1 Issiweř SIDI ak-d Musa, inna:

2 “Siweř ak-d ayt n Israil uca ini asen, aqa mařa ḥed ixs ad ikemmeř ijj n lwaɛd i AREBBI, ad iřin xenni řeɛmur i SIDI ɛlaḥsab řqimet i tqeddared cek.

3 Mařa řqimet i tqeddared cek řqedd n ijj n weryaz zi ɛicrin ař settin n iseggʷusa, xenni ad tiři řqimet i tqeddared xemsin n iciqlen n nnuqart ɛlaḥsab aciql n Zzawect Iqeddsen. 4 Mařa d ict n temɣart, xenni ad tiři řqimet i tqeddared třatin n iciqlen.

5 Uca mařa d ijj n ubřiɣ zi xemsa ař ɛicrin n iseggʷusa, xenni ad tiři řqimet i tqeddared i yijj n weryaz ɛicrin n iciqlen u i yict n temɣart ɛecra n iciqlen.

6 Mařa d ijj n uḥenjir zeg yijj n uyur ař xemsa n iseggʷusa, xenni ad tiři řqimet i tqeddared i yijj n weryaz xemsa n uciql n nnuqart u i yict n temɣart třata n iciqlen n nnuqart.

7 Mařa d ijj n mmis n bnadem zi settin iseggʷusa niɣ sennej, xenni, mařa netta d aryaz, ad tiři řqimet i tqeddared xemmesṭac n iciqlen u mařa d tamɣart ad tiři řqimet i tqeddared ɛecra n iciqlen.

8 Mařa tuɣa iẓřeḍ aṭṭas u war izemmar ad iwc řqimet i tqeddared cek, xenni ad t ssbedden zzat i wudem n ukehhan uca xenni ad iqeddar ukehhan řqimet nnes. Ad t iqeddar ukehhan ɛlaḥsab min izemmar ad issmun ufus n wenni iwcin awař, ammu i t ɣa iqeddar ukehhan.

9 Mařa d řebhayem i zi ɣa ssqarrben tawhibt i SIDI, xenni marra min zzaysen ɣa iwc netta i SIDI, ad yiři iqeddes.

10 War ittbeddiř u war ixeǧef, amuddar icnan x wenni iqebḥen niɣ amuddar iqebḥen x wenni icnan. Mařa ibeddeř ɛad ict n řebhimet s ict n řebhimet nneɣni, xenni ta d tenni i x tt ibeddeř ad iřint qeddsent.

11 Mařa teǧa d ict n řebhimet texmej i zi war izemmar ad qeddmen tawhibt i SIDI, xenni ad yarr řebhimet nni ad tbedd zzat i wudem n ukehhan.

12 Akehhan ad iqeddar řqimet nnes jar min icnan d min war iḥřin. Uca am mammec i tt ɣa tqeddared cek, am ukehhan, ammu i ɣa tiři.

13 Mařa netta ixs ɛad ad tt ifdi, ad xas yarni ict n tesɣart n texmusect n řqimet i tqeddared cek. ^□  

14 Mařa ca n yijjen issqeddes taddart nnes maḥend ad tiři tqeddes i SIDI, xenni ad iqeddar ukehhan řqimet nnes jar min icnan d min iqebḥen. Am mammec iqeddar ukehhan řqimet nnes, ammu i ɣa tiři.

15 Mařa wenni tt issqeddsen, ixs ad ifdi taddart nnes, xenni netta ad xas yarni ict n tesɣart n texmusect n řqimet ittwaggen s nnuqart uca ad tiři nnes ɛawed.

16 Mařa ca n yijjen issqeddes i SIDI ca n tesɣart n yeyyar nni ɣares iǧan, xenni ad tqeddared řqimet nnes ɛlaḥsab zzariɛet nnes. Zzariɛet n ijj n uḥumir n imendi ad as ggen xemsin n iciqlen. ^□  

17 Mařa tuɣa issqeddes iyyar nnes zeg useggʷas n usřiwřew, xenni ad tedweř řqimet n yeyyar tbedd ɛlaḥsab řqimet i tqeddared.

