1 Quraḥ, mmis n Yiṣhar, mmis n Qahat, mmis n Lawi, ak-d Datan d Abiram, tnayen n iḥenjiren n Iliyab, d Un, mmis n Falat, iḥenjiren n Rubin, ksin iryazen ^■   2 u kkaren ḍidd i Musa, bedden zzat i wudem nnes ak-d iryazen nneɣni zeg ayt n Israil, mitayen u-xemsin n imeqqranen n tmesmunt, aqa aten zeg inni dd-ittwařaɣan ɣar umuni, iryazen s ccan. 3 Nitni munen ḍidd i Musa d Harun, nnan asen: “Cfa awem kenniw! Minzi marra tamesmunt, wah, marra nitni d imqeddasen uca SIDI di řwest nsen. Mayemmi tessuɛřam ixef nwem sennej i wegraw n řgens n SIDI?”

4 Umi isřa Musa i man aya, iwḍa x wudem nnes. 5 Uca issiweř ak-d Quraḥ d marra abarru nnes, inna: “Tiwecca ad isscen SIDI wenni iǧan nnes d wenni iǧan d amqeddas d wenni i ɣares dd ɣa issqarreb. Wenni ifarz Netta, d wenni i dd ɣa issqarreb Netta ɣares. 6 Ggem aya! Ejj Quraḥ d marra abarru nnes ad awyen timejmarin. 7 Tiwecca ggem xasen řefḥem i tmessi, sarsem xas řebxur zzat i wudem n SIDI. Xenni ad imsar belli aryaz nni ixḍar SIDI, ad yiři d amqeddas. Aqa truḥem tiggʷijem, ayt n Lawi!” 8 Inna Musa i Quraḥ: “Sřem řexxu, ttzawgeɣ, kenniw, ayt n Lawi! 9 Ma war xawem icfi umi kenniw issfarz AREBBI n Israil x tmesmunt n Israil maḥend ad kenniw ɣares dd-issqarreb ḥima ad tsexxarem di Tzeddiɣt n SIDI uca ḥima ad tbeddem zzat i wudem n tmesmunt maḥend ad ten tsexxarem?

10 Netta issqarreb i cek-dd, cek d marra aytmac, ayt n Lawi, jmiɛ akidek. Ma tarezzum řexxu ɛawed tukehhant?

11 S uya, cek d marra abarru nnek, aqa kenniw tmunem ḍidd n SIDI, minzi min iɛna Harun, min iɛna ḥima ad xas tennedqem?”

12 Uca issekk Musa ad řaɣan x Datan d Abiram, iḥenjiren n Iliyab, maca nitni nnan: “War dd-nettis ca!”

13 Ma war icfa awem umi d aneɣ dd-tssuffɣem zeg ict n temmurt ifeyyḍen s uɣi d tamment, ḥima ad aneɣ tesshelleked di řexřa uca xenni ɛawed tegged ixef nnek d řḥakem xaneɣ?

14 Uřa d cek war d aneɣ dd-tessidfed ca deg ict n temmurt ifeyyḍen s uɣi d tamment, u war d aneɣ tewcid iyyaren d imarjaɛen n uḍiř d řwart. Ma texsed zeɛma ad tekksed tiṭṭawin n yeryazen-a? Neccin war dd-nettis ca!”

15 Xenni ittwasarɣ ufugem n Musa, inna i SIDI: “War xezzar ɣar tewhibt nsen! Necc war zzaysen kessiɣ qaɛ ijj n uɣyuř uca war ggiɣ řɣar uřa i yijj zzaysen.” ^■  

16 Inna Musa i Quraḥ: “Cek d marra abarru nnek, asem-dd tiwecca zzat i wudem n SIDI, cek d nitni, d Harun.

17 Ksim kuř ijj zzaywem ijj n řmejmar, ggem dayes řebxur uca qarrbem-dd akides zzat i wudem n SIDI. Kuř aryaz ak-d řmejmar nnes, mitayen u-xemsin n tmejmarin, uca ɛawed cek d Harun, kuř ijj ak-d řmejmar nnes.”

18 Iksi kuř ijj řmejmar nnes uca ggin xas nitni timessi u ssarsen xas řebxur uca uyuren ad bedden zzat i wadaf n Uqiḍun n Umsagar ak-d Musa d Harun.

19 Quraḥ iɣewweɣ xasen marra abarru nnes ɣar wadaf n Uqiḍun n Umsagar. Řexdenni iban-dd uɛuǧi n SIDI ɣar marra tamesmunt.

20 Issiweř SIDI ak-d Musa d Harun, inna:

21 “Ḥeydem ixef nwem zeg ubarru aya, xenni ad ten hellkeɣ deg wermac n wabřiwen!” 22 Maca nitni wḍan x wudem nsen, nnan: “A Arebbi, AREBBI n marra buḥbeřat n marra ddat! Mařa ixḍa ijj n weryaz, ma xenni ad tegged aɣḍab nnek ad idduqqez x marra tamesmunt?” ^■  

23 Issiweř SIDI ak-d Musa, inna:

24 “Siweř ak-d tmesmunt, ini: ‘Beɛɛdem x tzeddiɣt n Quraḥ d Datan d Abiram d min d as dd-innḍen.’ ” 25 Xenni Musa ikkar uca iruḥ ɣar Datan d Abiram uca uyuren imɣaren n Israil awarni as. 26 Uca issiweř netta ak-d tmesmunt, inna: “Ttzawgeɣ, beɛɛdem x iqiḍan n yeryazen-a iqejḥen u war ttḥadam uřa d ict n řḥajjet n min iǧan nsen ḥima kenniw war tᵉttwahellkem ca s ddnub nsen!” 27 Kkaren nitni uca beɛɛden x iqiḍan n Quraḥ d Datan d Abiram d min d as dd-innḍen. Datan d Abiram ffɣen-dd, bedden ɣar wadaf n iqiḍan nsen ak-d temɣarin nsen d iḥenjiren nsen d iḥenjiren nsen imeẓyanen. 28 Xenni inna Musa: “S man aya i ɣa tessnem belli SIDI issekk ayi-dd ḥima ad ggeɣ marra timegga-ya, minzi war dd-ffiɣent ca zeg wuř inu. 29 Mařa ina ad mmten amecnaw mammec mmuten iwdan marra u war ten iřqif min iřeqfen marra iwdan, xenni ad taf SIDI war d ayi-dd issekk. 30 Maca mařa SIDI ixřeq-dd ca n řḥajjet d tamaynut qaɛ uca tammurt ad tarzem aqemmum nnes, ad ten tsarḍ ak-d marra min iǧan nsen uca ad hwan ddaren di řaxart, xenni i ɣa tessnem belli iryazen-a aqa ssduqqzen SIDI.”

31 Uca imsar, umi ikemmeř awařen-a, tfeǧeq temmurt nni swadday nsen. 32 Tarzem temmurt aqemmum nnes uca tsarḍ i-ten ak-d aytbab n taddart nsen u ak-d marra iwdan n Quraḥ d marra agřa nsen. ^■   33 Hwan-dd ddaren di řaxart ak-d marra min iǧan nsen uca tammurt tessduři i-ten u ttwateḥḥan zi řwest n wegraw n řgens. 34 Marra Israil, inni tuɣa dd-innḍen, arewřen umi sřin i tɣuyyit nsen, minzi nnan: “Niɣ ad taf uřa d neccin ad aneɣ tṣarḍ temmurt.” 35 Uca teffeɣ-dd tmessi zi SIDI, tecca mitayen u-xemsin n yeryazen nni dd-yiwyen řebxur.