1 Xenni inna Balɛam i Balak: “Bna sebɛa n iɛalṭaren danita i necc uca sewjed ayi sebɛa n iyenduzen d sebɛa n icarriyyen.” 2 Balak igga am mammec d as inna Balɛam uca Balak d Balɛam qeddmen ijj n uyenduz d ijj n icarri x kuř ijj n uɛalṭar. 3 Xenni Balɛam inna i Balak: “Bedd din zzat i tɣarṣt n wecmaḍ nnek, xenni necc ad raḥeɣ. Ad taɣ ak kidi imsagar SIDI uca man awař nni d ayi ɣa isscen, necc ad ac t-i-dd-ssargbeɣ.” Xenni iruḥ Balɛam ɣar tqiccat d taqeccart n wedrar.

4 U AREBBI immeřqa ak-d Balɛam uca netta inna as: “Aqa ssgeɛɛdeɣ sebɛa n iɛalṭaren uca qeddmeɣ ijj n uyenduz d ijj n icarri x kuř ijj n uɛalṭar.” 5 Xenni igga SIDI ijj n wawař deg uqemmum n Balɛam uca inna: “Dweř ɣar Balak uca siweř akides ammu.”

6 Uca umi ɣares-dd idweř, xzar, ibedd zzat i tɣarṣt n wecmaḍ nnes, jmiɛ ak-d řḥukkam n Mu’ab. 7 Xenni ibda iqqar awař nnes iweznen, inna:

“Zi Aram indeh ayi-dd Balak, ajeǧid n Mu’ab,

zeg idurar n ccarq, inna:

‘As-dd, nɛeř ayi Yaɛqub,

as-dd, zawar Israil!’

8 Maca mammec i ɣa neɛřeɣ,

wenni war ittwaneɛřen zi Arebbi,

u mammec i ɣa zawareɣ

wenni war izawar SIDI?

9 Minzi zi tqiccat n tṣuḍar twařiɣ t

uca zi tiwririn xezzareɣ dayes.

Aqa wa d ijj n řgens izeddɣen weḥḥdes

u war iḥesseb ixef nnes jar řegnus. ^■  

10 Wi i ɣa iḥesben acař n Yaɛqub

niɣ wi i ɣa iḥesben řqedd n arbeɛ zi Israil?

Ejj ad immet řeɛmar inu řmewt n imseggaden

u ejj ɛawed ad yiři uneggar n tudart inu ad imqudda akides!”

11 Uca xenni Balak inna i Balɛam: “Min d ayi teggid? Necc iwyeɣ cek ḥima ad tneɛřed řɛedyan inu, maca xzar, aqa nican tbarked ten!”

12 Netta yarra-dd, inna: “Ma war ittxeṣṣi ad ḥḍiɣ maḥend ad ssiwřeɣ min igga SIDI deg uqemmum inu?”

13 Xenni inna Balak: “Ttzawgeɣ cek ad dd-tased akidi ɣar ijj n wemcan nneɣni zi manis i ɣa tẓared řgens ɛawed. Ad tẓared ṭṭrufa nnes waha, war t tẓarred marra. Ssenni ad t tneɛřed di ṭṭweɛ inu!”

14 Uca yiwyi i-t ɣar řewḍa n Ṣufim x tqiccat n Fisja uca ibna din sebɛa n iɛalṭaren uca x kuř ijj n uɛalṭar iqeddem din ijj n uyenduz d ijj n icarri.

15 Netta inna i Balak: “Mařa cek ad tbedded da zzat i tɣarṣt n wecmaḍ nnek, xenni necc ad kis mmsagareɣ din.”

16 Uca imsagar SIDI ak-d Balɛam uca igga ijj n wawař deg uqemmum nnes, inna: “Dweř ɣar Balak uca ini as ammu.” ^■  

17 Uca netta yusa-dd ɣares, u xzar, netta tuɣa ibedd zzat i tɣarṣt n wecmaḍ nnes uca řḥukkam n Mu’ab bedden zzates. Inna as Balak: “Min inna SIDI?”

18 Xenni ibda netta awař nnes iweznen, inna:

“Kkar, Balak, sḥess!

Seř ɣari, cek, mmis n Ṣiffur!

19 Arebbi war iǧi d mmis n bnadem, maḥend zeɛma ad issxarriq,

niɣ d mmis n bnadem maḥend zeɛma ad t iřqef wendam.

Ma ad yini uca war tt ittegg,

niɣ ad issiweř uca war tt ittkemmiř? ^■  

20 Xzar, aqa ṭṭfeɣ řumur ḥima ad barkeɣ.

Umi ibarek Netta,

necc war zemmareɣ ad dd-arreɣ aya.

21 War ittwiři řmuɛṣiyyet n Yaɛqub

u arber n Israil war t iẓar.

SIDI, AREBBI nnes, aqa-t akides

uca aṣuḍi s wesruddeḥ di řbuq di ṭṭweɛ n Ujeǧid aqa-t dayes. ^■  

22 Arebbi issufeɣ i-ten-dd zi Miṣra.

Netta i nitni am waccawen n ufunas n řexřa. ^■  

23 Aqa zeɛma war din agezzen di Yaɛqub

u war din aɛezzem di Israil.

Ta d řweqt i di tᵉttwanna x Yaɛqub d Israil:

‘Aqa xzar, min igga Arebbi!’

24 Aqa da, řgens ad ikkar amecnaw ict n teyradt

u ad dd-igeɛɛed am weyrad.

War issezzeř ixef nnes ař ɣa yecc taymart nnes

uca ad issu idammen n min imezzeq.” ^□  

25 Xenni Balak inna i Balɛam: “Mařa xenni war texsed qaɛ ad t tneɛřed, war t ttbarak ca ɛawed.”

26 Balɛam yarra-dd uca inna i Balak: “Ma war d ac nniɣ: ‘Marra min d ayi ɣa yini SIDI, ad t ggeɣ?’ ”

27 Xenni inna Balak i Balɛam: “Ttzawgeɣ cek ad dd-tased, ad cek awyeɣ ɣar ijj n wemcan nneɣni. Ad taɣ ad yiři nican di tiṭṭawin n AREBBI mařa ad t tneɛřed ssenni di ṭṭweɛ inu.” 28 Uca Balak indeh Balɛam ɣar tqiccat n Faɣur nni ixezzaren ɣar tnezruft. 29 Xenni Balɛam inna i Balak: “Bna danita sebɛa n iɛalṭaren uca sewjed ayi danita sebɛa n iyenduzen d sebɛa n icarriyyen.” 30 Balak igga am mammec d as inna Balɛam uca x kuř ijj n uɛalṭar iqeddem din ijj n uyenduz d ijj n icarri.