Řɣayṭat
10
1 Issiweř SIDI ak-d Musa, inna: 2 “Egg cek tnayen n řɣayṭat n nnuqart, s yijj n umarsu s wefḍis ad ten tegged uca ad iřint i ubarreḥ n tmesmunt u i usmuṭṭi n řemrageḥ n řɛeskar.
3 Xmi daysent i ɣa ṣuḍen, ad ɣarek tmun tmesmunt marra ɣar wadaf n Uqiḍun n Umsagar.
4 Xmi i ɣa ṣuḍen deg ijj zi tnayen nni, xenni mɣir imeqqranen, izeǧifen x řuřuf n Israil, i xak dd ɣa imunen.
5 Xmi i ɣa tṣuḍem s wesruddeḥ di řbuq, xenni ad mmuṭṭiyent řemrageḥ nni immarsen ɣar ccarq.
6 Xmi i ɣa tṣuḍem s wesruddeḥ di řbuq tnayen n twařawin, xenni ad mmuṭṭiyent řemrageḥ nni immarsen ɣar uɣezdis n ljanub. Ad ṣuḍen s wesruddeḥ umi ɣa muṭṭiyen zeg wemcan ɣar wemcan nneɣni.
7 I tmesmunt n wegraw n řgens ittxeṣṣa ad tṣuḍem di řɣayṭat, maca břa asruddeḥ.
8 Ad ṣuḍen ayt n Harun, ikehhanen, di řɣayṭat. Ad tiři d ict n tewṣeyyet i řebda i marra jjiřat nwem.
9 Xmi dd ɣa teffɣem ɣar garra di temmurt nwem ḥima ad tmenɣem ḍidd i weɣrim wenni dd kenniw ihekkweřen, xenni ad tṣuḍem s wesruddeḥ di řɣayṭat uca kenniw ad tᵉttwatidarem zzat i wudem n SIDI, AREBBI nwem, uca ad tᵉttwasnejmem zi řɛedyan nwem.
10 Ammu di kuř ijj n wass n řefraḥet u di řeɛyudat ittwaggen u deg umezwaru n iyuren nwem ad tṣuḍem di řɣayṭat xmi i ɣa tawyem tiɣarṣa n wecmaḍ nwem d tɣarṣa n uqadi nwem uca ammu i ɣa iřint di ṭṭweɛ nwem i řidaret zzat i wudem n AREBBI, Necc d SIDI, AREBBI nwem.”
Aggʷejji x wedrar n Sina
11 Imsar deg useggʷas wiss tnayen, deg uyur wiss tnayen, deg wass wiss ɛicrin n uyur, aqa ittwasgeɛɛed useynu zi sennej n Tzeddiɣt n Cchadet.
12 Uca fesyen ayt n Israil iqiḍan nsen, mmuṭṭiyen zeg wemcan ɣar wemcan zi řexřa n Sina uca ibedd-dd useynu di řexřa n Faran.
13 Ammu fesyen iqiḍan nsen twařa tamezwarut, x řumur n SIDI, x ufus n Musa.
14 D amezwaru tᵉttwakkes tɛeǧant n řmargeḥ n řɛeskar n ayt n Yahuda ɛlaḥsab tarbiɛin n řɛeskar nsen. Naḥcun, mmis n Ɛamminadab, tuɣa d azeǧif x řɛeskar. ■
15 Natanayil, mmis n Ṣuɣar, tuɣa d azeǧif x řɛeskar n teqbič n ayt n Issakar.
16 Iliyab, mmis n Ḥilun, tuɣa d azeǧif x řɛeskar n teqbič n ayt n Zibulun.
17 Awarni man aya tᵉttwahdem Tzeddiɣt uca fesyen ayt n Jarcun d ayt n Marari iqiḍan nsen uca arbun Tazeddiɣt.
18 Xenni tᵉttwakkes tɛeǧant n řmargeḥ n řɛeskar n Rubin ɛlaḥsab tarbiɛin n řɛeskar nsen. Iliṣur, mmis n Cadayur, tuɣa d azeǧif x řɛeskar nnes.
