1 “War tteggem i yixef nwem l’aṣnam, war ssbeddam řexyař ineqcen uřa d ijj n umayḍu iqeddsen uca war ssrusam řexyař n weẓru di temmurt nwem ḥima ad as taḍarem, minzi Necc d SIDI, AREBBI nwem! ^■  

2 Ad teḥḍam ussan n ssebt inu uca ad awem iqarr ijj n uweqqar yuǧɣen n Zzawect inu Iqeddsen, aqa Necc d SIDI! ^■  

3 Mařa ad tuyurem di tweṣṣa inu uca ad tᵉṭṭfem di řumurat inu uca ad zzaysent teggem, ^■   4 xenni Necc ad awem wceɣ anẓar di řweqt, uca tammurt ad dd-tawi ṣṣabet nnes, uca ticejjura n yeyyar ad wcent řɣiǧet nsent. 5 Ad yiři usarwet ař ařqaḍ n uḍiř uca ařqaḍ n uḍiř ad yiři ař řweqt n uzarreɛ uca ad teccem ař ɣa tejjiwnem uca ad tzedɣem di řaman di temmurt nwem. ^■   6 Necc ad ggeɣ řehna di temmurt. Mařa tᵉṭṭṣem, war ittiři wi kenniw i ɣa issiggʷden. Necc ad mḥiɣ imuddaren iɛeffanen zi temmurt uca ssif war dd-iẓekkʷi x temmurt nwem. ^■   7 Ggur ad teḍfarem řɛedyan nwem uca nitni ad wḍan s ssif nwem zzat i tiṭṭawin nwem. 8 Xemsa n yeryazen zzaywem ad ḍfaren mya uca mya zzaywem ad ḍfaren ɛecra-ařef uca řɛedyan nwem ad wḍan s řeqḍeɛ n ssif zzat i tiṭṭawin nwem. ^□  ■   9 Minzi Necc ad ɣarqwem dd-dewřeɣ uca ad awem dd-jjeɣ řɣiǧet uca ad kenniw arniɣ uca ad ssmetneɣ Řɛahd inu akidwem.

10 Am i ɣa teccem ɛad zi zzad nni txeznem, ad tekksem deɣya zzad aqdim maḥend ad tejjem amcan i jdid.

11 Necc ad ggeɣ Tazeddiɣt inu di řwest nwem uca řeɛmar inu war zzaywem ittɛiffi ca. ^■  

12 Ad uyureɣ jar awem, Necc ad iřiɣ d AREBBI nwem uca kenniw ad ayi tiřim d řgens inu.

13 Necc d SIDI, AREBBI nwem, wenni kenniw dd-issuffɣen zi temmurt n Miṣra ḥima war ttiřim ɛad d isemɣan nsen. Necc arẓiɣ imqeǧaḍen n uzayřu nwem uca nedheɣ kenniw s wudem yuři.

14 Maca mařa war d ayi tesřim niɣ war tteggim marra min zi kenniw umureɣ ^■  

15 uca mařa tesseḥqarem tiweṣṣa inu uca řeɛmar nwem ad iɛiff zi lfarayiḍ inu, ař ɣa tawḍem war tᵉtteggem ɛad marra řumurat inu ař ɣa tarẓem Řɛahd inu,

16 xenni Necc ad awem ggeɣ aya: ad xawem-dd ssehwiɣ arjef d bu-deǧis d tmessi n arwaḥ nni i ɣa iteḥḥan tiṭṭawin uca ad ttwaɛeddben řeɛmar. Ad tzarɛem zzariɛet nwem baṭeř, minzi řɛedyan nwem ggur ad tt ccen.

17 Ad ggeɣ udem inu ḍidd nwem uca ad texṣarem zzat i wudem n řɛedyan nwem uca inni kenniw icarrhen ad xawem ṣellṭen uca kenniw ad tarewřem břa ma iḍfar i kenniw-dd ḥed. ^■  

18 U mařa awarni man aya ɛad war ɣari tesřim, Necc ad ɣares arniɣ sebɛa n twařawin maḥend ad kenniw webbxeɣ x ddnub nwem.

19 Necc ad arẓeɣ aɛeffar n jjehd nwem uca ad arreɣ ajenna nwem am wuzzař d temmurt nwem am nnḥaṣ. 20 Ad ittwagg jjehd nwem baṭeř uca tammurt nwem war tᵉttic ṣṣabet nnes u ticejjura n temmurt war tticent řɣiǧet.

21 Mařa temmɛařam kidi uca war tᵉttexsem ad ayi tesřim, xenni Necc ad xawem dd-ssehwiɣ ɛad sebɛa n jjrayeḥ anect n ddnub nwem. 22 Ad ɣarwem dd-ssekkeɣ řewḥuc maḥend ad awem xeḍfen tarwa nwem, ad sshellken řebhayem nwem, uca ad ssneqṣen lɛadad nwem u ibriden nwem ad dewřen d ddmani.

