1 Ina d inni i dd-ittwaxeřqen zi Harun d Musa deg wussan nni issiweř SIDI ak-d Musa x wedrar n Sina. 2 Aqa d ina d ismawen n ayt n Harun: Nadab d amenzu, xenni Abihu, Aliɛazar d Itamar. ^■   3 Aqa d ina d ismawen n ayt n Harun, ikehhanen inni ittwadehnen u inni ittwařeqqmen am ikehhanen. 4 Maca Nadab d Abihu mmuten zzat i wudem n SIDI, umi qeddmen timessi tařɣibt zzat i wudem n SIDI di řexřa n Sina. War tuɣi ɣarsen arraw. S uya tuɣa Aliɛazar d Itamar sexxaren am ukehhan zzat i wudem n babatsen Harun. ^■  

5 Issiweř SIDI ak-d Musa, inna:

6 “Sqarreb-dd taqbič n Lawi uca egg i-ten zzat i wudem n ukehhan Harun, ḥima ad xas sexxaren. ^■   7 Ejj i-ten ad řhan tasexxart nnes d tsexxart n marra tamesmunt zzat i Uqiḍun n Umsagar, maḥend ad kemmřen řxedmet n Tzeddiɣt. 8 Ad ḥḍan x marra řeqcuɛ n Uqiḍun n Umsagar uca ad ṭṭfen aḥeṭṭu n ayt n Israil maḥend ad sexxaren di tsexxart n Tzeddiɣt. 9 Cek ad tewced Ilawiyyen i Harun u i warrawen nnes. Aqa d yina i d as immewcen i netta waha zeg ayt n Israil.

10 Ad třeqqmed Harun d iḥenjiren nnes maḥend ad ḥḍan x tukehhant. Abarrani wenni i dd ɣa iqarrben ad ittwaneɣ.”

11 Issiweř SIDI ak-d Musa, inna:

12 “Xzar, Necc ksiɣ Ilawiyyen zi řwest n ayt n Israil deg wemcan n imenza, marra inni yarezmen řemřawet d amezwaru jar ayt n Israil. Ilawiyyen ad iřin inu, ^■  

13 minzi kuř amenzu aqa inu. Deg wass min di wtiɣ marra imenza di temmurt n Miṣra, aqa ssqeddseɣ i Yixef inu marra imenza di Israil, zi bnadem ař řmař. Nitni ad iřin inu, Necc d SIDI!” ^■  

14 Issiweř SIDI ak-d Musa di řexřa n Sina, inna:

15 “Ḥseb ayt n Lawi, ɛlaḥsab taddart n ibabaten nsen, ɛlaḥsab řaǧat nsen. Marra iwetman nni iǧan d ijj n uyur sennej, ad ten teḥseb.”

16 Uca Musa iḥseb i-ten x řumur n SIDI, am mammec d as ittwaweṣṣa.

17 Tuɣa ina d ayt n Lawi ak-d ismawen nsen: Jarcun, d Qahat d Marari. ^■  

18 Tuɣa ina d ismawen n ayt n Jarcun, ɛlaḥsab řaǧat nsen: Libni d Cimɛi.

19 Ayt n Qahat, ɛlaḥsab řaǧat nsen: Ɛamram d Yiṣhar d Ḥabrun d Ɛuzziyil.

20 Ayt n Marari, ɛlaḥsab řaǧat nsen: Maḥli d Muci. Tuɣa ina d řaǧat n Ilawiyyen ttwasettfen ɛlaḥsab řaǧat nsen.

21 Ɣar Jarcun tuɣa teǧa řaǧ n Ilibniyyen d řaǧ n Icimɛiyyen. Tuɣa tina d řaǧat n Ijarcuniyyen. 22 Tuɣa řqedd n marra inni ittwaḥesben n marra iwetman zeg ijj n uyur sennej: tuɣa řqedd n yenni zzaysen ittwaḥesben sebɛa-ařaf u-xemsa-mya. 23 Wtint řaǧat n Ijarcuniyyen iqiḍan nsen ɣar ḍeffar n Tzeddiɣt, ɣar řɣarb . 24 Tuɣa Ilyasaf, mmis n Layil, d ameqqran n taddart n babatsen n řaǧat n Ijarcuniyyen. 25 Zi jjihet n Uqiḍun n Umsagar ḥḍan ayt n Jarcun x Tzeddiɣt, x Uqiḍun ak-d tseqqafin nnes, x warwaq ɣar wadaf n Uqiḍun n Umsagar, 26 x řizarat n řemraḥ d warwaq ɣar wadaf n řemraḥ i zi tᵉttwanneḍ Tzeddiɣt d uɛalṭar, u x ifiřan nnes, uřa x marra min i dd-ittasen ak-d tsexxart nni.

