1 Issiweř SIDI ak-d Musa, inna:

2 “Siweř ak-d ayt n Israil, ini asen: ‘Xmi i ɣa tadfem tammurt mani i ɣa tzeddɣem, tammurt tenni d awem i ɣa wceɣ, 3 uca ad tesswejdem din ict n tewhibt n tmessi i SIDI, ict n tɣarṣt n wecmaḍ niɣ ict n tewhibt i tɣarṣt i ukemmeř n ijj n lwaɛd niɣ ict n tewhibt s řxaḍar niɣ ict n tewhibt i řeɛyudat nwem ittwaggen, maḥend ad tiři d ict n řefwaḥet ittfuḥen i SIDI, zi řebhayem niɣ zeg wuǧi, 4 xenni wenni dd ɣa issqarrben tawhibt nnes i SIDI, ad dd-issqarreb ɛawed ict n tewhibt n řɣiǧet zeg ict n teɛcart n yijj n ifa n waren azdad ixeǧḍen s yijj n arbeɛ n ijj n uhinu n zzect. ^■   5 Ad tesswejded ak-d man aya ijj n arbeɛ n ijj n uhinu n binu am tewhibt n useyyeb i yijj n izmar maḥend ad tiři x tɣarṣt n wecmaḍ niɣ x tewhibt i tɣarṣt, 6 niɣ, mařa ad tiři i yijj n icarri, xenni ittxeṣṣa ad tesswejded ict n tewhibt n řɣiǧet zi tnayen n teɛcuray n ijj n ifa n waren azdad ixeǧḍen s ict n ttuřut n ijj n uhinu n zzect 7 uca ad dd-tessqarrbed ɛawed ict n ttuřut n ijj n uhinu n binu am tewhibt n useyyeb, am ict n řefwaḥet ittfuḥen i SIDI.

8 Xmi i ɣa tesswejded ameẓyan n ufunas am tɣarṣt n wecmaḍ niɣ am tewhibt i tɣarṣt maḥend ad yiři i ukemmeř n ijj n lwaɛd niɣ am tɣarṣt n řehna i SIDI, 9 xenni ittxeṣṣa ad dd-issqarreb ak-d umeẓyan n ufunas ɛawed ict n tewhibt n řɣiǧet n třata n teɛcuray n ijj n ifa n waren azdad ixeǧḍen deg wezyen n uhinu n zzect,

10 uca ittxeṣṣa ɛawed ad dd-tawid azyen n uhinu n binu am tewhibt n useyyeb, am tewhibt n tmessi, ict n řefwaḥet ittfuḥen i SIDI.

11 Ammu i ɣa ittwagg i kuř afunas, niɣ i kuř icarri, niɣ i kuř ijj zeg wuǧi, zeg iḥuřiyyen niɣ zeg iɣayḍen.

12 Ɛlaḥsab řqedd n imuddaren i tɣarṣt i ɣa tesswejdem, ad teggem ammu i kuř ijj n umuddar, ɛlaḥsab řqedd n imuddaren.

13 Marra inni dd-ittwaxeřqen di temmurt ad ggen timesřayin-a ammu xmi dd ɣa ssqarrben nitni ict n tewhibt n tmessi, ict n řefwaḥet ittfuḥen i SIDI.

14 Xmi i ɣa tafed jar marra jjiřat nwem ijj n ubarrani iqqimen akidwem, niɣ ijjen wenni izeddɣen di řwest nwem, aqa netta ad issewjed ict n tewhibt n tmessi, ict n řefwaḥet ittfuḥen i SIDI, xenni ad tt igg am mammec tt tᵉtteggem kenniw.

15 A agraw n řgens, ad din tiři d ict n tewṣeyyet, ict n tewṣeyyet i řebda i kenniw u i ubarrani nni iqqimen akidwem i marra jjiřat nwem. Ad yiři ubarrani amecnaw mammec teǧam kenniw zzat i wudem n SIDI. ^■  

16 Ad yiři ijj n uzerf d ict n lfariḍa i kenniw u i ubarrani wenni akidwem iqqimen.”

17 Issiweř SIDI ak-d Musa, inna:

18 “Siweř ak-d ayt n Israil uca ini asen: ‘Xmi i ɣa tadfem tammurt mani kenniw i ɣa y awyeɣ,

19 xenni ad imsar, umi ɣa teccem aɣrum n temmurt, aqa kenniw ad tessgeɛɛdem ict n tewhibt n usgeɛɛed i SIDI. 20 Zi tmezwarut n warecti nwem ad tessgeɛɛdem ict n temsemment am tewhibt n usgeɛɛed. Ad tt tessgeɛɛdem amecnaw mammec tessgeɛɛdem tawhibt n usgeɛɛed n unedrar. 21 Zi tmezwarut n warecti nwem ad tqeddmem ict n tewhibt n usgeɛɛed i SIDI di marra jjiřat nwem.

