1 Inna SIDI i Harun:

“Cek d iḥenjiren nnek d taddart n babac akidek, ad tarbum řmuɛṣiyyet n Zzawect Iqeddsen nwem. Cek d iḥenjiren nnek akidek ad arbun řmuɛṣiyyet n tukehhant nwem. 2 Ad dd-tessqarrbed uřa d aytmac, taqbič n Lawi, taqbič n babac. Nitni ad dd-mmarenyen ɣarek, ad ac sexxaren, maca cek, jmiɛ ak-d iḥenjiren nnek, ad tsexxared zzat i wudem n Uqiḍun n Cchadet. 3 Ad ṭṭfen acbar nnek uca ad ḥḍan x marra Aqiḍun, maca war zemmaren ad dd-qarrben ɣar řeqcuɛ n Zzawect Iqeddsen u ɣar uɛalṭar ḥima war ttmettin, war iǧi řa d nitni uřa d kenniw. 4 Ittxeṣṣa asen ad mmarenyen ɣarek uca ad ṭṭfen acbar x Uqiḍun n Umsagar u x marra tasexxart n Uqiḍun. Wenni war ɣar iǧi ttesřiḥ war izemmar ad ɣarwem-dd iqarreb. 5 Ad tᵉṭṭfem acbar x Zzawect Iqeddsen uřa x uɛalṭar, ḥima war dd-ittis ɛad uduqqez n weɣḍab x ayt n Israil. 6 Necc, aqa da Necc, ksiɣ awmaten nwem, Ilawiyyen, zi jar řwest n ayt n Israil. Aqa nitni am ict n tewhibt i kenniw, tenni ittwawehben i SIDI maḥend ad sexxaren nitni deg Uqiḍun n Umsagar. ^■   7 Maca cek d iḥenjiren nnek akidek ad tᵉṭṭfem tukehhant nwem di marra min iqqnen ak-d uɛalṭar d min iǧan daxeř i uřeḥḥaf uca ammu ad tsexxarem kenniw. Necc ad awem wceɣ tukehhant d tsexxart amecnaw ict n terzeft. Wenni dd ɣa iqarrben mařa war ɣares bu ttesriḥ, ad ittwaneɣ.”

8 Issiweř SIDI ak-d Harun:

“Necc, xzar, aqa d Necc i d ac iwcin ḥeṭṭu x tewhibin n usgeɛɛed inni ittwaqeddmen i Necc. Necc wciɣ tent ak-d marra timesřayin timqeddasin n ayt n Israil am tesɣart ittwasdehnen i cek u i iḥenjiren nnek, am ict n tewṣeyyet i řebda. 9 Wa ad yiři nnek zi marra timesřayin iqeddsen qaɛ zi tmessi: kuř tawhibt nsen i kuř tawhibt nsen n řɣiǧet, i kuř taɣarṣt nsen n ddenb, u i kuř taɣarṣt nsen n umarwas nni d ayi dd ɣa yarren. Wa ad yiři d amqeddas qaɛ i cek u i iḥenjiren nnek.

10 Ad tecced aya deg ijj n wemcan d amqeddas qaɛ. Kuř awtem ad zzayes yecc. Aya ad yiři d amqeddas i kenniw.

11 Ɛawed d man aya ad yiři i cek: tawhibt n usgeɛɛed n tewhibt nsen ak-d marra tiwhibin n wenhezzi n ayt n Israil. Wciɣ tent i cek u i warrawen nnek d tarrawin nnek inni akidek iǧan. Aqa-tt d ict n tewṣeyyet i řebda. Kuř ijjen di taddart nnek nni iǧan d amezdag, ad zzaysent yecc. ^■  

12 Min iǧan mxeyyar n zzect d min iǧan mxeyyar n binu n jdid u zeg irden, d tamezwarut i zzaysen ad wcen i SIDI, aqa wciɣ ac tt.

13 Tamenzut n marra min iǧan x temmurt nsen, inni dd ɣa yawyen ɣar SIDI, aqa marra man aya ad yiři i cek. Kuř ijjen wenni iǧan d amezdag di taddart nnek, izemmar ad zzayes yecc.

