1 Xenni fesyen ayt n Israil iqiḍan nsen uca wtin iqiḍan nsen di řewḍat n Mu’ab, arendad n Ariḥa nni iǧan x ujemmaḍ n L'Urdun. 2 Uca iẓra Balaq, mmis n Ṣiffur, marra min igga Israil deg Imuriyyen. 3 Mu’ab tuɣa itteggʷed aṭṭas zi řgens-a, minzi tuɣa aten deg waṭṭas. Mu’ab tuɣa ittnexřaɛ zeg ayt n Israil.

4 Xenni inna Mu’ab i imɣaren n Midyan: “Řexxu řɣaci aya ad iřseḥ marra min i d aneɣ-dd innḍen, am mammec iřesseḥ ufunas taziyzawt n yeyyar.” Tuɣa Balaq, mmis n Ṣiffur, ajeǧid n Mu’ab. 5 Issekk ireqqasen ɣar Balɛam, mmis n Baɛur, ɣar tendint n Fatur ɣar yeɣzar n Lfuraṭ, di temmurt n ayt n Ɛamuw maḥend ad as dd-řaɣan uca netta inna: “Xzar, iffeɣ-dd yjj n řgens zi Miṣra uca xzar, aqa idřa udem n temmurt uca aqa nitni zeddɣen nican arendad inu. ^■   6 As-dd řexxu, nɛeř řgens di ṭṭweɛ inu, minzi aqa ijhed xafi. Ad taɣ necc zemmareɣ ad t ɣeřbeɣ niɣ ad t ssuffɣeɣ zi temmurt, minzi necc ssneɣ belli wi i ɣa tbarked cek, ad ittwabarek u wi i ɣa tneɛřed, ad ittwanɛeř.”

7 Xenni ruḥen imɣaren n Mu’ab d imɣaren n Midyan ak-d řmunet n uɛezzem deg ufus nsen. Iwḍen ɣar Balɛam uca ssiwřen akides s wawařen n Balak. 8 Netta inna asen: “Sensem da ǧiřet-a, xenni necc ad xawem dd-arreɣ am mammec ɣari i ɣa issiweř SIDI.” Xenni qqimen řḥukkam n Mu’ab ɣar Balɛam. 9 Yusa-dd AREBBI ɣar Balɛam, inna: “Min ɛnan iryazen nni iǧan akidek?”

10 Inna Balɛam i AREBBI: “Balak, mmis n Ṣiffur, ajeǧid n Mu’ab, issekk i-ten-dd ɣari, inna:

11 ‘Xzar, ijj n řgens iffeɣ-dd zi Miṣra u aqa idřa udem n temmurt. As-dd, nɛeř i-t di ṭṭweɛ inu. Ad taɣ zemmareɣ xenni ad kisen menɣeɣ niɣ ad ten ssuffɣeɣ.’ ”

12 Inna AREBBI i Balɛam: “War ttriḥ kisen niɣ ad tneɛřed řgens nni, minzi řgens aqa ittwabarek.”

13 Xenni ikkar Balɛam di ṣṣbeḥ uca inna i řḥukkam n Balak: “Dewřem-dd ɣar temmurt nwem, minzi SIDI war d ayi ismiḥ ḥima ad raḥeɣ akidwem.”

14 Xenni kkaren řḥukkam n Mu’ab uca dewřen-dd ɣar Balak uca nnan: “Balɛam yugi ad dd-yas akidneɣ.”

15 Issekk Balak ɛawed řḥukkam, ɛad ktar u ɛad wenni icenɛen ktar x yina imezwura.

16 Usin-dd ɣar Balɛam, nnan: “Ammu iqqar Balak, mmis n Ṣiffur: ‘Ttzawgeɣ cek, war tejji ixef nnek maḥend war ɣari dd-ttased!

17 Minzi ad cek karrmeɣ s waṭṭas uca ad ggeɣ marra min d ayi ɣa tinid. Ttzawgeɣ cek, as-dd uca nɛeř řgens-a di ṭṭweɛ inu!”

18 Yarra Balɛam uca inna i imsexxaren n Balak: “Waxxa Balak ad ayi iwc taddart nnes teccur s nnuqart d wureɣ, ɛad war zmireɣ ad ffɣeɣ x řumur n SIDI, AREBBI inu, maḥend ad ggeɣ ca n řḥajjet d tameẓyant niɣ x ca n řḥajjet d tameqqrant. ^■  

19 Xenni řexxu, ttzawgeɣ kenniw, qqimem danita ǧiřet-a ḥima ad ssneɣ min d ayi ɣa yini SIDI ɛad ktar.” 20 Di ǧiřet yusa-dd AREBBI ɣar Balɛam, inna as: “Mařa dewřen-dd yeryazen nni ɛawed maḥend ad ac-dd řaɣan, kkar xenni uca ruḥ akidsen. Maca war ttegg mɣir min d ac ɣa iniɣ.” 21 Ikkar Balɛam ɣar ṣṣbeḥ uca iḥezzem i teɣyuč nnes uca yuyur ak-d řḥukkam n Mu’ab.