22 Mařa tweddarem u war tᵉtteggem marra řumurat-a nni tuɣa issawař SIDI ak-d Musa, 23 marra min d awem yumur SIDI s ufus n Musa, zeg wass min zi t yumur SIDI, ssenni d tsawent di marra rejyuř nwem, 24 xenni ad imsar, mařa ittwagg s uweddar barra i tiṭṭawin n tmesmunt, aqa tamesmunt marra ad tessewjed ijj n uyenduz, ameẓyan n ufunas, am tɣarṣt n wecmaḍ am ict n řefwaḥet ittfuḥen i SIDI ak-d tewhibt nnes n řɣiǧet d tewhibt nnes n useyyeb ɛlaḥsab lfariḍa u ak-d yijj n iɣayḍ d ameẓyan am tɣarṣt n ddenb. 25 Xenni ad ifdi ukehhan x marra tamesmunt n ayt n Israil uca ad asen ittwaɣfar, minzi man aya imsar zeg uweddar, uca nitni qeddmen tawhibt nsen, ict n tewhibt n tmessi i SIDI, uřa d taɣarṣt nsen n ddenb, zzat i wudem n SIDI. ^□   26 Marra tamesmunt n ayt n Israil ad tᵉttwaɣfar, uřa d abarrani wenni izeddɣen di řwest nwem, x umi imsar am iweddar marra řgens.

27 Mařa ca n bnadem ixḍa am netta iweddar, xenni ad dd-issqarreb ict n tɣayḍet n ijj n useggʷas am tɣarṣt n ddenb. ^□  ■   28 Ad ifdi ukehhan zzat i wudem n SIDI x bnadem nni tuɣa iweddar, am tuɣa ixḍa s uweddar zzat i wudem n SIDI, ḥima ad xas ifdi uca ad as ittwaɣfar.

29 Ad din yiři ijj n uzerf i wenni iggin ca s uweddar, i wenni dd-ixeřqen di temmurt uřa i ubarrani wenni izeddɣen di řwest nwem.

30 Maca bnadem nni iggin ca s ufus igeɛɛden, ma netta ittwaxřeq-dd di temmurt niɣ netta d abarrani, aqa netta iceqqef di SIDI uca bnadem nni ad ittwaqess zi řwest n řgens nnes, ^□   31 umi isseḥqar awař n SIDI u yarẓa řumur nnes. Bnadem nni ad ittwaqess qaɛ. Řmuɛṣiyyet nnes ad tiři xas.

32 Řami tuɣa ayt n Israil di řexřa, ufin ijj n weryaz ittḥarwac akeccuḍ deg wass n ssebt. 33 Inni t yufin am tuɣa ittḥarwac akeccuḍ, iwyen t ɣar Musa d Harun d marra tamesmunt. 34 Ggin t di tḥeṭṭut, minzi tuɣa war dd-ibin min zzayes ɣa ggen. ^■   35 Xenni inna SIDI i Musa: “Aryaz nni ad ittwaneɣ nican. Marra tamesmunt ad t tarjem barra i řmargeḥ n řɛeskar.” 36 Xenni tessuffeɣ i-t marra tmesmunt barra i řmargeḥ n řɛeskar uca nitni arejmen t ařami immut, am mammec t yumur SIDI i Musa.

37 Issiweř SIDI ak-d Musa, inna:

38 “Siweř ak-d ayt n Israil uca ini asen, ad ggen i yixef nsen ticarcifa ɣar tmuwwa n warruḍ nsen di marra jjiřat nsen uca ad ggen ijj n ufiřu d adeḥmi ɣar tcarcifa nni ɣar tmuwwa. ^■   39 Ad yiři ufiřu ɣar tcarcift ḥima ad t tᵉttwařam uca ad tidarem di marra řumurat n SIDI uca ad tent teggem u war tḍeffarem uřawen nwem d tiṭṭawin nwem inni awarni asen tennumem ad tessefsedem ixef nwem, 40 uca ad yiři ḥima ad txarrṣem di řumurat inu, ad zzaysent teggem, maḥend ad tiřim tᵉttwaqeddsem zzat i AREBBI nwem. 41 Necc d SIDI, AREBBI nwem wenni kenniw dd-issuffɣen zi temmurt n Miṣra ḥima ad iřiɣ d AREBBI nwem. Necc d SIDI, AREBBI nwem!”