1 Issiweř SIDI ak-d Musa d Harun, inna:

2 “Ḥseb ayt n Qahat azeǧif azeǧif jar ayt n Lawi, ɛlaḥsab řaǧat nsen u ɛlaḥsab taddart n ibabaten nsen, 3 zi třatin n iseggʷusa sennej ař xemsin n iseggʷusa, marra wenni i ɣa yadfen ɣar řɛeskar maḥend ad yegg řxedmet deg Uqiḍun n Umsagar.

4 D ta i ɣa tiři d tasexxart n ayt n Qahat deg Uqiḍun n Umsagar, aqa-tt d takessit s wemnus i Weqdas n Uqeddas. 5 Xmi dd ɣa fessyen řmargeḥ ad dd-yas Harun d iḥenjiren nnes uca ad kksen ařeḥḥaf i iǧan i dduri uca ad zzayes ssduryen Ttabut n Cchadet.

6 Ittxeṣṣa ad xas ggen ijj n dduri n iřmawen n ddenfiřat uca ad xas bezzɛen ijj n dduri marra d adeḥmi uca ad as ggen iɛumad nnes i tarebbut. 7 Ad bezzɛen ict n tjartiřṭ tadeḥmit x tzewḍa i weɣrum n wescan uca ad xas ggen ṭṭbaṣi, tiɣenjayin d řkisan d iɣarrafen s inni i ɣa kebben. Uca ittxeṣṣa ad xas yiři weɣrum řebda. ^■   8 Awarni i uya ad xas bezzɛen ijj n dduri azeggʷaɣ iḥedqen uca ad tt dřen ɛawed s ijj n dduri n iřmawen n ddenfiřat uca ad as ggen iɛumad nnes i tarebbut. 9 Xenni ad ksin ict n tjartiřt tadeḥmanit uca ad dřen řqendiř i tfawt uřa d řefnarat nnes d tjeqqaḍin n teftič nnes d tmejmarin nnes d marra řeqcuɛ i ɣares i zzect i issxeddmen i řqendiř. ^■  

10 Ad ggen řqendiř-a d marra řeqcuɛ nnes deg ijj n dduri n iřmawen n ddenfiřat uca ad t ssarsen x ǧuḥ n tkessit.

11 Ad bezzɛen ijj n dduri adeḥmani x uɛalṭar n řebxur uca ad t dřen ɛawed s yijj n dduri n iřmawen n ddenfiřat uca ad as ggen iɛumad nnes i tarebbut.

12 Uca ad ksin marra řeqcuɛ i tsexxart i ssxeddmen di Zzawect Iqeddsen uca ad ten ggen deg ijj n dduri adeḥmani uca ad t dřen s yijj n dduri n iřmawen n ddenfiřat, xenni ad ssarsen aya x ǧuḥ n tkessit.

13 Ad kksen min iqqimen zi tdunt n uɛalṭar uca ad xas bezzɛen ict n tjartiřt tarjuwanit.

14 Ad xas ssarsen marra řeqcuɛ i ssxedmen i tsexxart: timejmarin, furcayat, iɣenjayen, ṭṭawyat i urucci d marra dduzan n uɛalṭar. Tiwwa nnes ad bezzɛen ijj n dduri n iřmawen n ddenfiřat uca ad as ggen iɛumad nnes i tarebbut.

15 Xmi i ɣa ikemmeř Harun d iḥenjiren nnes dduři n Zzawect Iqeddsen d marra řeqcuɛ n Zzawect Iqeddsen xmi i ɣa fesyen iqiḍan n řmargeḥ n řɛeskar, xenni ad dd-asen iḥenjiren n Quhat ḥima ad arbun marra, maca ittxeṣṣa war ttḥidin min iǧan iqeddsen ařami i ɣa mten. Man aya d min ittxeṣṣa ad arbun iḥenjiren n Qahat di tmesřact n Uqiḍun n Umsagar.

16 Aliɛazar, mmis n ukehhan Harun, ad iṭṭef acbar x zzect n tfawt d řebxur ittfuḥen d tewhibt n řɣiǧet n kuř ass d zzect i wedhan, wah, ad iṭṭef acbar x Tzeddiɣt marra u x marra min dayes, x Zzawect Iqeddsen u x řeqcuɛ nnes.” ^■  

17 Issiweř SIDI ak-d Musa d Harun, inna:

18 “Ɣarwem ad tqeḍɛem taqbič n řaǧat n Iqahatiyyen zi řwest n Ilawiyyen.

19 Ggem kisen ammu ḥima ad ddaren, war ttmettin mařa qarrben-dd ɣar Weqdas n Uqeddas: ittxeṣṣa as i Harun d iḥenjiren nnes ad dd-adfen uca ad ggen kuř aryaz di řxedmet nnes u di ddqeř i ɣa yarbun s uɣiř. 20 War ɣarsen bu řḥeq ad adfen maḥend ad ẓaren di Zzawect Iqeddsen, uřa i yict n wermac n wabřiwen, maɣar xenni ad mmten.”

21 Issiweř SIDI ak-d Musa, inna:

22 “Ḥseb ayt n Jarcun azeǧif azeǧif, ɛlaḥsab taddart n ibabaten nsen u ɛlaḥsab řaǧat nsen. 23 Ad ten tḥesbed zi třatin n iseggʷusa sennej ař xemsin n iseggʷusa, kuř ijj wenni i ɣa yadfen ɣar řɛeskar ḥima ad yegg tasexxart deg Uqiḍun n Umsagar. 24 D ta i ɣa tiři d tasexxart n řaǧat n Jarcun di tmesřact n tsexxart d tarebbut. 25 Ad arbun tijartiřin n Tzeddiɣt d Uqiḍun n Umsagar ak-d tseqqaft nnes d tseqqaft nnes n iřmawen n ddenfiřat nni i ɣa yiřin tiwwa nnes d warwaq n wadaf n Uqiḍun n Umsagar, 26 d řizarat n řemraḥ d arwaq i tewwart n wadaf ɣar řemraḥ i dd-innḍen i Tzeddiɣt d uɛalṭar d marra ifiřan nsen d marra řeqcuɛ i dd-ittasen ak-d tsexxart nsen u marra min d as ṣennɛen, uca ammu i ɣa sexxaren nitni.

