1 Inna SIDI i Musa: “Siweř ak-d ikehhanen, iḥenjiren n Harun, uca ini asen: ‘Uřa d ijj zzaywem war issexmij ixef nnes s ijj n umettin jar řgens nnes. 2 mɣir s raǧ nnes yudsen, s yemmas niɣ s babas niɣ s mmis niɣ s yeǧis niɣ s umas. 3 Uřa s umas nni d taɛzarct, uřa d řaǧ nnes yudsen u war ɣares tuɣi weryaz, aqa zzayes i izemmar ad issexmej ixef nnes. 4 Bab n taddart war issxemmaj ixef nnes s řgens nnes ař ɣa issɛiǧi ixef nnes zzayes.

5 War tteggen ca n wemcan iqquccar x izeǧif nsen uca war ttḥeffin ṭṭarf n tmart nsen u war carrḍen acarreḍ deg weysum nsen.

6 Ad iřin d imqeddasen i AREBBI nsen uca war feṭṭḥen Isem n AREBBI nsen, minzi aqa d nitni i issqarraben tiwhibin n tmessi ɣar AREBBI, tinni d macca n tewhibt n AREBBI nsen. S uya ad iřin d imqeddasen.

7 War iɛeddeř ad awyen tamɣart nni iǧan d lfasda niɣ icten tᵉttwaɣṣeb. Uřa d ict n temɣart nni ittwaǧfen zeg weryaz nnes, war tt ttiwyen, minzi akehhan netta d amqeddas i AREBBI nnes. 8 Ad t tḥesbed d amqeddas minzi netta issqarrab-dd macca n tewhibt n AREBBI nnek. Ad yiři d amqeddas i cek, minzi Necc d amqeddas, Necc d SIDI wenni kenniw issqeddsen. 9 Mařa yeǧis n ijj n weryaz nni iǧan d akehhan tenni tessefḍeḥ ixef nnes s farq-ccɣeř nnes, xenni aqa tessefḍeḥ babas uca ittxeṣṣa as ad tᵉttwasecmeḍ s tmessi.

10 Arrays n ikehhanen jar aytmas, wenni x uzeǧif nnes tᵉttwafarreɣ zzect i wedhan u wenni ittwařeqqmen maḥend ad yarḍ arruḍ n ukehhan, netta war izemmar ad iḍřeq i ucewwaf x uzeǧif nnes niɣ ad icarreg arruḍ nnes.

11 War izemmar ad dd-iqarreb ɣar ict n řxecbet uřa war izemmar ad issexmej ixef nnes s babas d yemmas.

12 War itteffeɣ zi Zzawect Iqeddsen ḥima war issɛiǧi Zzawect Iqeddsen n AREBBI, minzi tamrist n zzect n wedhan n AREBBI nnes aqa-tt xas. Necc d SIDI!

13 Ad yawi ict n teɛzarect d tamɣart.

14 War ittiwi tajjač niɣ taneǧaft niɣ tenni ittwaɣeṣben d tamɣart, maca ad yawi ict n teɛzarect zi řgens nnes d tamɣart.

15 War issɛiǧi zzariɛet nnes jar řgens nnes, minzi Necc d SIDI, wenni t issqeddsen.”

16 Issiweř SIDI ak-d Musa, inna:

17 “Siweř ak-d Harun, ini: ‘Uřa d ijj zi zzariɛet nnek, di marra jjiřat nsen, i di iǧa ca n uneɛḍab, ad dd-iqarreb ḥima ad dd-issqarreb macca n tewhibt n AREBBI nnes.

18 Minzi uřa d ijj n weryaz war dd-ittqarrib ca s yijj n řɛib, ma d adarɣař i iǧa niɣ d aqiḍar niɣ s ca war iḥři niɣ ɣares ṣṣifet tfarɣ

19 niɣ ijj n weryaz yarẓ as uḍar niɣ afus 20 niɣ bu-teɛrurt niɣ ḥed yařwes di ca n yijj n ttejjař niɣ s ict n tiṭṭ tuff niɣ s jdam niɣ s ict n ccamet texṣar niɣ s iqeǧařen idgedgen. 21 War iɛeddeř i uřa d ijj n weryaz zi zzariɛet n ukehhan Harun, wenni di iǧa ca n řɛib, ad dd-iřḥem maḥend ad dd-issqarreb tiwhibin n tmessi n SIDI. Aqa dayes aneɛḍab, war izemmar ad iffeɣ maḥend ad dd-issqarreb macca n tewhibt n AREBBI nnes. 22 Zi macca n tewhibt n AREBBI nnes iɛeddeř ad zzayes yecc, zi min iǧan iqeddsen qaɛ uřa zi min iqeddsen. 23 Maca war iɛeddeř ad dd-iqarreb ɣar uřeḥḥaf uřa ɣar uɛalṭar, minzi dayes ict n uneɛḍab, ḥima war issɛiǧi Tizawiyyin Iqeddsen inu, minzi Necc d SIDI wenni ten issqeddsen.”

24 Ammu i issiweř Musa ak-d Harun u ak-d iḥenjiren nnes u ak-d marra ayt n Israil.