14 Marra min ittwaḥarrmen i SIDI di Israil, ad yiři nnek. ^■  

15 Marra min yarezmen řemřawat d amezwaru jar marra aysum i ɣa qeddmen i SIDI, zi bnadem niɣ zi řebhimet, ad yiři nnek. Maca ad tefdid qaɛ amenzu n iwdan uca ittxeṣṣa ɛawed ad tefdid amenzu n řebhayem ixemjen. ^■  

16 Wi zzaysen i ɣa ttwafdin, ad ttwafdin d mmis n ijj n uyur ɛlaḥsab řqimet i tqeddared cek di nnuqart, xemsa n iciqlen ɛlaḥsab aciql n Zzawect Iqeddsen, wenni iǧan ɛicrin n ‘ijirat’. ^■  

17 Maca amenzu n ufunas d umenzu n uḥuři d umenzu n iɣayḍ, war t tfeddim ca. Aqa aten d imqeddasin. Ad tzeǧɛed idammen nsen x uɛalṭar u tadunt nsen ad tt tessbexxared am tewhibt n tmessi, am ict n řefwaḥet ittfuḥen i SIDI.

18 Aysum nnes ad yiři nnek, am idmaren n wenhezzi uřa d acekrud afusi ad iřin nnek.

19 Marra tiwhibin n usgeɛɛed zi tmesřayin timqeddasin nni i ɣa ssgeɛɛden ayt n Israil i SIDI, wciɣ tent i cek u i iḥenjiren nnek d tḥenjirin nnek inni akidek iǧan. Aqa-t d ict n tewṣeyyet i řebda, ad yiři d ijj n Řɛahd s řemřaḥet i řebda zzat i wudem n SIDI, i cek u i zzariɛet nnek nni akidek iǧan.”

20 Inna SIDI i Harun:

“War tᵉtteṭṭfed d řwart di temmurt nsen u war ɣarek tᵉttiři bu tesɣart di řwest nsen. Necc d tasɣart nnek d řwart nnek di řwest n ayt n Israil. ^■   21 Xzar, Necc wciɣ i ayt n Lawi marra řeɛcur di Israil d řwart di ṭṭweɛ n tsexxart nni ggin nitni, tasexxart n Uqiḍun n Umsagar. 22 Ayt n Israil war dd-ttqarrben ɛad ɣar Uqiḍun n Umsagar ḥima war dd-tiwyen ammu ddenb x yixef nsen uca ad mmten. 23 Maca Ilawiyyen ad sexxaren di tsexxart n Uqiḍun n Umsagar uca ad arbun řmuɛṣiyyet nsen. Aqa-tt d ict n tewṣeyyet i řebda i marra jjiřat nwem, aqa nitni war ttᵉṭṭfen řwart di řwest n ayt n Israil, 24 minzi řeɛcur n ayt n Israil nni ssgeɛɛden nitni i SIDI am tewhibt n usgeɛɛed, wciɣ ten i Ilawiyyen. S uya nniɣ asen: ‘War ttwariten di řwest n ayt n Israil!’ ”

25 Issiweř SIDI ak-d Musa, inna:

26 “Ammu i ɣa tessiwřed ak-d Ilawiyyen uca ad asen tinid: ‘Xmi teksim řeɛcur n ayt n Israil nni wciɣ kenniw d řwart, xenni ad zzaysen tessgeɛɛdem ict n tewhibt n usgeɛɛed i SIDI, řeɛcur zi řeɛcur. 27 Ad awem dd-tᵉttwaḥseb am tewhibt n usgeɛɛed, am irden n unedrar u am teccuret n tsirt n uḍiř. 28 Ammu i dawem ittxeṣṣa ad tessgeɛɛdem ict n tewhibt n usgeɛɛed i SIDI zi marra řeɛcur nwem nni i ɣa teksim zeg ayt n Israil. Ittxeṣṣa ad tewcem tawhibt nni tessgeɛɛdem zzaysen i SIDI ɣar ukehhan Harun. 29 Zi marra min d awem ɣa wcen, ad tessgeɛɛdem tawhibt n usgeɛɛed tmun i SIDI, zi řemxeyyar nnes, tasɣart nnes iqeddsen zzayes.’

30 Uca ittxeṣṣa ac ad asen tinim: ‘Mařa teksim zzayes řemxeyyar nnes, aqa aya ad dd-ittwaḥseb d řɣiǧet n unedrar d řɣiǧet n tsirt n uḍiř i Ilawiyyen. 31 Ad teccem aya di kuř amcan, kenniw d aytbab n taddart nwem, minzi ta d řmunet i tsexxart nwem deg Uqiḍun n Umsagar. 32 Mařa ad zzayes teksim min iǧan ḥsen, xenni war xawem tarebbum ddenb. War iɛeddeř ad tfesdem tiwhibin timqeddasin n ayt n Israil, ḥima war tmettim ca.’ ”