Asettef n tqebbař
2
1 Issiweř SIDI ak-d Musa d Harun, inna: 2 “Ayt n Israil ad wten iqiḍan nsen kuř ijj ɣar tɛeǧant nnes, ɣar tɛeǧimin n taddart n ibabaten nsen. Ad wten iqiḍan nsen cwayt ɣar řaggʷaj ɣar marra iɣezdisen n Uqiḍun n Umsagar.
3 Inni iǧan sadu n tɛeǧant n řmargeḥ n řɛeskar n Yahuda ad wten iqiḍan nsen ɛlaḥsab tarbiɛin n řɛeskar nsen ɣar ccarq, ɣar manis dd-tneqqar tfuct, uca Naḥcun, mmis n Ɛamminadab, ad yiři d amgewwed n ayt n Yahuda. 4 Inni ittwaḥesben i řɛeskar nnes, aqa aten di arebɛa u-sebɛin-ařef u-setta-mya.
5 Zzates ad tewwet teqbič n Issakar iqiḍan nnes. Natanayil, mmis n Ṣuɣar, ad yiři d amgewwed n ayt n Issakar. 6 Inni ittwaḥesben i řɛeskar nnes, aqa aten di arebɛa u-xemsin-ařef u-arebɛa-mya.
7 Xenni taqbič n Zabulun. Iliyab, mmis n Hilun, ad yiři d amgewwed n ayt n Zabulun. 8 Inni ittwaḥesben i řɛeskar nnes, aqa aten di sebɛa u-xemsin-ařef u-arebɛa-mya.
9 Inni ittwaḥesben i řmargeḥ n řɛeskar n Yahuda aqa aten marra jmiɛ di mya u-setta u-tmanin-ařef u-arebɛa-mya n yeryazen, ttwasettfen ɛlaḥsab tarbiɛin n řɛeskar nsen. Ad fesyen iqiḍan nsen amezwaru.
10 Ɣar ljanub ad tiři tɛeǧant n řmargeḥ n řɛeskar n Rubin. Ad iřin ttwasettfen ɛlaḥsab tarbiɛin n řɛeskar nsen. Iliṣur, mmis n Cadayyur, ad yiři d amgewwed n ayt n Rubin. □
11 Inni ittwaḥesben i řɛeskar nnes, aqa aten di setta u-rebɛin-ařef u-xemsa-mya.
12 Zzates ad tewwet teqbič n Cimɛun iqiḍan nnes. Calumiyil, mmis n Ṣuriycadday, ad yiři d amgewwed n ayt n Cimɛun.
13 Inni ittwaḥesben i řɛeskar nnes, aqa aten di tesɛa u-xemsin-ařef u-teřt-mya.
14 Xenni taqbič n Jad. Ilyasaf, mmis n Raɛuyil, ad yiři d amgewwed n ayt n Jad.
15 Inni ittwaḥesben i řɛeskar nnes, aqa aten di xemsa u-rebɛin-ařef u-setta-mya u-xemsin.
16 Inni ittwaḥesben i řmargeḥ n řɛeskar n Rubin, aqa aten marra mya u-waḥit u-xemsin-ařef u-arebɛa-mya u-xemsin n yeryazen, ttwasettfen ɛlaḥsab tarbiɛin n řɛeskar nsen. Ad fesyen iqiḍan nsen wiss tnayen.
17 Xenni ad ittwafsi Uqiḍun n Umsagar, řmargeḥ n Ilawiyyen, di řwest n marra řɛeskar. Am mammec i ɣa wten iqiḍan nsen, ammu ittxeṣṣa ad mmuṭṭiyen ɛawed, kuř ijj deg wemcan nnes, ɛlaḥsab tiɛeǧanin nsen.
18 Ɣar řɣarb ad tiři tɛeǧant n řmargeḥ n řɛeskar n Ifrayim. Ad iřin ttwasettfen ɛlaḥsab tarbiɛin n řɛeskar nsen. Ilicamaɛ, mmis n Ɛammihud, ad yiři d amgewwed n ayt n Ifrayim.
19 Inni ittwaḥesben i řɛeskar nnes, aqa aten di arebɛin-ařef u-xemsa-mya.
20 Zzates ad tiři taqbič n Manassa. Jamliyil, mmis n Fadahṣur ad yiři d amgewwed n ayt n Manassa. 21 Inni ittwaḥesben i řɛeskar nnes, aqa aten di tnayen u-třatin-ařef u-mitayn.
22 Xenni taqbič n Binyamin. Abidan, mmis n Jidɛuni, ad yiři d amgewwed n ayt n Binyamin. 23 Inni ittwaḥesben i řɛeskar nnes, aqa aten di xemsa u-ṭřatin-ařef u-arebɛa-mya.
24 Inni ittwaḥesben i řmargeḥ n řɛeskar n Ifrayim, aqa aten di mya u-tmenya-ařef u-mya n yeryazen, ttwasettfen ɛlaḥsab tarbiɛin n řɛeskar nsen. Ad fesyen iqiḍan nsen wiss třata.
25 Ɣar ccmal ad tiři tɛeǧant n řmargeḥ n řɛeskar n Dan. Ad iřin ttwasettfen ɛlaḥsab tarbiɛin n řɛeskar nsen. Axiɛazar, mmis n Ɛammicadday, ad yiři d amgewwed n ayt n Dan. 26 Inni ittwaḥesben i řɛeskar nnes, aqa aten di tnayen u-settin-ařef u-sebɛa-mya.
27 Zzates ad tewta teqbič n Acir iqiḍan nnes. Fajɛiyil, mmis n Ɛukran, ad yiři d amgewwed n ayt n Acir. 28 Inni ittwaḥesben i řɛeskar nnes, aqa aten di waḥit u-rebɛin-ařef u-xemsa-mya.
29 Xenni taqbič n Naftali. Axiraɛ, mmis n Ɛinan, ad yiři d amgewwed n ayt n Naftali. 30 Inni ittwaḥesben i řɛeskar nnes, aqa aten di třata u-xemsin-ařef u-arebɛa-mya.
31 Inni ittwaḥesben i řmargeḥ n řɛeskar n Dan, aqa aten di mya u-sebɛa u-xemsin-ařef u-setta-mya n yeryazen. Nitni ad fesyen iqiḍan nsen d aneggaru, ɛlaḥsab tiɛeǧanin nsen.
32 Ina d inni ittwaḥesben n ayt n Israil, ɛlaḥsab taddart n ibabaten nsen. Marra inni ittwaḥesben di řemrageḥ n řɛeskar, ɛlaḥsab tarbiɛin n řɛeskar nsen, aqa aten setta-mya u-teřt-ařaf u-xemsa-mya u-xemsin n yeryazen. ■
33 Ilawiyyen jar ayt n Israil war ttwaḥesben ca, nican am mammec i d as yumur SIDI i Musa. ■
34 Uca ggin ayt n Israil am mammec marra min d as yumur SIDI i Musa: amecnaw mammec wtin iqiḍan nsen s usettef ɣar tɛeǧanin nsen, ammu i ɣa fesyen iqiḍan nsen ɛawed, ttwasettfen ɛlaḥsab řaǧat nsen, ɛlaḥsab taddart n ibabaten nsen.