1 Issiweř SIDI ak-d Musa d Harun, inna:

2 “Ta d tewṣeyyet zi Ccariɛa nni yumur SIDI, umi inna: ‘Siweř ak-d ayt n Israil ad ac-dd awyen ict n tyenduzt tameẓyant tazeggʷaɣt, tenni icnan u tenni war di iǧi uneɛḍab uca war xas ssarsen ɛad azayřu. 3 Ad tt tewcem i ukehhan Aliɛazar u netta ad tt issuffeɣ barra i řmargeḥ n řɛeskar u ad as ittwaɣarṣ zzat i wudem nnes. ^■   4 Akehhan Aliɛazar ad iksi cwayt n idammen nnes s uḍaḍ nnes uca ad irucc sebɛa n twařawin cwayt zeg idammen nnes jjihet n wudem n Uqiḍun n Umsagar. ^■   5 Ad sscemḍen tyenduzt tameẓyant zzat i tiṭṭawin nnes. Tiřmect nnes, aysum nnes d idammen nnes ad ten sscemḍen jmiɛ ak-d umessař nnes. ^■   6 Ad iksi ukehhan akeccuḍ n tcejjart n tengelt d tɛelǧet d uzeggʷaɣ iḥedqen uca ad inḍar aya di řwest n tmessi i di tᵉttwacmeḍ tayenduzt. ^□   7 Xenni ad iṣebben ukehhan arruḍ nnes, ad issird arrimet nnes s waman, uca awarni as ad yadef ɣar řmargeḥ. Akehhan ad yiři ixmej ař tameddit. 8 D wenni tt isscemḍen, ad iṣebben řa d netta ɛawed arruḍ nnes deg waman uca ad issird arrimet nnes s waman. Netta ad yiři ixmej ař tameddit. 9 Aryaz amezdag ad iyru iɣɣeḍ n tyenduzt uca ad ten igg barra i řmargeḥ deg ijj n wemcan izdig. Aqa i tmesmunt n ayt n Israil maḥend ad teḥḍam x waman n weɛzař, aqa aten i usizdeg n ddenb.

10 Wenni iyrun iɣɣeḍ n tyenduzt ad iṣebben arruḍ nnes uca ad yiři ixmej ař tameddit. Aqa-tt d ict n tewṣeyyet i řebda i ayt n Israil u i ubarrani nni izeddɣen di řwest nsen.

11 Wi i ɣa iḥadan ca n umettin, mammec ma tegga ca n řxecbet n bnadem, ad yiři ixmej sebɛa n wussan. ^■  

12 Deg wass wiss třata ad ikkes ddenb x yixef nnes s waman n weɛzař. Xenni ad yiři izdig deg wass wiss sebɛa. Mařa war ikkis ddenb x yixef nnes deg wass wiss třata, war ittiři izdig deg wass wiss sebɛa.

13 Marra wi iḥadan ijj n umettin, řeɛmar n ijj n bnadem immut, uca war ikkes ddnub x yixef nnes, aqa issexmej Tazeddiɣt n SIDI. Řeɛmar nni ad ittwaqess zi Israil. Minzi war xas zeǧɛen aman n weɛzař, ggur ad yiři ixmej. Řexmej nnes aqa-t xas ɛad.

14 Wa d azerf x ijj n bnadem nni immuten deg ijj n uqiḍun. Marra wi i ɣa yadfen ɣar uqiḍun nni u marra wi i ɣa iqqimen deg uqiḍun nni, ad yiři ixmej sebɛa n wussan.

15 Ɛawed kuř řqecɛet yarezmen, war xas taqebbart teqqen s tesɣunt, ad tiři texmej,

16 Marra wi iḥadan ḥed ittwasnuqqben s ssif deg iyyar, niɣ ca n umettin niɣ ixsan n ijj n bnadem, niɣ ijj n wenḍeř, ad yiři ixmej sebɛa n wussan.

17 Ittxeṣṣa ad ksin i yijj n umexmuj cwayt n iɣɣeḍ n tɣarṣt n ddenb icemḍen uca deg ict n řqecɛet ad xas ggen aman iddaren.

18 Ijj n weryaz d amezdag ad iksi tɛelǧet, ad tt issuf deg waman uca xenni ad tt irucc x uqiḍun u x marra řeqcuɛ u x řeɛmur nni tuɣa din iǧan, uca ammu ɛawed x wi iḥadan ixsan niɣ ca n yijjen wenni ittwasnuqqben niɣ ca n umettin niɣ ca n wenḍeř. ^■  

19 Amezdag ad irucc x umexmuj deg wass wiss třata u deg wass wiss sebɛa u deg wass wiss sebɛa ad xas ikkes ddenb. Ad iṣebben arruḍ nnes ad issird ixef nnes s waman uca ad yiři izdeg ař tameddit. 20 Aryaz ixemjen d wenni war ittejjin ad ikkes ddenb x yixef nnes, řeɛmar nni ad ittwaqess zi řwest n wegraw n řgens, minzi aqa issexmej Zzawect Iqeddsen n SIDI. War xas ssfarrɣen ca ‘aman n weɛzař’, aqa ixmej.

21 Ta d ict n tewṣeyyet i řebda i nitni. Wenni iruccen aman n weɛzař ad iṣebben arruḍ nnes uca wi i ɣa iḥadan aman n weɛzař, ad yiři ixmej ař tameddit. 22 Marra min ittwaḥadan zeg umexmuj, ad yiři ixmej, uca bnadem nni i ɣa iḥadan aya, ad yiři ixmej ař tameddit.’ ”