27 Zi Qahat tuɣa iqqars-dd řaǧ n Iɛamramiyyen d řaǧ n Iṣhariyyen d řaǧ n Iḥibruniyyen d řaǧ n Iɛaziyiliyyen Tuɣa tina d řaǧat n Iqahatiyyen. 28 Tuɣa řqedd n marra iwetman zeg ijj n uyur sennej temn-ařaf u-setta-mya. Nitni ḥḍan x Zzawect Iqeddsen. 29 Wtint řaǧat n ayt n Qahat iqiḍan nsen ɣar uɣezdis n Tzeddiɣt, ɣar ljanub. 30 Iliṣafan, mmis n Ɛuzziyil, tuɣa d ameqqran n taddart n babatsen n řaǧat n Iquhatiyyen. 31 Ad ḥḍan x Ttabut d tzewḍa d řqendiř d iɛalṭaren uca x řeqcuɛ n Zzawect Iqeddsen i ɣa ssxedmen u x uřeḥḥaf, wah ad ḥḍan x marra min i dd-ittasen ak-d tsexxart nni.

32 Tuɣa Aliɛazar, mmis n ukehhan Harun, d ameqqran qaɛ x marra imeqqranen n Lawi. Netta iṭṭef acbar x yenni tuɣa iḥeṭṭan x Zzawect Iqeddsen.

33 Zi Marari tuɣa iqars řaǧ n Imaḥliyyen d řaǧ n Imuciyyen. Tuɣa tina d řaǧat n Marari. 34 Tuɣa řqedd n yinni zzaysen ittwaḥesben, n marra iwetman zeg ijj n uyur sennej, setta-ařaf u-mitayn. 35 Tuɣa Suriyil, mmis n Abixayil, d ameqqran n taddart n babatsen n řaǧat n Marari. Nitni wtin iqiḍan nsen ɣar uɣezdis n Tzeddiɣt, ɣar ccamal. 36 Ayt n Marari ad ṭṭfen acbar maḥend ad wcen taynit i marra tifeřwin n Tzeddiɣt, i tḥenya n uɛarreḍ, i ipilaren nnes, i tyarsawin nnes u i marra řeqcuɛ nnes, wah i marra min dd-ittasen ak-d tsexxart nni, 37 uřa i ipilaren nni dd-innḍen i řemraḥ ak-d tyarsawin nsen d řewtad nsen d ifiřan nsen.

38 Musa d Harun ak-d iḥenjiren nnes wtin iqiḍan nsen zzat i wudem n Tzeddiɣt, zzat i wudem n Uqiḍun n Umsagar, ɣar ccarq manis dd-tneqqar tfuct, uca nitni ḥḍan x Zzawect Iqeddsen di ṭṭweɛ n ayt n Israil. Abarrani wenni dd-iqarrben, tuɣa ittxeṣṣa ad ittwaneɣ. ^■  

39 Marra inni ittwaḥesben n Ilawiyyen, inni iḥseb Musa ak-d Harun ɛlaḥsab řumur n SIDI, ɛlaḥsab řaǧat nsen, marra iwetman zeg ijj n uyur sennej, aqa aten di tnayen u-ɛicrin-ařef.

40 Inna SIDI i Musa: “Ḥseb marra imenza n iwetman n ayt n Israil, zeg ijj n uyur sennej, uca ksi řqedd n ismawen nsen. 41 Ad teksid Ilawiyyen i Necc deg wemcan n marra imenza jar ayt n Israil uřa d řebhayem n Ilawiyyen deg wemcan n marra imenza jar řebhayem n ayt n Israil, Necc d SIDI!” 42 Uca Musa iḥseb marra imenza jar ayt n Israil am mammec i d as yumur SIDI. 43 Řqedd n ismawen n marra imenza iwetman n ijj n uyur sennej, n yinni zzaysen ittwaḥesben, aqa aten di tnayen u-ɛicrin-ařef u-mitayn u-třata u-sebɛin.

44 Issiweř SIDI ak-d Musa, inna:

45 “Ksi Ilawiyyen deg wemcan n marra imenza jar ayt n Israil uřa d řebhayem n Ilawiyyen deg wemcan n řebhayem nsen, minzi Ilawiyyen ad iřin inu. Aqa Necc d SIDI. 46 Zi jjihet n mitayen u-třata u-sebɛin, inni ittxeṣṣa ad ttwafdin, maɣar nitni qqimen sennej i Ilawiyyen n imenza n ayt n Israil, 47 ittxeṣṣa ad teksid xemsa n iciqlen i kuř ijj n uzeǧif, anect n uciql n Zzawect Iqeddsen ad t teksid. Ɛicrin n ijirat aqa d ijj n uciql. ^■   48 Ad tewced nnuqart nni i Harun u i iḥenjiren nnes, aqa-tt i ttaman n weṣřaḥ n yinni iqqimen sennej i řqedd n Ilawiyyen.”

49 Xenni iksi Musa nnuqart n weṣřaḥ n yinni iqqimen sennej n yinni ittwafdin s Ilawiyyen. 50 Uca iṭṭef nnuqart nni zeg imenza n ayt n Israil: ařef u-teřt-mya u-xemsa u-settin n iciqlen, ɛlaḥsab aciql n Zzawect Iqeddsen. 51 U Musa iwca nnuqart n yinni ittwafdin i Harun u i iḥenjiren nnes, ɛlaḥsab awař n uqemmum n SIDI, am mammec i d as yumur SIDI i Musa.