1 Marra tamesmunt tebda tesɣuyyu s jjehd uca řgens iru marra ǧiřet nni. 2 Marra ayt n Israil tuɣa ttnedqamen ḍidd i Musa u ḍidd i Harun uca tenna as marra tmesmunt: “Meɛlik qaɛ nemmut di temmurt n Miṣra!” niɣ: “Meɛlik qaɛ nemmut di řexřa-ya!” 3 “Mayemmi i d aneɣ dd-yiwi SIDI ɣar temmurt-a ḥima ad newḍa s ssif u xenni ad dd-dewřent temɣarin nneɣ d tarwa nneɣ d takeccaḍt? Ma war yeǧi ḥsen zeɛma ad neɛqeb ɣar Miṣra?” 4 Uca nnan ijj i wenneɣni: “Ejj aneɣ ad negg ijj d azeǧif xaneɣ uca ad neɛqeb ɣar Miṣra!”

5 Xenni Musa d Harun wḍan x uɣembub nsen zzat i wudem n marra agraw n tmesmunt n ayt n Israil. 6 Yacuwa, mmis n Nun, d Kalib, mmis n Yafunni, nni tuɣa zeg inni tuɣa ittbergagen x temmurt, carrgen arruḍ nsen. 7 Nitni ssiwřen ɣar marra tamesmunt n ayt n Israil, nnan: “Tammurt nni x nekka maḥend ad tt nbergeg, aqa-tt d ict n temmurt mliḥ aṭṭas. 8 Mařa SIDI issfarnen ɣarneɣ, Netta ad aneɣ-dd yawi ɣar temmurt-a uca ad aneɣ tt iwc, ict n temmurt ifeyyḍen s uɣi d tamment. 9 Maca war ttiřim d imɣewwɣen ḍidd i SIDI uca war tteggʷedem ca zi řgens n temmurt-a, minzi aqa aten d aɣrum nneɣ. Tiři nsen teffeɣ-dd zi sennej nsen, aqa SIDI akidneɣ, war zzaysen tteggʷdem ca!”^■  

10 Uca xenni marra tamesmunt tessiweř belli ittxeṣṣa ad ten arejmen, iban-dd uɛuǧi n SIDI deg Uqiḍun n Umsagar zzat i marra ayt n Israil.

11 Inna SIDI i Musa: “Ař meřmi i d ayi ɣa isɛar řgens-a? Ař meřmi war d ayi ttimnen s marra řeɛřamat nni ggiɣ di řwest nsen?

12 Necc ad t wteɣ s ṭṭaɛun uca ad xasen kkseɣ řwart uca ad cek ggeɣ d ijj n řgens d ameqqran u ijhed xasen.”

13 Inna Musa i SIDI: “Ad sřen Imiṣriyyen man aya, minzi Cek tessuffɣed řgens-a s jjehd nnek zi řwest nsen ^■  

14 uca ad t inin i imezdaɣ n temmurt-a, inni isřin belli Cek, a SIDI, di řwest n řgens-a, belli Cek, a SIDI, tbaned-dd amecnaw udem deg wudem, belli aseynu nnek ittbedda sennej nsen u belli Cek teggured zzat i wudem nsen deg ijj n uqellij n useynu s uziř uca s ǧiřet deg ijj n uqellij n tmessi. ^□  ■  

15 Mařa tenɣid řgens-a amecnaw ijj n weryaz, xenni řegnus nni isřin x usemɣar nnek ad ssiwřen ad inin:

16 ‘Minzi SIDI war izemmar ad issidef řgens-a di temmurt nni x ijjuǧ ad asen tt iwc, aqa s uyenni d asen iɣarṣ di řexřa!’ ^■  

17 Řexxu xenni, ejj ad yiři jjehd n Sidi inu imɣar am mammec tuɣa tessiwřed, tennid:

18 ‘SIDI ɣares ttasiɛ n řxaḍar uřa d aṭṭas n tmexsiwt icewwaren. Aqa yarebbu řmuɛṣiyyet d uxeṭṭu nneɣ u Netta war ittbarri wenni itteggen ddenb u isseɛɛdu řmuɛṣiyyet n ibabaten ɣar iḥenjiren nnes ař jjiř wiss třata d jjiř wiss arebɛa.’ ^■  

19 Ɣfar i řgens-a řmuɛṣiyyet nnes ɛlaḥsab řemɣaret n tmexsiwt nnek icewwaren u amecnaw mammec tarebbud řgens-a řexxu ɛad zi temmurt n Miṣra ař danita!”

