1 Issiweř SIDI ak-d Musa x wedrar n Sina, inna:

2 “Siweř ak-d ayt n Israil uca ini asen: ‘Xmi i ɣa tawḍem ɣar temmurt nni d awem ɣa wceɣ, xenni ad tareyyeḥ temmurt, ijj n wareyyeḥ n ssebt i SIDI. ^■   3 Setta n iseggʷusa ad tzarɛed iyyar nnek uca setta n iseggʷusa ad tezbared tizayarin n umarjuɛ nnek uca ad tessmuned řɣiǧet nnes, 4 maca deg useggʷas wiss sebɛa ad tiři ict n arraḥet n ssebt i temmurt, ijj n ssebt i SIDI. War tzarrɛed ca iyyar nnek u war tzebbared ca tizayarin n umarjuɛ nnek. 5 Min dd-iɣemmyen amenni waha, war t mejjarem u aḍiř war t zebbarem ca zi tzayart nnek i war ittwiḥidin. Ad yiři d ijj n useggʷas n ssebt i temmurt. 6 Ṣṣabet n arraḥet n ssebt n temmurt nnek ad awem tiři d macca, i cek, i yismeɣ nnek, i tayya nnek, i ucewwař nnek uřa i umɛezzeb nnek nni akidek izeddɣen am ibarraniyyen. 7 Ṣṣabet nnes marra ad tiři d macca i řebhayem u i řmař nni iǧan di temmurt nnek.

8 Ad tḥessbem kenniw ɛawed sebɛa n simanat n iseggʷusa, sebɛa wwet i-tt di sebɛa n iseggʷusa, maḥend ad awḍen wussan n sebɛa n simanat n iseggʷusa munen ɣar tesɛa u-rebɛin n iseggʷusa. ^□   9 Xenni deg uyur wiss sebɛa, deg wass wiss ɛecra n uyur, ad tejjed aṣuḍi deg uyicc n icarri ad ittwaseř. Deg wass n Weṣřaḥ ad tṣuḍed deg uyicc n icarri ař d as i ɣa sřen di marra tammurt nwem. ^□  

10 Ad tessqeddsem aseggʷas wiss xemsin. Ad tbarrḥem s třelli i marra imezdaɣ di marra tammurt. Ad yiři d ijj n useggʷas n usřiwřew i kenniw uca ad dd-iɛqeb kuř aryaz ɣar wagřa nnes u ɣar raǧ nnes.

11 Aseggʷas n useggʷas wiss xemsin ad awem yiři d ijj n useggʷas n usřiwřew. War tzarrɛem u war tmejjarem min dd-iɣemyen amenni waha, u war tzebbarem ca zi tzayart war ittwiḥidin,

12 minzi aqa d aseggʷas n usřiwřew! Aqa tzemmarem ad teccem řɣiǧet n yeyyar.

13 Deg useggʷas-a n usřiwřew ad dd-iɛqeb kuř ijjen ɣar wagřa nnes.

14 Meřmi cek i ɣa tezzenzed ca i umqarreb nnek niɣ mařa tesɣid ca zeg ufus n ijj n umqarreb nnek, xenni war ittxeṣṣi uřa d ijjen ad iɣebben wenneɣni.

15 Ɛlaḥsab řqedd n iseggʷusa zeg wami iǧa useggʷas n usřiwřew, ad tesɣed tammurt zeg umqarreb nnek u ɛlaḥsab řqedd n iseggʷusa n ṣṣabet ggur ad kik yegg tamenziwt.

16 Ma aqa dinni ɛad aṭṭas n iseggʷusa ɣar zzat, xenni ad tarnid di ttaman n tmesɣiwt nnes u mařa aqa dinni ɛad drus n iseggʷusa ɣar zzat, uca xenni ad tessneqṣem di ttaman n tmesɣiwt nnes minzi netta ad ac t izzenz ɛlaḥsab řqedd n iseggʷusa n ṣṣabet.

17 War ittɣebbin ḥed amqarreb nnes. Ggʷed AREBBI nnek, minzi aqa Necc d SIDI, AREBBI nwem!

18 Ḍfarem tiweṣṣa inu, ḥḍam lfarayiḍ inu uca ggem zzaysent, ad tzedɣem xenni di temmurt di řaman.

