1 Imsar umi řgens idweř amecnaw ijj n ubarru ittcetcan, igga as řeḥriq i imezzuɣen n SIDI. Řami isřa SIDI aya, yarɣa weɣḍab nnes u timessi n SIDI tarɣa di řwest nsen uca tecca řeḍruf n řmargeḥ n řɛeskar. ^■   2 Xenni iřaɣa-dd řgens x Musa uca Musa iẓẓuǧ i SIDI uca texsi tmessi. 3 Uca iřaɣa as i wemcan nni ‘Tabɛira’, minzi timessi n SIDI tuɣa tarɣa di řwest nsen.

4 Abarru imxeǧaḍen n ibarraniyyen nni iǧan di řwest nsen, ttwacurren s umeẓri u bdan ayt n Israil ɛawed ad sɣuyyen uca nnan: “Wi d aneɣ i ɣa iwcin aysum?” ^■   5 Nɛeqqeř ɛad x iseřman nni necca di Miṣra baṭeř u x řexyar d ddellaɛ d řebṣeř yuẓɣen d řebṣeř d ticcart. 6 Řexxu řeɛmur nneɣ uẓɣen uca war din walu mɣir ‘manna’ aya zzat i tiṭṭawin nneɣ!” 7 Tuɣa ‘manna’ amecnaw zzariɛet n řqeṣbur uca ccuf nnes amecnaw ccuf n řebxur n ssudan. ^■   8 Řgens iffeɣ, immsebḍa uca yrun tt uca ḥaryen tt sadu tsirt niɣ ddzen tt s wezduz uca xenni sseggʷen tt di arwa uca ggin zzayes tifḍirin. Tuɣa aředdi nnes amecnaw min iggʷan s zzect. 9 Xmi dd-ihekkwa nnda x řmargeḥ n řɛeskar, xenni tḥekkʷa-dd xas ‘manna’ ɛawed.

10 Uca isřa Musa aqa řgens isɣuy, řaǧ awarni inneɣni, kuř ijj ɣar wadaf n uqiḍun nnes. Yarɣa weɣḍab n SIDI aṭṭas uca tuɣa man aya d tuɛeffna di tiṭṭawin n Musa ɛawed.

11 Inna Musa i SIDI: “Mayemmi teggid řɣar deg umsexxar nnek u mayemmi war ufiɣ řxaḍar di tiṭṭawin nnek, umi xafi dd-tessarsed ddqeř n marra řgens-a?

12 Ma necc deyseɣ balak s marra řgens-a? Niɣ necc i t-i-dd yurwen, maḥend ad tzemmared ad ayi tinid: ‘Awyi t deg wecyun nnek!’, amecnaw wenni issuṭṭuḍen yarbun aseymi ɣar temmurt min xef tejjuǧed Cek i babatsen umi tewcid awař?

13 Zi manis d asen-dd i ɣa awyeɣ aysum i ɣa wceɣ macca i marra řgens-a? Minzi nitni sɣuyyun-dd ɣari, qqaren: ‘Ewc aneɣ aysum i ɣa necc!’

14 Necc weḥḥdi war zemmareɣ ad arbuɣ řgens-a marra, aqa man aya idqeř xafi aṭṭas.

15 Mařa teggid ayi Cek ammu, necc ttzawgeɣ ad ayi tenɣed ḥsen, mařa ufiɣ arḍa di tiṭṭawin nnek, xenni necc war ẓarreɣ řeɣben inu ɛad ktar!”

16 Xenni inna SIDI i Musa: “Smun ayi-dd sebɛin n yeryazen zeg imɣaren n Israil, inni tessned cek d imɣaren n řgens d iweqqafen. Awyi ten-dd ɣar Uqiḍun n Umsagar uca ad din bedden zzatek.

17 Xenni Necc ad hwiɣ uca ad kik ssiwřeɣ. Ad ksiɣ zi Arruḥ i xak iǧan uca ad xasen t ssarseɣ uca ad kik arbun ddqeř n řgens-a maḥend war t tarebbud ca weḥḥdek.

18 Ad tinid i řgens: ‘Sqeddsem ixef nwem i tiwecca, xenni ad teccem aysum, minzi aqa trum deg imezzuɣen n SIDI uca tennam: Wi d aneɣ ɣa iwcen ad necc aysum? Tuɣa-neɣ mliḥ di Miṣra! S uya i d awem ɣa iwc SIDI aysum ad teccem.