27 Marra řxedmet n ayt n Jarcun di tmesřact n marra tarebbut d marra tasexxart nsen ad tiři ɛlaḥsab řumur n Harun d iḥenjiren nnes. Ittxeṣṣa awem ad ten tessecnem s ḥeṭṭu marra min ittxeṣṣa ad arbun. 28 Ta i ɣa tiři d tasexxart n řaǧat n ayt n Jarcun deg Uqiḍun n Umsagar. Nitni ad ksin amnus i uya sadu ufus n Itamar, mmis n Harun, akehhan.

29 Ad tḥesbed ayt n Marari ɛlaḥsab řaǧat nsen u ɛlaḥsab taddart n ibabaten nsen. 30 Ad ten tḥesbed zi třatin n iseggʷusa sennej ař xemsin n iseggʷusa, marra wenni i ɣa yadfen di řɛeskar maḥend ad isexxar di tsexxart n Uqiḍun n Umsagar. 31 D ta d tasɣart nsen di trebbut ɣar marra tasexxart deg Uqiḍun n Umsagar: tifeřwin n Tzeddiɣt d tḥenya n uɛarreḍ d ipilaren nnes d tyarsawin nnes, 32 uřa d ipilaren n řemraḥ i d as dd-innḍen ak-d tyarsawin nsen d řewtad nsen d iseɣwan nsen, ak-d marra řeqcuɛ nsen. Nitni ad ggen marra tasexxart i dd-ittasen ak-d man aya. Řeqcuɛ i ittxeṣṣa ad ten arbun nitni, ittxeṣṣa kenniw ad ten tzemmed s ismawen nsen. 33 D ta i ɣa tiři d tasexxart n řaǧat n ayt n Marari ɣar marra tasexxart nsen deg Uqiḍun n Umsagar sadu ufus n Itamar, mmis n Harun, akehhan.”

34 Musa d Harun d izeǧifen n tmesmunt ḥesben ayt n Qahat ɛlaḥsab řaǧat nsen u ɛlaḥsab taddart n ibabaten nsen, 35 zeg wenni ɣar iǧa třatin n iseggʷusa sennej ař wenni ɣar iǧa xemsin n iseggʷusa, kuř ijj wenni i ɣa yadfen di řɛeskar maḥend ad isexxar deg Uqiḍun n Umsagar. 36 Inni zzaysen ittwaḥesben, aqa aten di ařfayen u-sebɛa-mya u-xemsin, ɛlaḥsab řaǧat nsen. 37 Ina d inni ittwaḥesben zi řaǧat n Iqahatiyyen, marra wi ittsexxaren deg Uqiḍun n Umsagar, inni ḥesben Musa d Harun x řumur n SIDI sadu ufus n Musa.

38 Ammu uřa d inni ittwaḥesben zeg ayt n Jarcun, ɛlaḥsab řaǧat nsen u ɛlaḥsab taddart n ibabaten nsen, 39 zeg wenni ɣar iǧa třatin n iseggʷusa sennej ař wenni ɣar iǧa xemsin n iseggʷusa, kuř ijj wenni i ɣa yadfen di řɛeskar maḥend ad igg tasexxart deg Uqiḍun n Umsagar. 40 Inni zzaysen ittwaḥesben, aqa aten di ařfayen u-setta-mya u-třatin ɛlaḥsab řaǧat nsen u ɛlaḥsab taddart n ibabaten nsen. 41 Ina d inni ittwaḥesben n řaǧat n ayt n Jarcun, marra wi ittsexxaren deg Uqiḍun n Umsagar, inni ḥesben Musa d Harun x řumur n SIDI.

42 Ina d inni ittwaḥesben n řaǧat n ayt n Marari, ɛlaḥsab řaǧat nsen u ɛlaḥsab taddart n ibabaten nsen. 43 zeg wenni ɣar iǧa třatin n iseggʷusa sennej ař wenni ɣar iǧa xemsin n iseggʷusa, kuř ijj wenni i ɣa yadfen di řɛeskar maḥend ad isexxar deg Uqiḍun n Umsagar. 44 Inni zzaysen ittwaḥesben, aqa aten di teřt-ařaf u-mitayen ɛlaḥsab řaǧat nsen. 45 Ina d inni ittwaḥesben n řaǧat n Marari, inni ḥesben Musa d Harun x řumur n SIDI sadu ufus n Musa.

46 Marra inni ittwaḥesben, inni ḥesben Musa d Harun d imɣaren n Israil zi Ilawiyyen, ɛlaḥsab řaǧat nsen u ɛlaḥsab taddart n ibabaten nsen, 47 zeg wenni i ɣar iǧa třatin n iseggʷusa sennej ař wenni i ɣar iǧa xemsin n iseggʷusa, marra wenni i ɣa yadfen maḥend ad igg řxedmet n tsexxart u řxedmet n trebbut n ddquřat deg Uqiḍun n Umsagar. 48 aqa aten di temn-ařaf u-xemsa-mya u-tmanin. 49 Nitni ttwaḥesben x řumur n SIDI sadu ufus n Musa, kuř aryaz ittwařeqqem di tsexxart nnes u x ddqeř nnes. Nitni ttwaḥesben zzayes am mammec i d as yumur SIDI i Musa.