22 Xenni yarɣa weɣḍab n AREBBI, minzi netta iruḥ uca Lmalak n SIDI ibedd deg webrid am ijj n řeɛdu ḍidd nnes. Netta inya x teɣyuč nnes uca tnayen n iḥudriyyen tuɣa aten akides. 23 Uca taɣyuč teẓra Lmalak n SIDI ibedd deg webrid s ssif nnes ittwajebden deg ufus nnes. S uyenni terḥem teɣyuč zeg webrid uca tuyur deg iyyar. Xenni iwta Balɛam taɣyuč ḥima ad tt yarr ɣar webrid. ^■  

24 Maca Lmalak n SIDI ibedd deg ict n tebridt teḥṣar jar imarjaɛen n uḍiř s yijj n weɣbar ɣar ṭṭarf d ijj n weɣbar ɣar ṭṭarf nneɣnit. 25 Umi teẓra teɣyuč Lmalak n SIDI, teřṣeq ɣar weɣbar uca ittwaḥṣar uḍar n Balɛam ak-d weɣbar uca netta iqqim iccat i-tt.

26 Uca iruḥ Lmalak n SIDI ɣar zzat uca ibedd deg ijj n wemcan iḥṣar aṭṭas ař mani war ittwifi ttasiɛ maḥend ad yiři iḥeyyed ɣar yeffus uřa ɣar uzeřmaḍ. 27 Umi teẓra teɣyuč Lmalak n SIDI, tbarc sadu Balɛam uca Balɛam ixeyyeq aṭṭas uca ifarc taɣyuč s yijj n ukeccuḍ.

28 Xenni yarzem SIDI aqemmum n teɣyuč uca tenna i Balɛam: “Min d ac ggiɣ umi d ayi tfarced řexxu ɛad třata n imuren?” ^■   29 Xenni inna Balɛam i teɣyuč: “Minzi cem tbuṣared xafi. Mři ɣari ssif deg ufus inu, ad tiři xenni nɣiɣ cem!” 30 Tenna teɣyuč i Balɛam: “Ma war ǧiɣ necc taɣyuč nnek i xef tenyid zeg wami necc ɣarek ǧiɣ ař ass-a? Ma aqa necc nnumeɣ teggeɣ ak kik ammu?” Uca yarra-dd xas: “Lla!” 31 Xenni yarzem SIDI tiṭṭawin n Balɛam ařami iẓra Lmalak n SIDI ibedd deg webrid s ssif nnes ittwajebden deg ufus nnes. Xenni isseqwes Balɛam azeǧif nnes uca yuḍar am dd-yarra udem nnes ɣar temmurt. 32 Xenni inna as Lmalak n SIDI: “Mayemmi tewtid taɣyuč nnek třata n imuren? Xzar aqa Necc ffɣeɣ-dd am řeɛdu nnek minzi abrid-a ittḍarra ayi Necc nican. ^■   33 Taɣyuč teẓra ayi uca terḥem xenni zi zzat i wudem inu třata n imuren. Mařa war terḥim zi zzat i wudem inu, xenni Necc ad yiři aqa řexxu nɣiɣ cek u nettat ad tt jjeɣ ad teddar.” 34 Xenni inna Balɛam i Lmalak n SIDI: “Aqa necc xḍiɣ, minzi war ssineɣ belli Cek tbedded zzati deg webrid. Ɛad řexxu, mařa aya d řɛib di tiṭṭawin nnek, necc ad dd-dewřeɣ.” 35 Inna Lmalak n SIDI i Balɛam: “Ruḥ ak-d iwdan-a, maca siweř waha min d ac ɣa iniɣ.” Ammu iruḥ Balɛam ak-d řḥukkam n Balak.

36 Umi Balak isřa, aqa Balɛam yusa-dd, iruḥ ḥima ad t immeřqa ɣar tandint n Mu’ab i iǧan ɣar jjihet n weymir n Arnun, ɣar ṭṭarf n jjihet n weymir. 37 Uca Balak inna i Balɛam: “Ma war ssekkeɣ necc iwdan ad ac dd-řaɣan? Mayemmi war dd-tusid ɣari? Ma war zemmareɣ necc ad cek karmeɣ?” 38 Xenni yarra-dd Balɛam x Balak: “Xzar, necc usiɣ-dd ɣarek, maca ma zemmareɣ necc řexxu ad ssiwřeɣ x ca? Awař nni i ɣa yegg SIDI deg uqemmum inu, ggur ad t iniɣ.” ^□   39 Uca iruḥ Balɛam ak-d Balak uca usin-dd ɣar tendint n Ḥaṣut. 40 Xenni iɣarṣ Balak i ifunasen d wuǧi, issekk zzaysen ɣar Balɛam u ɣar řḥukkam nni tuɣa akides. 41 Di ṣṣbeḥ imsar belli Balak yiwi akis Balɛam uca issiři i-t x řuɛřat n Baɛl mani tuɣa izemmar ad iẓar řgens ař ṭṭarf iggʷejen qaɛ.