1 Issiweř SIDI ak-d Musa di řexřa n Sina deg useggʷas wiss tnayen awarni řami ffɣen zi temmurt n Miṣra, deg uyur amezwaru, inna:

2 “Jjem ayt n Israil ad sswejden Taɣarṣt n Useɛdu di řweqt nnes ittwaggen. ^■   3 Deg wass wiss arbeɛṭac n uyur-a, jar beddu n wezyen n wass ař dd-tewḍa tmeddit, ittxeṣṣa ad tt tesswejdem di řweqt nnes ittwaggen. Ittxeṣṣa ad tt tesswejdem ɛlaḥsab marra tiweṣṣa d lfarayiḍ nnes.”

4 Issiweř Musa ak-d ayt n Israil, inna ittxeṣṣa asen ad sswejden Taɣarṣt n Useɛdu. 5 Uca nitni sswejden Taɣarṣt n Useɛdu deg wass wiss arbeɛṭac n uyur amezwaru di řexřa n Sina, jar beddu n wezyen n wass ař dd-tewḍa tmeddit, ɛlaḥsab marra min d as yumur SIDI i Musa, ammu i tt sswejden ayt n Israil.

6 Ca n yeryazen ttwasxemjen s řxecbet n ijj n bnadem immuten uca war zemmaren ad sswejden Taɣarṣt n Useɛdu. Deg wass nni qarrben-dd nitni zzat i wudem n Musa u zzat i wudem n Harun 7 uca nnan as yeryazen nni: “Neccin nexmej s řxecbet n ijj n bnadem immuten. Mayemmi i nettwasbedd ařami war nzemmar ad dd-nessqarreb tawhibt n SIDI deg wass nnes ittwaggen di řwest n ayt n Israil?” 8 Musa inna asen: “Qqimem tbeddem, ḥima ad sřeɣ min d awem ɣa yumur SIDI.”

9 Issiweř SIDI ak-d Musa, inna:

10 “Siweř ak-d ayt n Israil uca ini: ‘Mařa ḥed zzaywem niɣ zi jjiřat nwem i dd ɣa yasen ittwassexmej zi řxecbet n yijj n umettin, niɣ netta deg webrid d azirar, xenni ad issewjed ɛad Taɣarṣt n Useɛdu i SIDI.

11 Deg uyur wiss tnayen, deg wass wiss arbeɛṭac, jar beddu n wezyen n wass ař dd-tewḍa tmeddit, ad tt sswejden. Xenni ad tt ccen ak-d weɣrum břa antun u ak-d řebzar yarezgen.

12 War ttejjin zzayes walu ař ṣṣbeḥ uca war zzayes ttarezzan iɣes. Ittxeṣṣa ad tt sswejden ɛlaḥsab marra tiweṣṣa n Tɣarṣt n Useɛdu. ^■  

13 Mařa ijj n weryaz d amezdag nni war iǧin deg webrid, ad yejj ad issewjed Taɣarṣt n Useɛdu, xenni ad ittwaqess řeɛmar nni zi řgens nnes, minzi netta war dd-issqarreb ca tawhibt n SIDI di řweqt nnes ittwaggen uca aryaz nni ad yarbu ddenb nnes.

14 Mařa izdeɣ akidwem ijj n ubarrani wenni i ɣa isswejden Taɣarṣt n Useɛdu n SIDI, xenni ad issewjed Taɣarṣt n Useɛdu ɛlaḥsab tawṣeyyet n Taɣarṣt n Useɛdu u ɛlaḥsab lfariḍa nnes. Ad din tiři ict n tewṣeyyet i kenniw, i ubarrani ammu i wenni dd-ixeřqen di temmurt. ^■  

15 Deg wass min di tᵉttwasgeɛɛed Tzeddiɣt, idřa useynu Tazeddiɣt ak-d Uqiḍun n Cchadet u di ǧiřet iḍhar-dd x Tzeddiɣt amecnaw timessi ař ṣṣbeḥ. ^■  

16 Ammu i tuɣa řebda, aseynu idřa i-tt u di ǧiřet iḍhar-dd am tmessi.

17 Řami dd-igeɛɛed useynu zi sennej n Uqiḍun, xenni awarni aya fesyen ayt n Israil iqiḍan nsen u deg wemcan mani tuɣa dd-ibedd useynu, din i wtin ayt n Israil iqiḍan nsen.

18 Fesyen ayt n Israil iqiḍan nsen ɛlaḥsab řumur n SIDI uca x řumur n SIDI wtin iqiḍan nsen. Marra ussan tuɣa aseynu iqqim sennej i Tzeddiɣt, qqimen nitni zeddɣen din. ^■  

19 Řami dd-ibedd useynu aṭṭas n wussan sennej i Tzeddiɣt, ḥḍan ayt n Israil min d asen yumur SIDI uca war fesyen ca iqiḍan nsen.

20 Umi iqqim useynu cwayt n wussan sennej i Tzeddiɣt, xenni wtin nitni iqiḍan nsen ɛlaḥsab řumur n SIDI u x řumur n SIDI fesyen iqiḍan nsen ɛawed. 21 Mařa imsar belli aseynu ibedd din zi ǧiřet ař ṣṣbeḥ uca ittwasgeɛɛed xenni useynu di ṣṣbeḥ, xenni fesyen nitni iqiḍan nsen. Ma deg wass i iǧa niɣ di ǧiřet, xmi dd-igeɛɛed useynu, fesyen nitni iqiḍan nsen. 22 Uca mařa iqqim useynu ibedd sennej i Tzeddiɣt tnayen n wussan, niɣ ijj n uyur, niɣ aṭṭas n wussan, ařami i ɣa yarsa xas, xenni qqimen ayt n Israil, wtin iqiḍan nsen, war fesyen ca iqiḍan nsen. Mařa ittwasgeɛɛed useynu, xenni fesyen nitni iqiḍan nsen. ^■   23 X řumur n SIDI wtin iqiḍan nsen u x řumur n SIDI fesyen iqiḍan nsen. Aqa ḥḍan min d asen yumur SIDI, x řumur n SIDI, s ufus n Musa.