Tiweṣṣa x uweqqar di tudart
19
1 Issiweř SIDI ɣar Musa, inna: 2 “Siweř ak-d marra tamesmunt n ayt n Israil uca ini asen: ‘Ittxeṣṣa ad tiřim d imqeddasen, minzi Necc d SIDI, AREBBI nwem, aqa ayi d amqeddas! ■ 3 Kuř ijj ad iweqqar yemmas d babas uca ussan inu n ssebt ad ten teḥḍam, Necc d SIDI, AREBBI nwem!■ 4 War ggur ad tdewřem ɣar l’aṣnam u war tteggem i yixef nwem řexyařat ifesyen d irebbiten. Necc d SIDI, AREBBI nwem! ■ 5 Xmi ɣa tqeddmen taɣarṣt n řehna i SIDI, xenni ad tt tqeddmem s ijj n webrid i zi ɣa tᵉttwaqebřem s arḍa. 6 Ittxeṣṣa ad tᵉttwacc deg wass n tɣarṣt nnek uřa di tiwecca awarni as. Min iqqimen ař wass wiss třata ad ittwasecmeḍ s tmessi. ■ 7 Mařa tᵉttwacc ɛad deg wass wiss třata, ad tiři d jjɛifect, war dayes ittwif arḍa. 8 Wi zzayes ɣa iccen ad yarbu řmuɛṣiyyet nnes, minzi issɛiǧ min iǧan d amqeddas n SIDI uca xenni ad ittwaqess bnadem nni zi řgens nnes.
9 Mařa temjarem ṣṣabet n temmurt nwem, war mejjar cek iyyar nnek ař aɣezdis aneggar niɣ ad tjemɛed min iqqimen awarni tameyra nnek. ■
10 War třeqqḍed uḍiř n umarjuɛ nnek kuřci, war tessmunid marra min din iqqimen di temmurt deg umarjuɛ nnek n uḍiř. Ad ten tejjed i umezřuḍ u i ubarrani, Necc d SIDI, AREBBI nwem!
11 War ttacar u war ssxarriq u uřa d ijj ma ad icmet amqarreb nnes. ■
12 War ttjaǧam ẓur s Yisem inu. War tessɛiǧid Isem n AREBBI nnek. Necc d SIDI.■
13 War ssḥissif amqarreb nnek niɣ ad t tacared. War ttᵉṭṭef řmunet n icewwařen zi ǧiřet ař tiwecca. □ ■
14 War ttekkʷar adehcur u war ttegg ca min di ɣa inqareḍ udarɣař, maca ittxeṣṣa cek ad teggʷeded AREBBI, Necc d SIDI!
15 Ɣar weḥkam war ggur ad tɣeccem. War sɛizzi amezřuḍ u war sɛeddu ɣar bu-txuba. Ittxeṣṣa ad tḥekmed x umqarreb nnek s usegged. ■
16 War ggur jar řgens nnek s unemmem, war tbeddid x idammen n umqarreb nnek, Necc d SIDI! ■
17 War carreh umac deg wuř nnek. Ad tɛeřmed aɛřam i umqarreb nnek u war tkessid ddenb nnes xak. ■
18 War ttentiqim niɣ ad txemmřed antaqem x tarwa n řgens nnek. Ad texsed amqarreb nnek amecnaw ixef nnek, Necc d SIDI.■
19 Ad teḥḍam tiweṣṣa inu. War ttřeqqam ca řebhimet nnek ak-d ijj n marka nneɣni. War zarreɛ tnayen n markat n zzariɛet deg iyyar nnek u war yarreḍ arruḍ ittwaggen s tnayen n markat n ukettan. ■
20 Mařa aryaz inḍar am iṭṭeṣ ak-d ict n temɣart, ict n tayya ixḍeb i-tt yijj n weryaz nneɣni, maca war ittwaxeǧeṣ ɛad řexřaṣ nnes niɣ temmewc as třelli, xenni ad yiři řeḥsab, maca war tᵉttwaneqqen ca, minzi nettat tuɣa ɛad war tᵉttwaḥar ca. 21 Netta ad yawi taɣarṣt n umarwas nnes i SIDI ɣar wadaf n Uqiḍun n Umsagar, ijj n icarri am taɣarṣt n umarwas. 22 Ad xas ifdi ukehhan s icarri n tɣarṣt n umarwas zzat i wudem n SIDI i ddenb nnes i igga uca ddenb nnes i igga ad as ittwaɣfar. □
23 Xmi ɣa tawḍem di temmurt uca teẓẓum ɛřam kuř ticejjura maḥend ad zzaysent teccem, xenni ad tejjem war txetnem ‘řeɛdařyet nnes’, tenni d řɣiǧet nnes. Třata n iseggʷusa ad tent tejjem war tent txetnem. War zzaysent ttᵉttem ca. 24 Deg useggʷas wiss arebɛa ad tiři marra řɣiǧet nnes tqeddes, i usemɣar i SIDI. 25 Deg useggʷas wiss xemsa ad teccem řɣiǧet nnes uca ṣṣabet nnes ad tt tewcem i yixef nwem. Necc d SIDI, AREBBI nwem!
26 War ggur ad teccem ca dayes idammen. War iɛeddeř ad tgezznem niɣ ad tessxedmem tabezgiwt. 27 Ittxeṣṣa kenniw war tḥeffim acewwaf n uzeǧif x iɣezdisen u war ggur ad tḍeyyɛem aḥeffi n tma n tmart nwem. ■ 28 War tcarraḍem arrimat nwem i yijj n umettin niɣ ad tarecmem tiggaz di arrimat nwem. Necc d SIDI!■ 29 War sdeǧi yeǧic, ad tt tarred d tamɣart n farq-ccɣeř, ḥima war tweṭṭi temmurt di farq-ccɣeř uca xenni ad teccur temmurt s řefḍiḥet. 30 Ad teḥḍam ussan inu n ssebt uca ad tweqqarem Zzawect inu Iqeddsen inu. Necc d SIDI! 31 War ttdikkwiřem ɣar yenni issawařan ak-d imettan u ɣar igezzanen u war ɣarsen arezfem ḥima ad zzaysen ttwaxemjen. Necc d SIDI, AREBBI nwem! ■
32 Ad tekkared i wenni ɣar iǧa ucewwaf icab uca ad tweqqared udem n iwessura uca ad teggʷeded zi AREBBI nnek. Necc d SIDI! 33 Xmi kidek ɣa izdeɣ ijj n ubarrani di temmurt nwem, war t ttḍeǧmem. ■ 34 Abarrani, wenni ɣarwem izeddɣen, ad awem yiři amecnaw ijjen zi tarwa n temmurt nwem. Ad t texsed am yixef nnek, minzi tuɣa kenniw d ibarraniyyen di temmurt n Miṣra. Necc d SIDI, AREBBI nwem!
35 Xmi i ɣa tiřim ɣar weḥkam war tɣeccem ca s řeɛbar n tuzzeggart niɣ n ḍqeř niɣ n řeɛbar n min dayes. 36 Ad ɣarwem yiři d ijj n řmizan nican d iẓra n řmizan nican uřa d ijj n ifa nican d ijj n uhinu nican, Necc d SIDI, AREBBI nwem, wenni i kenniw dd-inedhen zi temmurt n Miṣra. ■
37 Ad teḥḍam marra tiweṣṣa d řumur inu uca ad ten teggem. Necc d SIDI!”