23 Mařa s mana aya kenniw war ɣari dd-ttesřim, maca teqqimem tᵉttemɛařam akidi, 24 xenni uřa d Necc ad kidwem mmɛařiɣ uca ad xawem dd-ssehwiɣ ɛad sebɛa n jjrayeḥ x ddnub nwem. ^■   25 Ad xawem ssekkeɣ ijj n ssif nni i ɣa issekkaren antaqem n Řɛahd inu ař ɣa tᵉttwasmunem di tneddam nwem. Xenni Necc ad ssekkeɣ ṭṭaɛun di řwest nwem uca kenniw ad tᵉttwasellmem deg ufus n řeɛdu nwem. 26 Xmi i ɣa arẓeɣ řeɛweč n weɣrum nwem, xenni ɛecra n temɣarin ad ssenggʷent aɣrum nwem di tefqunt d ict, uca awarni i ɣa weznent aɣrum ad t i-dd-arrent uca kenniw ad t teccem, maca war tᵉttjiwinem. ^□   27 Mařa ɛad s man aya war ɣari-dd tᵉttesřim, maca ad teqqimem ad temɛařam akidi, 28 xenni Necc ad xawem sɛareɣ u ad kenniw arebbiɣ, wah sebɛa n imuren Necc ad kenniw arebbiɣ di ssibbet n ddnub nwem. 29 Ad teccem aysum n iḥenjiren nwen uřa d aysum n tḥenjirin nwem ad t teccem. ^■   30 Ad areddǧeɣ řegɛudi mani tᵉttwehhabem ddbayeḥ nwem, ad nḍareɣ ipilaren nwem n arebbi n tfuct, ad arreɣ řxecbat nwem x řxecbat n imeyḍa n l’aṣnam nwem uca řeɛmar inu ad kenniw iɛiff. ^■   31 Ad arreɣ tineddam nwem d řxarbet uca ad arreɣ tizawiyyin iqeddsen nwem ad dehcent uca war ttexseɣ ad cmeɣ ɛad řefwaḥet ittfuḥen nwem. 32 Wah Necc ad areddǧeɣ tammurt uca řɛedyan nwem nni dayes izeddɣen ad zzayes nnxeřɛen.

33 Ad kenniw zuzzareɣ jar řegnus uca ad kseɣ ssif awarni awem uca tammurt nwem ad tedweř d řexřa uca tineddam nwem ad iřint d řxarbet. 34 Xenni tammurt ad xas arḍan wussan n ssebt nnes, marra ussan n wareddeǧ, am i ɣa tiřim di temmurt n řɛedyan nwem. Xenni ad tareyyeḥ temmurt u ad tegg tcuni x wussan n ssebt nnes. ^■   35 Mařa ussan n wareddeǧ ad ɣares yiři wareyyeḥ, minzi tammurt war tareyyiḥ ca deg wussan n ssebt nwem řami tuɣa kenniw tzeddɣem dinni.

36 Ad ggeɣ tiggʷudi deg wuřawen n yinni zzaywem i ɣa iqqimen di temmura n řɛedyan nsen, ař řḥess n ict n tfarect i yiwi uṣemmiḍ ad xasen yaẓẓeř u ad ten yarr ad arewřen am mammec yarekkweř bnadem zi ssif. Nitni ggur ad wḍan, waxxa war xasen ittiẓẓeř ḥed. 37 Ad nqarḍen ijjen deg wenneɣni am xmi ẓrin řeqdeɛ n yijj n ssif, waxxa war xawem ittiẓẓeř ḥed. Kenniw war tzemmaren ad teqqimem tbeddem zzat i tiṭṭawin n řɛedyan nwem, 38 maca kenniw ad tᵉttwahellkem jar řegnus uca tammurt n řɛedyan nwem ad kenniw tecc.

39 Inni zzaywem i ɣa iqqimen ad issřawen di temmura n řɛedyan nwem di ssibbet n řmuɛṣiyyet nsen, uca uřa di ssibbet n řmuɛṣiyyet n řejdud nwem ad issřawen akidsen.

40 Maca mařa neɛmen s řmuɛṣiyyet nsen d řmuɛṣiyyet n řejdud nsen zi ssibbet n řeɣdar nsen i zi d ayi ɣdaren uca ɛawed mmɛařan akidi, 41 uca xenni uřa d Necc mmɛařiɣ akidsen u iwyeɣ ten ɣar temmurt n řɛedyan nsen, maḥend ad taɣ uř nsen war ixtinen ad yaḍar uca ad qebřen řexřaṣ i řmuɛṣiyyet nsen, 42 u xenni Necc ad xarrṣeɣ di Řɛahd inu ak-d Yaɛqub uca ɛawed di Řɛahd inu ak-d Isḥaq uca ad xarrṣeɣ di Řɛahd inu ak-d Ibrahim uca xenni ad xarrṣeɣ di temmurt.

43 Tammurt ad tᵉttwaj zzaysen uca ad xas arḍan wussan n ssebt nnes umi ɣa teqqim d ict n řxarbet di ssibbet nsen uca nitni ad řemden ad qebřen lɛiqab n řmuɛṣiyyet nsen, wah minzi nḍaren lfarayiḍ inu u minzi řeɛmar nsen iɛiff zi tweṣṣa inu.

44 Sennej i uya aqa d man aya: mařa aqa aten di temmurt n řeɛdyan nsen, Necc war ten neṭṭareɣ ca u war ten ttɛiffiɣ ař ten ɣa teḥḥiɣ u ad mḥiɣ Řɛahd inu akidsen minzi Necc d SIDI, AREBBI nsen! ^■   45 Maca di ṭṭweɛ nsen ad ɛeqřeɣ di Řɛahd inu ak-d řejdud nni nedheɣ zi temmurt n Miṣra zzat i tiṭṭawin n řegnus maḥend ad iřiɣ d AREBBI i nitni, Necc d SIDI!”

46 Tina d tiweṣṣa d lfarayiḍ d izerfan nni igga SIDI jar as d jar ayt n Israil deg wedrar n Sina s ufus n Musa.