1 Maryam u Harun ɛawed ssiwřen x Musa di ssibbet n temɣart Takucit nni tuɣa dd-yiwi, minzi netta yiwi-dd ict n temɣart Takucit. ^□   2 Uca nnan: “Ma issiweř SIDI zi Musa waha? Ma war zzayneɣ issiweř ɛawed?” Uca isřa SIDI man aya. 3 Tuɣa Musa d aryaz amwaḍeɛ aṭṭas, ktar zi marra iwdan i iddaren x temmurt. 4 Deɣya issiweř SIDI ak-d Musa d Harun d Maryam: “Ffɣem kenniw s třata, uyurem ɣar Uqiḍun n Umsagar!” Uca ffɣen-dd s třata. 5 Xenni ihwa-dd SIDI deg uqellij n useynu uca ibedd ɣar wadaf n Uqiḍun, iřaɣa i Harun d Maryam. Ffɣen-dd nitni s tnayen. 6 Uca inna asen Netta: “Sřem xenni i wawařen inu! Mařa din jar awem ijj n unabi, ad as ssecneɣ Necc, SIDI, Ixef inu s ict n tmeẓriwt uca ad kis ssiwřeɣ s ict n tarjit. 7 Maca war tteggeɣ amenni s umsexxar inu Musa, aqa netta d amtiqqi di taddart inu tekmeř. 8 Necc ssiwřeɣ akides zeg uqemmum ɣar uqemmum, war iǧi s řemɛani innufaren. Aqa iẓra addud n SIDI. Mayemmi war teggʷidem zeg umsexxar inu u mayemmi i tessiwřem ammu x Musa?” ^■  

9 Xenni yarɣa xasen weɣḍab n SIDI uca iruḥ

10 uca aseynu iffeɣ x Uqiḍun uca xzar, Maryam dayes řehřac n řbarṣ, aqa-tt d tacemřařt am wedfeř. Uca Harun inneqřeb-dd ɣar Maryam, u xzar, aqa nettat dayes řbarṣ.

11 Uca inna Harun i Musa: “A, sidi inu, war xaneɣ srussi ddenb i negga s tefɣuri umi dayes nexḍa!

12 War tt ttejji ad tedweř amecnaw amettin i zi ittwacc řxecbet nnes am dd-teffeɣ zi řemřawet n yemmas.”

13 Iřaɣa Musa i SIDI, inna: “A Arebbi, ttzawgeɣ ad tt tessgenfid!”

14 Inna SIDI i Musa: “Ma mařa babas aqa inxar deg wudem nnes, ma war tᵉsseḍḥi sebɛa n wussan? Ejj i-tt ad tᵉttwasuffeɣ zi řmargeḥ n řɛeskar sebɛa n wussan uca awarni as ad tᵉttwaqbeř ɛawed.”

15 Tᵉttwassuffeɣ Maryam sebɛa n wussan barra i řmargeḥ n řɛeskar uca řgens war ikkis iqiḍan nnes ařami tᵉttwaqbeř Maryam ɛawed.

16 Awarni man aya ifsi řgens iqiḍan nnes, yuyur zi Ḥaḍayrut uca wtin iqiḍan nsen di řexřa n Faran.