19 Tammurt ad tewc řɣiǧet nnes u kenniw ad zzayes teccem ař ɣa tejjiwnem uca ad din tzedɣem di řaman. 20 Uca mařa tennim: ‘Min i ɣa necc deg useggʷas wiss sebɛa? Xzar, war nzemmar ad nzarreɛ u war nzemmar ad nessmuni ṣṣabet nneɣ!’, 21 xenni deg useggʷas wiss setta Necc ad awem dd-ssekkeɣ lbaraka inu ḥima tammurt ad tewc rɣiǧet i třata n iseggʷusa. 22 Deg useggʷas wiss tmenya ad tzarɛem ɛawed. Uca ad teccem zi ṣṣabet taqdimt ař aseggʷas wiss tesɛa. Ař i ɣa tiři ṣṣabet nnes n jdid, ad teccem ɛad zi ṣṣabet taqdimt.

23 Tammurt war tᵉttmenzi i řebda, minzi aqa tammurt aqa-tt Inu uca kenniw xenni d ibarraniyyen, d imeɛzab i teǧam. 24 S uya ittxeṣṣa kenniw ad tewcem ttesriḥ maḥend ad ifdi tammurt di marra tammurt i ɣarwem iǧan d wagřa. ^□   25 Mařa umac iẓřeḍ uca izzenz ca zeg wagřa nnes, ad dd-yas umefdi nnes, řaǧ nnes yudsen, maḥend ad ifdi min izzenz umas. ^□   26 Mařa aryaz war ɣares bu umefdi, maca afus nnes izemmar ad yaf min icfan maḥend ad t ifdi, 27 xenni ad iḥesseb iseggʷusa zeg wami tᵉttwammenz temmurt uca ad ixeǧeṣ min iqqimen i weryaz umi tt izzenz uca ad tt-i-dd yarr ɣar wagřa nnes. 28 Mařa afus nnes war yufi řqedd ḥima ad as dd-yarr min tuɣa izzenz, xenni min tuɣa izzenz ad iqqim deg ufus n wenni t isɣin ař aseggʷas n usřiwřew. Maca deg useggʷas n usřiwřew man aya ad ittwafekk uca ad t-i-dd-yarr ɣar wagřa nnes.

29 Mařa ca n yijjen izzenz taddart nnes deg ict n tendint umi dd-nnḍen s řeḥyuḍ, xenni iɛeddeř ad yiři ufekki nnes ař d iɛdu ijj n useggʷas am ikmeř zi tmenziwt nnes. Marra ussan nni iɛeddeř ad tt ifdi. 30 Maca mařa war tᵉttwafdi di řmijař n ijj n useggʷas, xenni taddart di tendint nni dd-innḍen s weɣbar, ad tiři řebda i wenni tt isɣin, i marra jjiřat nnes. War tᵉttwafekk deg useggʷas n usřiwřew. 31 Maca tudrin nni n ředcur i umi war dd-inniḍ řḥiḍ, ad ttwaḥesbent amecnaw ijj n yeyyar n temmurt. Danita izemmar ad yiři wezřef n wefdan uca ad ittwafekk yeyyar deg useggʷas n usřiwřew. 32 X tneddam n Ilawiyyen, tudrin di tneddam n wagřa nsen, aqa Ilawiyyen ɣarsen řḥeqq i řebda ḥima ad tent fdin. 33 Mařa ca n yijjen isɣa i-tt zeg Ilawiyyen, xenni ad tᵉttwafekk taddart i immenzen, tenni iǧan di tendint n wegřa nnes, deg useggʷas n usřiwřew, minzi tudrin n tneddam n Ilawiyyen aqa atent d agřa nsen di řwest n ayt n Israil. 34 Iyyar nni iqqnen ɣar tneddam, war ittmenzi, minzi aqa-t d agřa nsen i řebda.

35 Mařa umac iẓřeḍ uca ifassen nnes bdan ad arjijen din ɣarek, xenni ittxeṣṣa ad t-i-dd-tsennded maḥend ad ibedd, uřa d abarrani niɣ d amɛezzeb, maḥend ad iqqim ad ɣarek iddar. 36 War zzayes tkessid arriba uřa d arbeḥ, maca ad teggʷded zi AREBBI nnek, ḥima umac i din ɣarek ad iqqim iddar. ^□  ■   37 War d as ttic tmenyat n nnuqart s arriba u war d as ttic macca s warbeḥ. 38 Aqa Necc d SIDI, AREBBI nwem, wenni kenniw dd-issuffɣen zi temmurt n Miṣra ḥima ad awem wceɣ tammurt n Kenɛan u ḥima ad iřiɣ d AREBBI i kenniw.