19 War t tᵉttettem ijj n wass waha uřa d tnayen n wussan, niɣ xemsa n wussan, niɣ ɛecra n wussan, niɣ ɛicrin n wussan, 20 maca marra ussan n uyur ař d awem dd-iffeɣ zeg wenzaren uca ad zzayes tɛiffem, umi tenḍarem SIDI wenni iǧan di řwest nwem uca tennam: Mayemmi ɛad dd-neffeɣ zi Miṣra?’ ” ^■  

21 Uca Musa inna: “Řgens-a, di řwest nsen i ǧiɣ, aqa-t di setta-ařaf n yeryazen x iḍaren uca Cek teqqared: ‘Ad asen wceɣ aysum uca ad ccen ijj n uyur amen ikmeř!’ 22 Mařa ɣarṣen asen i wuǧi d ifunasen, ma ad yiři cfa asen? Niɣ mařa ssmunen asen marra iseřman n řebḥar, ma ad yiři cfa asen?” ^■   23 Inna SIDI i Musa: “Ma xenni yebri ufus n SIDI? Řexxu xenni, ad tẓard ma ad iqfeř awař nnes niɣ lla!” ^■  

24 Iffeɣ-dd Musa uca inna awařen n SIDI i řgens uca issmun sebɛin n yeryazen zeg imɣaren n řgens uca issbedd i-ten am dd-nnḍen i Uqiḍun. 25 Xenni ihwa-dd SIDI deg useynu uca issiweř akides uca iksi zi Arruḥ nni tuɣa xas uca issars i-t x sebɛin n yeryazen, x imɣaren. Uca imsar, umi tuɣa xasen Arruḥ, bdan ad nebban, maca awarni i uya war iqqim ɛad.

26 Uca qqimen tnayen n yeryazen di řmargeḥ n řɛeskar, ijjen qqaren as Ildad u wenneɣni qqaren as Midad uca Arruḥ n SIDI tuɣa-t xasen, minzi nitni aqa aten zeg inni yuran, maca war dd-ffiɣen ɣar Uqiḍun uca tuɣa ttnebban di řmargeḥ n řɛeskar. 27 Yuzzeř-dd ijj n uḥenjir uca ixebbar man aya i Musa, inna: “Ildad d Midad ttnebban di řmargeḥ n řɛeskar.” 28 Yarra Yacuwa, mmis n Nun, ijjen zeg ibřiɣen ittfarzen, inna: “Sidi inu, Musa, ḥarrem i-ten!” 29 Inna as Musa: “Ma cek tecḍared di ṭṭweɛ inu? Mři marra řgens n SIDI tuɣa-t marra d inabiyyen, iři igga xasen SIDI Arruḥ nnes!”

30 Idweř-dd Musa ɣar řmargeḥ n řɛeskar, netta d imɣaren n Israil.

31 Xenni yusa-dd ijj n usemmiḍ ittwassekkaren zi SIDI, indeh-dd tisekrin zi řebḥar uca inḍar i-tent x řmargeḥ n řɛeskar, ticři n webrid n ijj n wass ɣar ijj n tma d ticři n webrid ɣar tma nneɣni, deg wenneḍ n řmargeḥ n řɛeskar, ař ɛřayen tnayen n iɣaǧen x wudem n temmurt. ^■   32 Ikkar řgens uca yrun ass nni ikmeř d ǧiřet nni tekmeř d marra ass i t-i-dd iḍfaren yrun tisekrin. Wenni ɣares drus, iksi ɛecra iḥumiren. Bezzɛen tent qibač nsen x tiru i innḍen i řmargeḥ n řɛeskar. 33 Mintra aysum ɛad jar teɣmas nsen, qbeř ma ad t ffẓen, yarɣa weɣḍab n SIDI x řgens uca SIDI iwta řgens s ict n tecti temɣar aṭṭas. ^■   34 Isemma Musa amcan nni ‘Qabarut-Hata’awat’, minzi dinni i neḍřen řgens i tuɣa immeẓryen ammu. 35 Zi Qabarut-Hata’awat ikkes řgens iqiḍan nsen, uyuren ɣar Ḥaḍayrut uca qqimen di Ḥaḍayrut.