1 Akenɛani, ajeǧid n Ɛarad nni izeddɣen di Temmurt n Ljanub, isřa belli yusa-dd Israil x webrid n Atarim, imneɣ ḍidd i Israil uca iṭṭef ca zzaysen d imeḥbas.

2 Xenni iwca Israil ijj n wawař i SIDI uca inna: “Mařa d tidett tɛarrned řgens-a deg ufus inu, necc ad ḥarrmeɣ tineddam nsen i uteḥḥi.” 3 SIDI istajeb i Israil uca isellem as Ikenɛaniyyen uca iḥarrem i-ten i uteḥḥi uřa d marra tineddam nsen uca iřaɣa amcan nni s yisem n Ḥurma. ^□  

4 Xenni fessyen iqiḍan nsen zeg wedrar n Hur ruḥen x webrid ɣar Řebḥar n Telga uca s man aya tuɣa ittxeṣṣa ad nnḍen i temmurt n Idum. Uca řgens war isbir deg webrid. 5 Aqa iqaceḥ řgens ḍidd i AREBBI d Musa: “Mayemmi d aneɣ dd-tessuffɣem zi Miṣra maḥend ad nemmet di řexřa-ya? War da iǧi weɣrum uřa d aman. Řeɛmar nneɣ iɛiff zeg weɣrum-a i war isekkwin!”

6 Xenni iḍřeq SIDI ifiɣran yareqqen jar řgens inni izeɛfen řgens uca immut waṭṭas n řgens n Israil. ^■   7 Yusa-dd řgens ɣar Musa, nnan: “Aqa nexḍa, minzi nqaceḥ ak-d SIDI u akidek. Ẓaǧ i SIDI maḥend ad xaneɣ ikkes ifiɣran-a.” Xenni iẓuǧ Musa di ṭṭweɛ n řgens. ^□  

8 Inna SIDI i Musa: “Egg ijj n ufiɣar yareqqen uca sars i-t x ict n teḥnact uca man wen ma ittwazeɛfen zzayes u ixzar dayes, ad iddar.” ^■   9 Uca igga Musa ijj n ufiɣar n nnḥas uca issars i-t x teḥnact uca imsar meřmi izeɛɛef ca n ufiɣar ca n yijjen, aqa ixzar ɣar ufiɣar n nnḥas uca xenni iqqim iddar. ^■  

10 Xenni fesyen ayt n Israil iqiḍan nsen uca wtin iqiḍan nsen di Ubut. ^■  

11 Xenni kksen iqiḍan nsen zi Ubut, wtin iqiḍan nsen ɣar arwinat n Ɛabarim di řexřa i iǧan zzat i wudem n Mu’ab manis dd-tneqqar tfuct.

12 Ssenni kksen iqiḍan nsen uca wtin iqiḍan nsen di teɣzurt n teɣzart n Zarad.

13 Ssenni kksen iqiḍan nsen uca wtin iqiḍan nsen x ujemmaḍ n yeɣzar n Arnun, wenni issizřen di řexřa uca iffeɣ zi jjihet n weymir n Imuriyyen, minzi aqa Arnun d aymir ak-d Mu’ab, jar Mu’ab d Imuriyyen. ^■  

14 S uya qqaren deg wedlis ittwannḍen n garrat n SIDI:

“Wahib di Sufa d tɣezratin n Arnun,

15 u tiɣezratin i dd-ihekkwan,

ařami meyyřent ɣar tzeddiɣt n Ɛar,

d tenni isennden x weymir n Mu’ab.”

16 Ssenni ruḥen ɣar Bi’r. Wa aqa d anu x min xef inna SIDI i Musa: “Smun řgens, xenni ad asen wceɣ aman.”

17 Xenni iɣennej Israil izři aya:

“Ngez, a anu,

Arrim-dd xas s ijj n izři:

18 Cek anu, wenni ɣzin řḥukkam,

wenni ineqcen tarwa n taṣiřet n řgens ak-d umgewwad nsen

s iqeṭṭaben nsen.”

