1 Issiweř SIDI ak-d Musa, inna:

2 “Umur ayt n Israil maḥend ad ac dd-awyen i tfawt, zzect iṣfan ttwaddzen tt-i-dd zi zzitun, ḥima ad tejjem tafawt tařeqq řebda. 3 Harun ad t isettef řebda zzat i wudem n SIDI zi ǧiřet ař ṣṣbeḥ zzat n uřeḥḥaf n Cchadet deg Uqiḍun n Umsagar. Aqa-tt d ict n tewṣeyyet i řebda i marra jjiřat nwem. 4 Ittxeṣṣa as ad isettef řebda tiftiřin i iǧan x řqendiř izdigen zzat i wudem n SIDI. 5 Ad teksid waren azdad uca ad zzayes tesseggʷed tenɛac n řemsemnat. Ict n temsemmemt ad tiři zi tnayen n teɛcurin n yijj n ifa n waren azdad. 6 Ad tent tegged di tnayen n isettifen, setta deg ijj n usettif x tzewḍa izdigen zzat i wudem n SIDI. 7 Ad tegged x kuř asettif jjawi iṣfan nni i ɣa yiři i řidaret ak-d weɣrum. Aqa-tt d ict n tewhibt n tmessi i SIDI. 8 Di kuř ass n ssebt ad isettef aya řebda zzat i wudem n SIDI di ṭṭweɛ n ayt n Israil. Aqa-t d ijj n Řɛahd i řebda. 9 Ad yiři weɣrum i Harun d iḥenjiren nnes, inni t ɣa iccen deg wemcan amqeddas, minzi i netta i iǧa uya d amqeddas qaɛ zi tewhibin n tmessi n SIDI. Aqa-tt d ict n tewṣeyyet i řebda.” ^■  

10 Mmis n ict n temɣart Tisrayilect teffeɣ ɣar barra. Netta tuɣa-t d mmis n ijj n weryaz d Amiṣri izeddɣen jar ayt n Israil. Mmis n temɣart-a zi Israil u ijj n weryaz zi Israil mmenɣen ak-d wayawya di řmargeḥ n řɛeskar.

11 Mmis n temɣart Tisrayilect iceqqef deg Yisem uca ikkʷar. Xenni iwyen t ɣar Musa. Yemmas, qqaren as Cilumiya, yeǧis n Dibri, zi teqbič n Dan.

12 Ggin ad xas ḥḍan ařami d asen i ɣa immeř min i ɣa ggen zeg uqemmum n AREBBI

13 uca issiweř SIDI ak-d Musa, inna:

14 “Suffeɣ wenni ineɛřen barra i řmargeḥ n řɛeskar, uca ejj marra inni d as isřin ad ssarsen ifassen nsen x uzeǧif nnes. Xenni ad t tarjem tamesmunt am tekmeř.

15 Ad tessiwřed ak-d marra ayt n Israil uca ad asen tinid: ‘Kuř aryaz i ɣa ineɛřen AREBBI, ad yarbu ddenb nnes.

16 Wenni ittceqqafen deg Yisem n SIDI, ad ittwaneɣ nican!’ Marra tamesmunt ad t tarjem. Ad ittwaneɣ ubarrani uřa d wenni dd-ittwaxeřqen di temmurt mařa ittceqqef deg Yisem.

17 Mařa ijj n weryaz inɣa řeɛmar n ca n bnadem nneɣni, xenni ad ittwaneɣ nican.

18 maca wenni inɣin řeɛmar n ict n řebhimet, ad t yarr: řeɛmar s řeɛmar.

19 Mařa ijj n weryaz issyizem amqarreb nnes, xenni ad zzayes ggen am mammec igga netta: 20 tareẓẓit s tareẓẓit, tiṭṭ s tiṭṭ, tiɣmest s teɣmest. Anect issyizzem netta ijj n bnadem, ammu i d as ɣa ggen ɛawed. ^■  

21 Wenni inɣin ict n řebḥimet, ad tt yarr, u wenni inɣin ijj n bnadem, ad ittwaneɣ simant nnes.

22 Ad ɣarwem yiři d ijj n uzerf i ubarrani amecnaw i wenni dd-ixeřqen di temmurt, minzi Necc d SIDI, AREBBI nwem!’ ”

23 Xenni inna Musa i ayt n Israil ad ssuffɣen wenni tuɣa ineɛɛřen barra i řmargeḥ n řɛeskar ḥima ad t arejmen. Uca ayt n Israil ggin am mammec i t yumur SIDI i Musa.