1 Issiweř SIDI ak-d Musa, inna:

2 “Sekk iryazen zzatek ḥima ad berggen tammurt n Kenɛan, tenni i ɣa wceɣ i ayt n Israil. Zi kuř taqbič n ibabaten ad tessekkem ijj n weryaz, kuř ijj ad yiři d amɣar jar asen. ^□   3 Musa issekk i-ten di řexřa n Faran, x řumur n SIDI. Tuɣa marra iryazen d izeǧifen n ayt n Israil. 4 Aqa d ina d ismawen nsen:

Zi teqbič n Rubin, Cammuɛ, mmis n Zakkur.

5 Zi teqbič n Cimɛun, Cafat, mmis n Ḥuri.

6 Zi teqbič n Yahuda, Kalib, mmis n Yafunni.

7 Zi teqbič n Issakar, Yijɛal, mmis n Yusuf.

8 Zi teqbič n Ifrayim, Hucaɛ, mmis n Nun. ^□  

9 Zi teqbič n Binyamin, Falṭi, mmis n Rafu.

10 Zi teqbič n Zabulun, Jaddiyil, mmis n Sudi.

11 Zi teqbič n Yusuf, i teqbič n Manassa, Jaddi, mmis n Susi.

12 Zi teqbič n Dan, Ɛammiyil, mmis n Jamalli.

13 Zi teqbič n Acir, Satur, mmis n Mixayil.

14 Zi teqbič n Naftali, Nahbi, mmis n Wafsi.

15 Zi teqbič Jad, Ja’uyil, mmis n Maki.

16 Aqa ina d ismawen n yeryazen nni issekk Musa ḥima ad bergagen tammurt uca Musa iřaɣa i Huciɛa, mmis n Nun, s yisem n Yacuwa.

17 Issekk i-ten Musa ḥima ad bergagen tammurt n Kenɛan, inna asen: “Ařyem ssiha ař Tammurt n Ljanub uca ařyem xenni ɣar idurar

18 uca xzarem mammec teǧa temmurt d řgens i dayes izeddɣen, ma ijhed niɣ iḍɛef i yeǧa, ma aqa din drus niɣ aṭṭas.

19 Xzarem mammec teǧa tammurt i di izeddeɣ řgens, ma tammurt d taṣebḥant niɣ d taɛeffant i teǧa, u mammec ǧant tneddam i di izeddeɣ řgens, ma zeddɣen di řemrageḥ n iqiḍan niɣ di tneddam ifaryen s iɣebřawen. 20 U ɛawed mammec teǧa temmurt, ma tessɣemmi niɣ tuẓeɣ, ma aqa din ticejjura niɣ lla. Ggem taryast uca ksim ca zi řɣiǧet n temmurt. Ussan nni tuɣa aten d ussan n tmenzut n uḍiř. 21 Uca nitni geɛɛden uca bergagen tammurt zi řexřa n Ṣin ař Raḥub, mani i ɣa tiwḍed ɣar Ḥamat. 22 Gaɛɛden ɛad ktar ɣar Temmurt n Ljanub uca iwḍen ɣar Ḥabrun. Dinni i tuɣa Aximan, Cicay d Talmay, nitni d iḥenjiren n Ɛanaq. Ḥabrun tuɣa tᵉttwabna sebɛa n iseggʷusa qbeř Ṣuɛan di Miṣra. 23 Xenni iwḍen ař taɣzurt n Ackul uca ssenni kksen ict n tezremt s yijj n uzekkun n uḍiř wenni dd-iwyen s tnayen s yijj n uzeǧaḍ n trebbut. Kksen ɛawed zeg aremmam u zi tazart. ^□   24 Qqaren as i wemcan nni ‘taɣzurt n teɣzart n Ickul’, isem wanita ixs ad yini ‘taɣzurt n uzekkun’, di ssibbet n uzekkun n uḍiř nni qessen ayt n Israil din.

25 Umi kemmřen arebɛin n wussan, dewřen-dd zeg ubergag n temmurt. 26 Ɛeqben nitni uca usin-dd ɣar Musa d Harun u ɣar marra tamesmunt n ayt n Israil di řexřa n Faran, ɣar Qadac, uca wcin řexbar i marra tamesmunt uca ssecnen asen řɣiǧet n temmurt. ^□   27 Ḥajan as uca nnan: “Aqa nudef ɣar temmurt nni mani dd aneɣ tessekked. S tidett tfeyyeḍ s uɣi d tamment u tanita d řɣiǧet nnes. ^■   28 Maca řgens, nni izeddɣen di temmurt, ijhed u tineddam ɣarsent iɣebrawen u mɣarent aṭṭas u neẓra ɛawed din arraw n Ɛanaq. 29 Iɛamaliqiyyen zeddɣen di Temmurt n Ljanub n temmurt u Iḥittiyyen d Iyabusiyyen d Imuriyyen zeddɣen deg idurar u Ikenɛaniyyen zeddɣen ɣar řebḥar u x tma n L'Urdun. 30 Xenni issesqar Kalib řgens zzat i Musa, inna: “Ejj aneɣ ad ngeɛɛed s jjehd uca ad tt neṭṭef d řwart, minzi nzemmar as neccin!” 31 Iryazen nni geɛɛden akides, nnan: “War nzemmar ad ngeɛɛed ḍidd i řgens nni, minzi aqa ijhed xaneɣ aṭṭas.” 32 Ammu i dd-iwyen ijj n řexbar war iḥřin i ayt n Israil x temmurt nni x tuɣa ttbergagen, nnan: “Tammurt x manis nekka ḥima ad tt nbergeg, aqa d ict n temmurt nni tsarreḍ imezdaɣ nnes uca marra iwdan nni neẓra, aqa aten d iryazen n waddad imɣar. 33 Aqa neẓra din ‘nifilim’, ixs ad yini ‘jjwaheř iwḍan’, ayt n Ɛanaq, arrasa n jjwaheř iwḍan, uca tuɣa neccin di tiṭṭawin nneɣ amecnaw tamurɣi, uca ammu i dd asen nettban di tiṭṭawin nsen.” ^□