1 Deg uyur amezwaru tiweḍ marra tamesmunt n ayt n Israil ɣar řexřa n Ṣin. Řgens iqqim di Qadac. Din i temmut Maryam uca neḍřen tt din.

2 War tuɣi din aman i tmesmunt. Xenni munen ḍidd i Musa d Harun. 3 Tuɣa řgens imcubbec ak-d Musa, nnan: “Mři tuɣa zzayneɣ iffeɣ buḥbeř umi tuɣa iffeɣ buḥbeř zeg aytmatneɣ zzat i wudem n SIDI! ^■   4 Mayemmi tessidfem wegraw n řgens n SIDI di řexřa aya maḥend ad mmten din, neccin d řebhayem nneɣ? 5 U mayemmi d aneɣ dd-tessiřyem zi Miṣra ḥima ad aneɣ tessiwḍem ɣar wemcan-a aɛeffan? Deg wemcan-a war din zzariɛet niɣ tazart niɣ tzayart niɣ aremmam u war din ɛad aman ḥima ad nsu.”

6 Xenni yiweḍ Musa ak-d Harun zi zzat n wudem n wegraw n řgens ɣar wadaf n Uqiḍun n Umsagar uca wḍan x wudmawen nsen uca iban asen-dd uɛuǧi n SIDI. 7 Issiweř SIDI ak-d Musa, inna:

8 “Ksi taɣɣarct uca smun tamesmunt, cek d Harun, umac. Ittxeṣṣa ad tessiwřem ak-d teṣḍart zzat i tiṭṭawin nsen uca xenni ad tewc aman nnes. Ammu i ggur ad tessuffɣem i nitni aman zi teṣḍart uca ad tessessud tamesmunt d řebhayem.” ^■  

9 Xenni iksi Musa taɣɣarct zi zzat n wudem n SIDI am mammec i d as yumur Netta

10 uca issmun Musa d Harun agraw n řgens zzat i wudem n teṣḍart. Netta inna asen: “Sřem řexxu, a kenniw inni iɣewwɣen, ma ittxeṣṣa aneɣ ad dd-nessuffeɣ aman zi teṣḍart-a?” ^■  

11 Uca issgeɛɛed Musa afus nnes uca iwta taṣḍart tnayen n twařawin s taɣɣarct nnes uca ffɣen-dd zzayes aṭṭas n waman uca teswa tmesmunt d řebhayem nsen. ^■  

12 Xenni inna SIDI i Musa d Harun: “Minzi kenniw war d ayi tᵉttiqqem ař d ayi ɣa tweqqarem s uweqqar iqeddsen zzat i tiṭṭawin n ayt n Israil, x uya war tessidifem agraw-a n řgens di temmurt nni d asen wciɣ.” ^■  

13 Ina aqa d aman n Mariba x min xef mcubbcen ayt n Israil ak-d SIDI u mani Netta isscen ixef nnes d Amqeddes jar asen.

14 Issekk Musa ireqqasen zi Qadac ɣar ujeǧid n Idum, nnan: “Ammu i iqqar Israil, umac: ‘Cek tessned marra tamara nni xaneɣ ikkin, ^■  

15 aqa ibabaten nneɣ hwan-dd ɣar Miṣra u tuɣa nzeddeɣ aṭṭas n iseggʷusa di Miṣra u Imiṣriyyen ggin dayneɣ u di ibabaten nneɣ aṭṭas n řɣar.

16 Nřaɣa x SIDI uca Netta isřa tmijja nneɣ uca issekk-dd Lmalak uca issuffeɣ aneɣ-dd zi Miṣra. Xzar, aqa aneɣ di Qadac, ict n tendint ɣar ṭṭarf n jjihet nnek. ^■  

17 Ejj aneɣ, mařa texsed, ad neẓwa x temmurt nnek. War nẓekkwi x iyyaren niɣ x imarjaɛen n uḍiř nnek u war nsess aman zeg wanuten. X webrid igellden ad neɛdu břa ma ad nḥeyyed ɣar yeffus uřa ɣar uzeřmaḍ, ař ɣa neɛdu ɛawed iymiren n temmurt nnek.’ ”

18 Inna as Idum: “War ttẓekkʷim xafi, niɣ ak kic mmsagareɣ s ssif balak!”

19 Xenni nnan as ayt n Israil: “Ad neḍfar abrid ameqqran u mařa ad sweɣ aman nnek, necc d řebhayem inu, ad ten xeǧṣeɣ. Ad tt ẓwiɣ x iḍaren d wenni netta waha.”

20 Maca netta inna: “War xas tẓekkʷid!” Uca iffeɣ Idum maḥend ad kis imsagar s yijj n ubarru d ameqqran d ufus ijehden. 21 Ammu yugi Idum ad iwc ttesriḥ i Israil maḥend ad iẓwa aymir nnes. S uyenni i ijja Israil abrid di ssibbet nnes. ^■  

22 Fesyen iqiḍan nsen, ffɣen zi Qadac uca iwḍen ayt n Israil ɣar wedrar n Hur, tamesmunt marra. ^■   23 Issiweř SIDI ak-d Musa d Harun ɣar wedrar n Hur, ɣar weymir n temmurt n Idum, inna:

24 “Ad ittwasmun Harun ak-d řejdud nnes, minzi war ittidef ɣar temmurt nni wciɣ i ayt n Israil, minzi kenniw tɣennanem x řumur inu ɣar waman n Mariba. 25 Ksi Harun d Aliɛazar, mmis, uca arr i-ten ad geɛɛden x wedrar n Hur. ^■   26 Ɛarra Harun zeg warruḍ nnes uca syarḍ i-ten i Aliɛazar, mmis. Xenni ad ittwaksi Harun uca ad immet din.”

27 Musa igga am mammec i d as yumur SIDI. Uřyen adrar n Hur zzat i tiṭṭawin n marra tamesmunt. 28 Musa iɛarra Harun zeg warruḍ nnes uca issyarḍ i-t i Aliɛazar, mmis. Uca immut Harun din x tqiccat n wedrar. Xenni ihwa-dd Musa zeg wedrar ak-d Aliɛazar. ^■   29 Marra tamesmunt teẓra belli Harun iḍřeq i buḥbeř nnes uca run třatin n wussan di ssibbet n Harun, marra taddart n Israil.