39 Mařa umac iẓřeḍ am kik iǧa uca immenz ac i cek, war t tᵉttarrid ad ixdem amecnaw ismeɣ. ^■   40 Ad kik izdeɣ amecnaw acewwař, amecnaw ijj n umɛezzeb, uca ad ɣarek ixdem ař aseggʷas n usřiwřew. 41 Xenni ad xak iffeɣ, netta simant nnes ak-d tarwa nnes, uca ad idweř ɣar řaǧ nnes u ad idweř ɣar wagřa n řejdud nnes. 42 Minzi aqa aten d imsexarren inu inni ssuffɣeɣ Necc zi temmurt n Miṣra. War ttmenzin am mammec ittmenza ijj n ismeɣ. 43 War xas ttṣeǧeḍ s řeqsaḥet, maca ad teggʷded AREBBI nnek. ^■   44 X ismeɣ nnek niɣ x tayya nnek, inni ɣarek ɣa yiřin, ad iřin zi řegnus i d ak-dd innḍen. Zzaysen ad tesɣed isemɣan d teyyawin. 45 Tzemmarem ad ten tesɣem zeg iḥenjiren n imeɛzab nni izeddɣen jar awem am ibarraniyyen u zi řaǧat nsen nni akidwem iǧan, inni dd-ittwaxeřqen ɣarwem di temmurt nwem. Nitni ad dewřen d agřa nwem. 46 Uca ad ten tejjed d řwart i iḥenjiren nwem awarni awem. Tzemmarem ad ten tarrem ad awem sexxaren řebda, maca x aytmatwem, ayt n Israil, war ttṣellṭem kuř ijj x wenneɣni s řeqsaḥet.

47 Mařa afus n ijj n ubarrani niɣ n ijj n umɛezzeb i izeddɣen jar awem yiweḍ, uca umac i ɣares izeddɣen idweř iẓřeḍ, ad izzenz ixef nnes i ubarrani, wenni izeddɣen ɣarek, niɣ i yijjen zi jjadira n řaǧ n ubarrani nni, 48 xenni iɛeddeř, awarni ma izzenz ixef nnes, ad ittwafdi. Ijjen zeg aytmas ad t ifdi. 49 Iɛeddeř i ɛemmis niɣ i mmis n ɛemmis ad t ifdi, niɣ ijjen zi raǧ nnes i-t-i-dd-yudsen, zi řwacun nnes, ad t ifdi, niɣ mařa ɣares s minzi, xenni iɛeddeř ad ifdi ixef nnes. 50 Ad igg řeḥsab ak-d wenni t isɣin zeg useggʷas min di izzenz ixef nnes ař aseggʷas n usřiwřew u ttaman n tmenziwt s nnuqart ad yiři ɛlaḥsab řqedd n iseggʷusa, inni i ɣa ittwaḥesben am wussan n ijj n ucewwař ixeddmen akides. 51 Mařa aqa din ɛad aṭṭas n iseggʷusa ɣar zzat, ad ixeǧeṣ maⱨend ad ittwafdi anect n tesɣart n ttaman s tmenyat n nnuqart i zi ittwaseɣ. 52 Mařa ɛad drus i iqqimen n iseggʷusa ař aseggʷas n usřiwřew, xenni ad igg i yixef nnes ijj n řeḥsab uca ad ixeǧeṣ ttaman n ufekki nnes ɛlaḥsab iseggʷusa i din iqqimen. 53 Am yijj n ucewwař ad ɣares iqqim zeg useggʷas ař aseggʷas. War xas ittṣelleṭ s řeqsaḥet zzat i tiṭṭawin nnek. 54 Mařa war ittwafdi s marra aya, xenni ad ifekk deg useggʷas n usřiwřew, netta d tarwa nnes akides.

55 Minzi ayt n Israil aqa aten d imsexxaren inu, inni ssuffɣeɣ zi temmurt n Miṣra. Aqa Necc d SIDI, AREBBI nwem.”