1 Issiweř SIDI ak-d Musa, inna:

2 “Siweř ak-d Harun uca ini as: ‘Xmi i ɣa tessirɣed tifawin, ittxeṣṣa sebɛa n tfawin ad wcent tafawt ɣar zzat n řqendiř.’ ” ^■  

3 Uca ammu i igga Harun. Ɣar zzat n řqendiř issirɣ tifawin nnes, am mammec d as yumur SIDI i Musa. 4 Tuɣa řqendiř d ict n ṣṣenɛet n wureɣ yeɛdeř s wefḍis. Zeg ufuḍ x uḍar nnes ař nnuwwarat nnes tuɣa ittwagg s wefḍis. Ɛlaḥsab amedya i d as isccen SIDI, ammu i iṣenneɛ řqendiř. ^■  

5 Issiweř SIDI ak-d Musa, inna:

6 “Ksi Ilawiyyen zi jar řwest n ayt n Israil uca sizdeg i-ten. 7 Ammu i d asen ɣa teggid ḥima ad ten tessizedged: Rucc i-ten s waman n usizdeg. Ittxeṣṣa asen ad ḥeffen marra arrimet nsen uca ad ssirden arruḍ nsen uca ad ssizdegen ixef nsen. 8 Xenni ad ksin ijj n uyenduz, ameẓyan n ufunas, ak-d tewhibt n řɣiǧet nnes n waren azdad ixeǧḍen s zzect u ɛawed ijj n uyenduz wiss tnayen, ameẓyan n ufunas, am tɣarṣt n ddenb. 9 Ad tawyed Ilawiyyen zzat i Uqiḍun n Umsagar uca ad tessmuned marra tamesmunt n ayt n Israil.

10 Ad dd-tessqarrbed Ilawiyyen zzat i wudem n SIDI uca ayt n Israil ad ssarsen ifassen nsen x Ilawiyyen.

11 Harun ad yejj ad hezzen Ilawiyyen zi ssa ɣar da zzat i wudem n SIDI am ict n tewhibt n wenhezzi di ṭṭweɛ n ayt n Israil. Nitni ad dewřen ttsexxaren di tsexxart n SIDI.

12 Ilawiyyen ad ssarsen ifassen nsen x izeǧifen n iyenduzen uca ad tesswejded ijj i tɣarṣt n ddenb d yijj i tɣarṣt n wecmaḍ i SIDI ḥima ad tefdid zzaysen x Ilawiyyen.

13 Ad tegged Ilawiyyen ad bedden zzat i wudem n Harun u zzat i wudem n iḥenjiren nnes uca ad ten tarred ad hezzen zi ssa ɣar da am ict n tewhibt n wenhezzi zzat i wudem n SIDI.

14 Ammu i ɣa tḥuzzed Ilawiyyen zi řwest n ayt n Israil ḥima ad iřin Ilawiyyen d inu. ^■  

15 Awarni man aya ad dd-asen Ilawiyyen ḥima ad sexxaren deg Uqiḍun n Umsagar. Ad ten tessizedged uca ad ten tarred ad hezzen zi ssa ɣar da am ict n tewhibt n wenhezzi,

16 minzi nitni ttwammewcen ayi nican zi řwest n ayt n Israil, uca ksiɣ ten Necc i Yixef inu deg wemcan n marra min yarezmen řemřawet d amezwaru, deg wemcan n umenzu zeg ayt n Israil marra.

17 minzi marra amenzu jar ayt n Israil aqa-t inu, zeg iwdan ammu zi řebhayem, zeg wass i di nɣiɣ Necc marra imenza di temmurt n Miṣra, ssqeddseɣ ten nitni i Necc. ^■  

18 Necc ksiɣ Ilawiyyen deg wemcan n marra imenza jar ayt n Israil. ^■  

19 Necc wciɣ Ilawiyyen am ijj n uriɣalu i Harun u i iḥenjiren nnes zi řwest n ayt n Israil maḥend ad ggen tasexxart n ayt n Israil deg Uqiḍun n Umsagar u maḥend ad fdin x ayt n Israil, ḥima war tᵉttiři jjriḥect x ayt n Israil xmi dd ɣa qarrben ayt n Israil ɣar Zzawect Iqeddsen.”

20 Musa d Harun d marra tamesmunt n ayt n Israil ggin ak-d Ilawiyyen ɛlaḥsab marra min d as yumur SIDI i Musa zi jjihet n Ilawiyyen, ammu i ggin ayt n Israil akidsen. 21 Ilawiyyen ssizdigen ixef nsen zi ddenb nsen uca ṣebbnen arruḍ nsen uca Harun yejja i-ten ad nhezzen zi ssa ɣar da am ict n tewhibt n wenhezzi zzat i wudem n SIDI uca Harun ifdi ten ḥima ad ten issizdeg. ^□   22 Awarni man aya usin-dd Ilawiyyen ḥima ad sexxaren deg Uqiḍun n Umsagar zzat i wudem n Harun u zzat i wudem n iḥenjiren nnes, am mammec d as yumur SIDI i Musa zi jjihet n Ilawiyyen, ammu i kidsen ggin.

23 Issiweř SIDI ak-d Musa, inna:

24 “Ta zi jjihet n Ilawiyyen: aqa ittxeṣṣa i kuř mmis n xemsa u-ɛicrin n iseggʷusa sennej ad dd-yas ḥima ad isexxar di řɛeskar di ṭṭweɛ n tsexxart n Uqiḍun n Umsagar 25 u umi yiweḍ ɣar xemsin n iseggʷusa iffeɣ zi řɛeskar n tsexxart u war iqqim ittsexxar ɛad ktar. 26 Ad iwc afus i yaytmas deg Uqiḍun n Umsagar ḥima ad xas ḥḍan, maca netta s yixef nnes war izemmar ad isexxar. Ammu i ɣa tegged ak-d Ilawiyyen zi jjihet n uḥeṭṭu i xasen ittwaggen.”