řadaset.

Ad dd-iffeɣ itri zi Yaɛqub

uca ad tekkar teɣɣarct n řḥakem zi Israil,

wenni i ɣa iřebzen iɣezdisen n uzeǧif n Mu’ab

uca ad iřbez marra tarwa n ssdeɛ ^■  

18 uca ad ittwaṭṭef Idum d arhan

u Saɛirwenni d řeɛdu nnes, ad t ṭṭfen d řwart,

uca ammu i ɣa igg Israil s taryast.

19 U wenni d i ɣa iffɣen zi Yaɛqub ggur ad iḥkem

u netta ad isshellek inni ittwasnejmen zi tendint.” ^■  

20 Umi netta iẓra Ɛamaliq, ibda awař iweznen nnes, inna:

“Ɛamaliq d amezwaru n řegnus,

maca aneggaru nnes ad idweř d ahellek!”

21 Řami iẓra Iqiniyyen, ibda netta awař iweznen nnes, inna:

“Tazeddiɣt nnek temten

uca teggid řɛucc nnek di teṣḍart.

22 Ɛad Qayin ad ittwakettef.

Ař meřmi izemmar ad ac dd-yawi Accur d ameḥbus?”

23 Uca ibda netta awař iweznen nnes, inna:

“Ay, wi i ɣa iqqimen iddaren xmi i ɣa yegg Arebbi aya?

24 Iɣarruba zi jjwayeh n Kittim ad ɣezzan Accur

uca ad ɣezzan ɛawed x Ɛabir

u netta ad ittwateḥḥa.” ^□  

25 Ikkar Balɛam uca yuyur uca idweř ɣar wemcan nnes n tzeddiɣt. Uřa d Balak iṭṭef abrid nnes.