20 Uca inna SIDI: “Necc ɣfareɣ asen ɛlaḥsab awař nnek. 21 S tidett am ddareɣ Necc, aqa marra tammurt ad tᵉttwaccur s uɛuǧi n SIDI! 22 Minzi marra iryazen inni iẓrin aɛuǧi inu d řeɛřamat inu i ggiɣ di Miṣra u di řexřa, d yenni d ayi iqeǧben di řexřa ɛad ɛecra n twařawin u war sřin i tmijja inu, 23 war ẓarren tammurt nni x jjuǧeɣ i babatsen ad asen-tt wceɣ, wah, marra inni d ayi issdduqzen ammu, war t ẓarren. ^■   24 Maca ad ssidfeɣ amsexxar inu Kalib ɣar temmurt mani tuɣa yudef qbeř uca ad tt warten tarwa nnes minzi tuɣa dayes ijj n arruḥ nneɣni uca netta iḍfar ayi mliḥ nican. ^■   25 Aqa Iɛamaliqiyyen d Ikenɛaniyyen zeddɣen di řewḍa n teɣzurt. Ad dd-tdewřem tiwecca uca ad tekksem iqiḍan nwem ssa, ffɣem ɣar řexřa, uyurem deg webrid ɣar Řebḥar n Telga.”

26 Issiweř SIDI ak-d Musa d Harun, inna:

27 “Ař meřmi i ɣa teqqim tmesmunt-a taɛeffant tᵉttnedqam xafi? Anedqem n ayt n Israil i zi xafi ttnedqamen, aqa sřiɣ t. ^■   28 Ini asen: ‘S tidett am ddareɣ Necc, issawař SIDI, mařa war d awem tteggeɣ am mammec d awem sřiɣ s imezzuɣen inu min tennam kenniw. ^■   29 Řxecbat nwem ad wḍant di řexřa-ya, řxecbat n marra inni ittwaḥesben, marra řqedd n iḥenjiren nwem zi ɛicřin iseggʷusa sennej nni tuɣa xafi ittnedqamen. ^■   30 Kenniw war tᵉttidfem ca tammurt min xef ssgeɛɛdeɣ afus inu maḥend ad jjaǧeɣ ad kenniw ggeɣ ad dayes tzedɣem, mɣir Kalib, mmis n Yafunni, d Yacuwa, mmis n Nun. ^■   31 Tarwa nwem i xef tennam: ‘Ad ttwakeccḍen!’, Necc ad ten ssidfeɣ dayes uca nitni ad ssnen tammurt nni tenḍarem kenniw ammu s useḥqar. 32 Maca řxecbat nwem, wah kenniw simant nwem, ad tewḍam di řexřa aya 33 uca iḥenjiren nwem ad tellɛen di řexřa aya řmijař n arebɛin n iseggʷusa uca kenniw ad kiwem tarbum farq-ccɣeř nwem ař ɣa fnant řxecbat nwem di řexřa. 34 Anect i řqedd n wussan i tuɣa ttbergagem tammurt, iqqar arebɛin n wussan, aqa ijj n wass d ijj n useggʷas, ad tarbum řmuɛṣiyyet nwem, řmijař n arebɛin n iseggʷusa. Kenniw ad tessnem aqa Necc beɛɛdeɣ xawem. ^■   35 Necc d SIDI ssiwřeɣ: ‘Mařa war tteggeɣ ammu ak-d marra tamesmunt-a taɛeffant tenni ikksen awař xafi: ad mmten di řexřa-ya, ad mmten din!’ ”

36 Iryazen nni issekk Musa maḥend ad bergagen tammurt, řami dd-dewřen, arrin tamesmunt marra ad nnedqem nitni ḍidd nnes umi nitni behdřen tammurt, 37 aqa iryazen nni ibehdřen tammurt, mmuten s ict n jjriḥect zzat i wudem n SIDI. ^■   38 Maca Yacuwa, mmis n Nun, d Kalib, mmis n Yafunni, qqimen ddaren jar iryazen nni iruḥen ad bergagen tammurt.

39 Issiweř Musa awařen-a ɣar marra ayt n Israil. Iḥzen xenni řgens aṭṭas. 40 Uca nitni kkaren zic uca uřyen ař taqiccat n wedrar, nnan: “Aqa-neɣ da uca ad nessgeɛɛed ɣar wemcan min xef issiweř SIDI, minzi neccin aqa nexḍa!” 41 Maca Musa inna: “Mayemmi txeṭṭam ammu řumur n SIDI? Man aya war iɛeddu! ^■   42 War ttgeɛɛadem ca minzi SIDI war ittiři di řwesṭ nwem. War tejjam ixef nwem ad texṣarem zzat i wudem n řɛedyan nwem. 43 Minzi Iɛamaliqiyyen d Ikenɛaniyyen aqa aten din zzat nwem uca ad tewḍam kenniw s ssif minzi kenniw tiggʷejem x SIDI, zi man aya SIDI war kiwem ittiři.” 44 Maca waxxa amenni, nitni tuɣa ttuffen maḥend ad dd-ařyen ař taqiccat n wedrar. Maca Ttabut n Řɛahd n SIDI d Musa war ffiɣen zi řwest n řmargeḥ n řɛeskar. 45 Xenni hwan-dd Iɛamaliqiyyen d Ikenɛaniyyen nni tuɣa izeddɣen deg wedrar nni uca arenyen ten u řebzen ten ař Ḥurma.