1 Issiweř SIDI ak-d Musa, inna:

2 “Siweř ak-d Harun u ak-d iḥenjiren nnes, maḥend war ttiwḍen ɣar tewhibin iqeddsen n ayt n Israil tinni d ayi ssqeddsen, ḥima war ssɛiǧten Isem amqeddas inu. Necc d SIDI! 3 Ini asen: ‘Marra aryaz zi zzariɛet nwem di marra jjiřat nwem, wenni dd ɣa iqarrben ɣar tewhibin iqeddsen, nni qeddsen ayt n Israil i SIDI, am ixmej netta, aqa ad ittwaqess weryaz nni zzat i wudem inu. Necc d SIDI. 4 Uřa d ijjen zi zzariɛet n Harun nni di iǧa řbarṣ niɣ wenni ɣar iǧa usizzeř, war ittett zi tewhibin iqeddsen ař ɣa yiři izdig, uřa d ijjen wenni iḥadan ca zi min ittwasxemjen s ijj n umettin niɣ s ijj n weryaz nni s useyyeř n waǧu, ^■   5 niɣ s weryaz nni iḥaḍan ca min ittbuɛen i zi idweř ixmej niɣ iḥada ijj n bnadem i zi idweř ixmej, mammec ma tegga texmuji n bnadem nni. 6 Bnadem nni t iḥadan ad yiři ixmej ař tameddit uca war ittett zi tewhibin iqeddsen, mɣir awarni i ɣa issird arrimet nnes s waman. 7 Xmi dd ɣa teɣři tfuct, ad yiři izdig. Awarni aya ad yecc zi tewhibin iqeddsen, minzi aqa atent d macca nnes. 8 War ittett zeg ict n řxecbet niɣ zeg ijj n umuddar imezzqen minzi zzayes i ɣa idweř ixmej. Necc d SIDI! ^■   9 Ad ḥḍan min xef ten weṣṣiɣ ḥima war ssarebbun x yixef nsen ddenb u xenni ad zzayes mmten xmi i ɣa ssɛiǧten aya. Necc d SIDI wenni ten issqeddsen.

10 Uřa d ijj n ubarrani war ittᵉtt zi tewhibt iqeddsen. Amɛezzeb i izeddɣen jar ikehhanen uřa d acewwař war ttᵉtten zi tewhibt iqeddsen.

11 Maca mařa akehhan isɣa ijjen s nnuqart nnes, aqa iɛeddeř i wa maḥend ad zzayes yecc uřa i yenni dd-ittwaxeřqen di taddart nnes ad ccen macca n tewhibt nnes.

12 Mařa yeǧis n ukehhan tedweř d tamɣart n ijj n ubarrani, war tᵉttett ca zi tewhibt i dd-ittwassgeɛɛden zi tewhibin iqeddsen.

13 Maca mařa yeǧis n ukehhan aqa-tt d tajjač niɣ tᵉttwaǧef zeg weryaz nnes uca war ɣares aḥenjir uca tedweř-dd ɣar taddart n babas, amecnaw di temẓi nnes, xenni ad tecc zi macca n tewhibt n babas, maca uřa d ijj n ubarrani ad zzayes yecc. ^■  

14 Mařa ca n yijjen icca zi tewhibt iqeddsen s uweddar, xenni ad ɣares yarni tasɣart n texmusect uca ad yarr tawhibt iqeddsen ɣar ukehhan.

15 Nitni war zemmaren ad ssɛiǧten tiwhibin iqeddsen n ayt n Israil, tinni ssgeɛɛden ɣar SIDI

16 uca xenni ad xasen ssarbun amarwas s řmuɛṣiyyet nsen umi ɣa ccen zi tewhibin nsen iqeddsen, minzi Necc d SIDI, wenni ten issqeddsen.”

17 Issiweř SIDI ak-d Musa inna:

18 “Siweř ak-d Harun d iḥenjiren nnes u ak-d marra ayt n Israil uca ini asen: ‘D man aya iggur i kuř ijjen zi taddart n Israil u i ibarraniyyen di Israil nni yiwyen tawhibt nnes tenni dd-yusin ak-d marra řewɛud nsen d marra tiwhibin nsen nni wcin s řxaḍar, tenni dd-ssqarrben nitni am tɣarṣt n wecmaḍ i SIDI:

19 maḥend ad kenniw yarr ad tiřim tᵉttwaqebbřem ittxeṣṣa ad yiři d ijj n wewtem icnan qaɛ zeg ifunasen niɣ zeg izmaren niɣ zeg icarriyyen. 20 War izemmar ad dd-tessqarrbem ca n řḥajjet dayes aneɛḍab, minzi aya war kenniw dd-ittarri ad daywem ittwaf arḍa.

21 Mařa ijj n weryaz issqarreb-dd taɣarṣt n řehna ɣar SIDI maḥend ad ikemmeř ijj n lwaɛd niɣ am ict n tewhibt s řxaḍar, xenni ad tiři taɣarṣt d ijj n umuddar icnan qaɛ zi řebhayem niɣ zeg wuǧi, ḥima ad dayes ittwaf arḍa. War iɛeddeř ad dayes yiři uřa d ijj n řɛib. ^■   22 Min iǧan d adarɣař niɣ min ittwarẓen niɣ d aneɛḍab niɣ min di ǧant tfiḍřiwin niɣ jdam niɣ ccamet texṣar war t-i-dd tessqarrabem ca ɣar SIDI uca war zzayes ttiwyem tewhibt n tmessi i SIDI x uɛalṭar.

23 Maca afunas niɣ ijjen zeg wuǧi i iqebḥen zi ssibbet n tuzzeggart niɣ tuquḍeḍt aṭṭas, iɛeddeř ad t-i-dd tesswejded am ict n tewhibt s řxaḍar, maca i yijj n lwaɛd war iseǧḥen i arḍa. 24 Min idgeddgen, min iřebzen, min imezzqen, min ittwaqessen war dd t tessqarrabem ɣar SIDI, war tteggem aya di temmurt nwem. 25 Zeg ufus n mmis n ubarrani war ttqeddamem ca zi marra man aya macca d tawhibt i AREBBI, minzi dayes řɣecc nsen uřa d nneqṣan dayes, man aya war ittwaqebbiř ca di ṭṭweɛ nwem.”

26 Issiweř SIDI ak-d Musa, inna:

27 “Xmi dd-ixeǧeq ufunas niɣ izmar niɣ iɣayḍ, xenni ad yiři sadu ḥeṭṭu n yemmas sebɛa n wussan. Zeg wass wiss tmenya u awarni as ad iṣřeḥ i yarḍa am tewhibt n tmessi i SIDI. 28 War iɛeddeř ad tɣarṣed i ufunas niɣ i ijjen zeg wuǧi ak-d mmis deg wass d ijj. 29 X minni texsem ad tqeddmem tawhibt n uqadi i SIDI, qeddem xenni min iṣeřḥen i yarḍa nwem. 30 Ad tᵉttwacc deg wass nni simant nnes. War zzayes ttejjim ca ař ṣṣbeḥ. Necc d SIDI! ^■  

31 Ad teḥḍam řumurat inu uca ad zzaysen teggem. Necc d SIDI!

32 War ttessɛiǧitem Isem inu iqeddsen, ḥima Necc ad ttwaqeddseɣ di řwest n ayt n Israil. Necc d SIDI, wenni kenniw issqeddsen, 33 d wenni kenniw dd-issuffɣen zi temmurt n Miṣra, ḥima ad iřiɣ d AREBBI i kenniw. Necc d SIDI!”