19 Calumiyil, mmis n Ṣuricadday, tuɣa d azeǧif x řɛeskar n teqbič n ayt n Cimɛun. 20 Ilyasaf, mmis n Daɛuyil, tuɣa d azeǧif x řɛeskar n teqbič n ayt n Jad.
21 Xenni fesyen Iqahatiyyen iqiḍan nsen uca arbun Zzawect Iqeddsen uca Ijarcuniyyen d Imarariyyen bnan Tazeddiɣt qbeř twasit nsen. ■
22 Awarni as tᵉttwakkes tɛeǧant n řmargeḥ n řɛeskar n ayt n Ifrayim ɛlaḥsab tarbiɛin n řɛeskar nsen. Ilicamaɛ, mmis n Ɛammihud, tuɣa d azeǧif x řɛeskar nnes. 23 Jamaliyil, mmis n Fadahṣur, tuɣa d azeǧif x řɛeskar n teqbič n ayt n Manassa. 24 Abidun, mmis n Jidɛuni, tuɣa d azeǧif x řɛeskar n teqbič n ayt n Binyamin.
25 Xenni tᵉttwakkes tɛeǧant n řmargeḥ n řɛeskar n ayt n Dan, am uɣezdis n marra řemrageḥ, ɛlaḥsab tarbiɛin n řɛeskar nsen. Axiɛazar, mmis n Ɛammicadday, tuɣa d azeǧif x řɛeskar nnes. 26 Fajɛiyil, mmis n Ɛukran, tuɣa d azeǧif x řɛeskar n teqbič n ayt n Acir. 27 Axiraɛ, mmis n Ɛinan, tuɣa d azeǧif x řɛeskar n teqbič n ayt n Zibulun.
28 Ammu i mmuṭṭiyen ayt n Israil iqiḍan nsen zeg wemcan ɣar wemcan, ɛlaḥsab řɛeskarat nsen, ammu i fesyen nitni iqiḍan nsen.
29 Inna Musa i Ḥubab, mmis n Raɛuyil, Amidyani, aḍeggʷař n Musa: “Neccin ad nemmuṭṭi ɣar wemcan i d aneɣ inna SIDI: ‘Necc ad awem t-i-dd wceɣ!’ As-dd akidneɣ, ad ac negg tcuni, minzi SIDI issiweř x Israil s řxir.” 30 Netta inna as: “Necc war ttriḥeɣ, maɣar ad uyureɣ ɣar temmurt inu u ɣar řaǧ inu.” 31 Uca netta inna as: “Ttzawgeɣ cek, war d aneɣ ttejji, minzi cek tessned mammec icuwwar ad newwet iqiḍan nneɣ. Cek aqa tdewřed aneɣ am mammec neqqar am tiṭṭawin. 32 Uca ad imsar, xmi i ɣa traḥed akidneɣ uca ad aneɣ dd-yas řxir i d aneɣ ɣa igg SIDI, aqa neccin ad ac negg tcuni.”
33 Uca fesyen iqiḍan nsen, uyuren zeg wedrar n SIDI ticři n třata n wussan. Ttabut n Řɛahd tuyur zzat i wudem nsen ticři n třata n wussan, ḥima ad yarzu x ijj n wemcan i arraḥet. 34 Deg uziř tuɣa aseynu n SIDI sennej nsen umi kksen iqiḍan nsen zi řmargeḥ n řɛeskar. 35 Řami tᵉttwasmuṭṭi Ttabut, temsar řebda belli Musa inna: “Kkar, a SIDI, ejj řɛedyan nnek ad mmzeǧaɛen u inni kenniw icarrhen ad arewřen zeg wudem nnek!” ■ 36 Ɣar ubeddi n Ttabut, inna: “Dweř-dd, a SIDI, ɣar ɛecra n řuřuf n řuřuf n Israil!”