1 Issiweř SIDI ak-d Musa, inna:

2 “Ini i Aliɛazar, mmis n ukehhan Harun, belli ad iksi timejmarin zeg uḥaduq n tmessi uca ad issuyes řefḥem itteḥduduqen di řaggʷaj, minzi aqa nitenti qeddsent i ǧant! 3 Jjem asen ad tketken timejmarin n yeryazen nni tuɣa ixeṭṭan ḍidd i řeɛmur nsen, tiřwiḥin d tizirarin i dduri i uɛalṭar, minzi ssqarrben-dd tent zzat i wudem n SIDI, s uya i zi ttwaqeddsent. Ad iřint d ijj n uceyyar i ayt n Israil. 4 Xenni iksi ukehhan Aliɛazar timejmarin n nnḥas nni dd-ssqarrben inni ittwacemḍen am tewhibt, uca tketken tent ḥima ad zzaysent dřent aɛalṭar, 5 i řidaret i ayt n Israil, ḥima uřa d ijj n weryaz nni war iǧin zi zzariɛet n Harun, war dd-ittqarrib ca břa ttesriḥ zzat i wudem n SIDI, ḥima ad issbexxar řebxur maḥend war d as iřqef min iřeqfen Quraḥ d ubarru nnes, am mammec tuɣa issiweř SIDI s uqemmum n Musa.

6 Tiwecca nnes tuɣa marra tamesmunt n ayt n Israil tᵉttnedqam ḍidd i Musa d Harun, nnan: “Kenniw tenɣim řgens n SIDI!” 7 Uca umi tmun tmesmunt ḍidd i Musa d Harun uca bdan uyuren ɣar Uqiḍun n Umsagar, xzar, aqa aseynu wenni t idřin uca iban-dd uɛuǧi n SIDI. 8 Yusa-dd Musa ak-d Harun, bedden zzat i Uqiḍun n Umsagar.

9 Issiweř SIDI ak-d Musa, inna:

10 “Kkarem, aggʷejem zi řwest n tmesmunt u Necc ad ten mḥiɣ deg ijj n wermac n wabřiwen!” Xenni wḍan x wudem nsen.

11 Inna Musa i Harun: “Ksi deɣya ijj n řmejmar, egg xas timessi n uɛalṭar uca sars xas řebxur. Azzeř ɣar tmesmunt uca fdi xasen, minzi iffeɣ-dd uduqqez n weɣḍab zi zzat i wudem n SIDI, aqa da jjriḥect am tebda ɛad.”

12 Iksi Harun řmejmar, am mammec inna Musa, uca yuzzeř ɣar řwest n wegraw n řgens, uca xzar, jjriḥect tuɣa am tebda ɛad jar řgens uca netta issars dayes řebxur uca ifdi x řgens. ^□  

13 Tuɣa ibedd jar imettan d imeddaren uca tᵉttwasbedd jjriḥect.

14 Wi immuten zi jjriḥect tuɣa aten di arbeɛṭac-ařef u-sebɛa-mya, břa inni immuten di ssibbet n Quraḥ.

15 Idweř Harun ɣar Musa ɣar wadaf n Uqiḍun n Umsagar. Aqa tᵉttwasbedd jjriḥect.

16 Issiweř SIDI ak-d Musa, inna:

17 “Siweř ak-d ayt n Israil uca ksi zzaysen ijj n weɛmud i kuř taddart n ibabaten nsen, zi marra imɣaren nsen, ɛlaḥsab lɛadad n tudrin n ibabaten nsen, tenɛac n iɛumad. Ittxeṣṣa ad tarid isem n kuř ijj zzaysen x weɛmud nnes.

18 Ad tarid isem n Harun x weɛmud n Lawi, minzi ad din yiři ijj n weɛmud i yijj n uzeǧif n taddart n ibabaten nsen.

19 Ad ten tegged deg Uqiḍun n Umsagar, zzat i Cchadet, mani kidwem i ɣa msagareɣ. ^■   20 Xenni ggur ad imsar, aqa ad inuwwar weɛmud n weryaz nni ixḍareɣ necc uca ad ssbeddeɣ anedqem ḍidd inu i zi xawem nndeqmen ayt n Israil.”

21 Issiweř Musa ak-d ayt n Israil uca marra imɣaren nsen wcin ijj n weɛmud i mkuř ijj n umɣar, ɛlaḥsab řqedd n tudrin n ibabaten nsen, tenɛac n iɛumad. Uca aɛmud n Harun tuɣa-t jar iɛumad nsen. 22 Musa issars iɛumad nni zzat i wudem n SIDI deg Uqiḍun n Cchadet. 23 Tiwecca nnes imsar belli yudef Musa ɣar Uqiḍun n Cchadet, uca xzar, aɛmud n Harun di ṭṭweɛ n taddart n Lawi tuɣa igga tamrist n uɣemmuy uca tamrist tessuffeɣ-dd uca nnuwwar nnes yarzem uca yiwi-dd ǧuz yiwḍen. 24 Xenni issuffeɣ Musa marra iɛumad zi zzat i wudem n SIDI ɣar marra ayt n Israil. Ẓrin aya uca ṭṭfen kuř ijj aɛmud nnes.

25 Xenni inna SIDI i Musa: “Arr aɛmud n Harun zzat i Cchadet, ad t teḥḍid am ijj n uceyyar ḍidd i yenni iɣewwɣen. Ammu i ɣa tessbedded anedqem nsen ḍidd inu maḥend nitni war ttmettin ca.” ^■   26 Uca igga Musa am mammec d as yumur SIDI, ammu igga netta. 27 Xenni ssiwřen ayt n Israil ak-d Musa, nnan: “Xzar, ad zzayneɣ iffeɣ buḥbeř, ad nettwahellek, ad nettwahellek marra neccin! 28 Man wen ma i dd ɣa iqarrben ɣar Uqiḍun n SIDI, ad immet. Ma ad nettwateḥḥa ař zzayneɣ iffeɣ buḥbeř?”