18 Mařa tuɣa issqeddes iyyar nnes awarni i useggʷas n usřiwřew, xenni akehhan ad as ihṣeb řqimet s nnuqart n iseggʷusa iqqimen ař aseggʷas n usřiwřew i dd ɣa yasen u ad tt tessneqṣed zi řqimet tmun i tuɣa tqeddared cek.

19 Mařa wenni issqeddsen iyyar, ixs ad t ifdi nican, xenni ad yarni ict n tesɣart n texmusect di nnuqart x řqimet i tqeddared cek uca xenni ad as yiři ɛawed.

20 Mařa war ixs ad ifdi iyyar nni niɣ mařa izzenz iyyar i yijj n weryaz nneɣni, xenni war izemmar ad ittwafdi ɛad yeyyar. 21 Awarni řami dd-iffeɣ deg useggʷas n usřiwřew, ad yiři iyyar iqeddes i SIDI amecnaw ijj n yeyyar ittwaḥarrmen qaɛ. Ad yiři d agřa n ukehhan.

22 Mařa ca n yijjen issqeddes i SIDI ijj n yeyyar wenni isɣa, maca war iǧi yeyyar n wagřa nnes, 23 xenni ggur ukehhan ad as iḥseb ttaman n řqimet i tqeddared cek ař aseggʷas n usřiwřew uca netta ad ixeǧeṣ řqimet i tqeddared deg wass d ijj am ict n tmesřact tqeddes i SIDI. 24 Deg useggʷas n usřiwřew ad dd-iɛqeb yeyyar ɛawed i wenni x t isɣa, i wenni tuɣa ɣar teǧa temmurt d agřa. 25 Aqeddar ad yiři ɛlaḥsab aciql n Zzawect Iqeddsen. Ad yiři uciql ɛicrin n ijirat. ^■  

26 Maca amenzu, wenni ifarzen i SIDI zi řebhayem am umenzu, war t issqeddes ca uřa d ijjen, niɣ d afunas i iǧa niɣ d ijjen zeg wuǧi, aqa-t i SIDI. ^■   27 Maca mařa tuɣa-t zi řebhimet ixemjen, izemmar ad tt ifdi ɛlaḥṣab řqimet i tqeddared cek uca ad xas yarni ict n tesɣart n texmusect. Mařa war tᵉttwafedda, xenni ad temmenz ɛlaḥsab řqedd i tqeddared cek.

28 Maca uřa d ict n řḥajjet nni ittwaḥarrmen zeg ijj n weryaz i SIDI zi marra min ɣares iǧan n iwdan d řebhayem d iyyaren, war tɛeddeř ad temmenz niɣ ad tᵉttwafdi. Marra min ittwaḥarrmen, ad yiři d amqeddas qaɛ i SIDI. ^■  

29 Marra min ittwaḥarrmen qaɛ, min ittwaḥarrmen zeg iwdan, war iɛeddeř ad ittwafdi, maca ittxeṣṣa ad ittwaneɣ nican.

30 Marra tiɛcuray n temmurt, zi zzariɛet n temmurt u zi řɣiǧet n tcejjura, ad iřin i SIDI, aqa aten qeddsen i SIDI. 31 Mařa ca n yijjen ixs ad ifdi ca zi řeɛcur nnes, xenni ggur ad xas yarni ict n tesɣart di xemsa. 32 X marra tiɛcuray zeg ifunasen d tfunasin d wuǧi, zi marra min ikkin sadu uzeǧaḍ n umeksaw, ad yiři umuddar wiss ɛecra iqeddes i SIDI. 33 War ggur ad yarzu mammec tecna niɣ mammec war teḥři i teǧa, uřa war t ittbeddiř ca, maca mařa ibeddeř i-t, xenni amuddar nni d wenni zi t i ɣa ibeddeř ad iřin qeddsen. War iɛeddeř ad ittwafdi.”

34 Aqa tina d tiweṣṣa nni i zi iweṣṣa SIDI i Musa u i ayt n Israil deg wedrar n Sina.