Zi řexřa \qt*ruḥen\qt ɣar Mattana

19 uca zi Mattana ɣar Naḥliyil, zi Naḥliyil ɣar Bamut, 20 uca zi Bamut ɣar teɣzurt nni iǧan deg iyyar n Mu’ab, x tqiccat n Fisja nni ittsijjan ɣar tnezruft.

21 Xenni issekk Israil ireqqasen ɣar Siḥun, ajeǧid n Imuriyyen, inna: ^■  

22 “Ejj ayi ad cuqeɣ di temmurt nnek. War nettmeyyiř ca ɣar iyyaren niɣ ɣar imarjaɛen n uḍiř nnek u war nsess aman zeg wanuten. X webrid igellden i xef i ɣa neɛdu, ař ɣa neɛdu x temmurt nnek.” ^■   23 Maca Siḥun war yejji ad iẓwa Israil x jjwayeh nnes. Issmun Siḥun marra řgens nnes uca iffeɣ ḥima ad imsagar ak-d Israil, ɣar řexřa, uca yusa-dd di Yahaṣ uca imneɣ ak-d Israil. ^■   24 Uca Israil iwta i-t s řeqḍeɛ n ssif uca iksi temmurt nnes d řwart, zi Arnun ař Yabbuq, ař ayt n Ɛammun, minzi jjihet n ayt n Ɛammun aqa-t d ijj n lbaraj ijehden. ^■   25 Iksi Israil marra tineddam-a uca izdeɣ Israil di marra tineddam n Imuriyyen, di Ḥacbun u di marra tneddam i ɣares dd-iqqnen. ^■   26 Minzi Ḥacbun tuɣa d tandint n Siḥun, ajeǧid n Imuriyyen, uca netta tuɣa imneɣ ak-d ujeǧid i d as dd-izwaren n Mu’ab uca iksi zzayes marra tammurt nnes ař Arnun. 27 S uyenni qqaren inni issawařen s wawařen iweznen:

“Asem-dd ɣar Ḥacbun,

ad tᵉttwabna u ad tᵉttwaɛdeř tendint n Siḥun!

28 Minzi timessi teffeɣ-dd zi Ḥacbun

uca ijj n uɛeccař zi tendint n Siḥun

ijj n uceɛɛař nni icca Ɛar n Imu’abiyyen,

řḥukkam n řuɛřat n Arnun. ^■  

29 Uct xak, Mu’ab! Aqa ittwahellek řgens n Kamuc.

Iḥenjiren nnes i tuɣa yarewřen d tḥenjirin nnes

aqa isellem i-ten d imeḥbas i Siḥun,

ajeǧid n Imuriyyen. ^■  

30 Aqa newwet i-ten s fřitcat.

Ḥacbun ittwahellek ař Dibun.

Nareddeǧ i-ten ař Nufaḥ

tenni iǧan ař Midaba.”

31 Ammu i idweř Israil ad izdeɣ di temmurt n Imuriyyen. 32 Uca issekk Musa ibergagen ɣar Yaɛzir uca ksin tineddam i ɣares dd-iqqnen uca kksen tasɣart n Imuriyyem nni tuɣa din izeddɣen.

33 Xenni meyyřen zeg webrid nsen, uřyen abrid ɣar Bacan. Xenni iffeɣ-dd Ɛuj, ajeǧid n Bacan, maḥend ad kidsen imsagar, netta d marra řgens nnes, i umenɣi di Idraɛi. ^■   34 Inna SIDI i Musa: “War zzayes tteggʷed ca, minzi Necc ggiɣ t deg ufus nnek, ak-d marra řgens nnes d temmurt nnes uca ad zzayes tegged amecnaw min teggid zi Siḥun ajeǧid n Imuriyyen wenni tuɣa izeddɣen di Ḥacbun.” ^■   35 Uca areddǧen t, netta d iḥenjiren nnes d marra řgens nnes, ař war iqqim uřa d ijj n umařwar uca ksin tammurt nnes d řwart. ^■